Psalmorum 44
1 In finem, Filiis Core ad intellectum.
in finem filiis Core ad intellectum
2 Deus auribus nostris audivimus: patres nostri annunciaverunt nobis. Opus, quod operatus es in diebus eorum: et in diebus antiquis.
Deus auribus nostris audivimus patres nostri adnuntiaverunt nobis opus quod operatus es in diebus eorum in diebus antiquis
3 Manus tua gentes disperdidit, et plantasti eos: afflixisti populos, et expulisti eos:
manus tua gentes disperdit et plantasti eos adflixisti populos et expulisti eos
4 Nec enim in gladio suo possederunt terram, et brachium eorum non salvavit eos: Sed dextera tua, et brachium tuum, et illuminatio vultus tui: quoniam complacuisti in eis.
nec enim in gladio suo possederunt terram et brachium eorum non salvavit eos sed dextera tua et brachium tuum et inluminatio faciei tuae quoniam conplacuisti in eis
5 Tu es ipse rex meus et Deus meus: qui mandas salutes Iacob.
tu es ipse rex meus et Deus meus qui mandas salutes Iacob
6 In te inimicos nostros ventilabimus cornu, et in nomine tuo spernemus insurgentes in nobis.
in te inimicos nostros ventilabimus cornu et in nomine tuo spernemus insurgentes in nobis
7 Non enim in arcu meo sperabo: et gladius meus non salvabit me.
non enim in arcu meo sperabo et gladius meus non salvabit me
8 Salvasti enim nos de affligentibus nos: et odientes nos confudisti.
salvasti enim nos de adfligentibus nos et odientes nos confudisti
9 In Deo laudabimur tota die: et in nomine tuo confitebimur in sæculum.
in Deo laudabimur tota die et in nomine tuo confitebimur in saeculum diapsalma
10 Nunc autem repulisti et confudisti nos: et non egredieris Deus in virtutibus nostris.
nunc autem reppulisti et confudisti nos et non egredieris in virtutibus nostris
11 Avertisti nos retrorsum post inimicos nostros: et qui oderunt nos, diripiebant sibi.
avertisti nos retrorsum post inimicos nostros et qui oderunt nos diripiebant sibi
12 Dedisti nos tamquam oves escarum: et in Gentibus dispersisti nos.
dedisti nos tamquam oves escarum et in gentibus dispersisti nos
13 Vendidisti populum tuum sine pretio: et non fuit multitudo in commutationibus eorum.
vendidisti populum tuum sine pretio et non fuit multitudo in commutationibus nostris
14 Posuisti nos opprobrium vicinis nostris, subsannationem et derisum his, qui sunt in circuitu nostro.
posuisti nos obprobrium vicinis nostris subsannationem et derisum his qui in circuitu nostro
15 Posuisti nos in similitudinem Gentibus: commotionem capitis in populis.
posuisti nos in similitudinem gentibus commotionem capitis in populis
16 Tota die verecundia mea contra me est, et confusio faciei meæ cooperuit me,
tota die verecundia mea contra me est et confusio faciei meae cooperuit me
17 a voce exprobrantis, et obloquentis: a facie inimici, et persequentis.
a voce exprobrantis et obloquentis a facie inimici et persequentis
18 Hæc omnia venerunt super nos, nec obliti sumus te: et inique non egimus in testamento tuo.
haec omnia venerunt super nos nec obliti sumus te et inique non egimus in testamento tuo
19 Et non recessit retro cor nostrum: et declinasti semitas nostras a via tua:
et non recessit retrorsum cor nostrum et declinasti semitas nostras a via tua
20 Quoniam humiliasti nos in loco afflictionis, et cooperuit nos umbra mortis.
quoniam humiliasti nos in loco adflictionis et cooperuit nos umbra mortis
21 Si obliti sumus nomen Dei nostri, et si expandimus manus nostras ad deum alienum:
si obliti sumus nomen Dei nostri et si expandimus manus nostras ad deum alienum
22 Nonne Deus requiret ista? ipse enim novit abscondita cordis. Quoniam propter te mortificamur tota die: æstimati sumus sicut oves occisionis.
nonne Deus requiret ista ipse enim novit abscondita cordis quoniam propter te mortificamur omni die aestimati sumus sicut oves occisionis
23 Exurge, quare obdormis Domine? exurge, et ne repellas in finem.
exsurge quare dormis Domine exsurge et ne repellas in finem
24 Quare faciem tuam avertis, oblivisceris inopiæ nostræ et tribulationis nostræ?
quare faciem tuam avertis oblivisceris inopiae nostrae et tribulationis nostrae
25 Quoniam humiliata est in pulvere anima nostra: conglutinatus est in terra venter noster.
quoniam humiliata est in pulvere anima nostra conglutinatus est in terra venter noster
26 Exurge Domine, adiuva nos: et redime nos propter nomen tuum.
exsurge adiuva nos et redime nos propter nomen tuum
