Psalmorum 129

1 Canticum graduum. Sæpe expugnaverunt me a juventute mea, dicat nunc Israël;

Canticum graduum. Saepe expugnaverunt me a iuventute mea, dicat nunc Israel.

2 sæpe expugnaverunt me a juventute mea: etenim non potuerunt mihi.

Saepe expugnaverunt me a iuventute mea: etenim non potuerunt mihi.

3 Supra dorsum meum fabricaverunt peccatores; prolongaverunt iniquitatem suam.

Supra dorsum meum fabricaverunt peccatores: prolongaverunt iniquitatem suam.

4 Dominus justus concidit cervices peccatorum.

Dominus iustus concidet cervices peccatorum:

5 Confundantur, et convertantur retrorsum omnes qui oderunt Sion.

confundantur et convertantur retrorsum omnes, qui oderunt Sion.

6 Fiant sicut fœnum tectorum, quod priusquam evellatur exaruit:

Fiant sicut foenum tectorum: quod priusquam evellatur, exaruit:

7 de quo non implevit manum suam qui metit, et sinum suum qui manipulos colligit.

De quo non implebit manum suam qui metit, et sinum suum qui manipulos colligit.

8 Et non dixerunt qui præteribant: Benedictio Domini super vos. Benediximus vobis in nomine Domini.

Et non dixerunt qui praeteribant: Benedictio Domini super vos: benediximus vobis in nomine Domini.