Psalmorum 47

1 In finem, pro filiis Core. Psalmus. Omnes gentes, plaudite manibus; jubilate Deo in voce exsultationis:

Psalmus David, in finem, pro filiis Core. Omnes Gentes plaudite manibus: iubilate Deo in voce exultationis.

2 quoniam Dominus excelsus, terribilis, rex magnus super omnem terram.

Quoniam Dominus excelsus, terribilis: Rex magnus super omnem terram.

3 Subjecit populos nobis, et gentes sub pedibus nostris.

Subiecit populos nobis: et gentes sub pedibus nostris.

4 Elegit nobis hæreditatem suam; speciem Jacob quam dilexit.

Elegit nobis hereditatem suam: speciem Iacob, quam dilexit.

5 Ascendit Deus in jubilo, et Dominus in voce tubæ.

Ascendit Deus in iubilo: et Dominus in voce tubae.

6 Psallite Deo nostro, psallite; psallite regi nostro, psallite:

Psallite Deo nostro, psallite: psallite Regi nostro, psallite.

7 quoniam rex omnis terræ Deus, psallite sapienter.

Quoniam Rex omnis terrae Deus: psallite sapienter.

8 Regnabit Deus super gentes; Deus sedet super sedem sanctam suam.

Regnabit Deus super gentes: Deus sedet super sedem sanctam suam.

9 Principes populorum congregati sunt cum Deo Abraham, quoniam dii fortes terræ vehementer elevati sunt.

Principes populorum congregati sunt cum Deo Abraham: quoniam dii fortes terrae, vehementer elevati sunt.