Lucam 23
1 Et surgens omnis multitudo eorum, duxerunt illum ad Pilatum.
et surgens omnis multitudo eorum duxerunt illum ad Pilatum
2 Cœperunt autem illum accusare, dicentes: Hunc invenimus subvertentem gentem nostram, et prohibentem tributa dare Cæsari, et dicentem se Christum regem esse.
coeperunt autem accusare illum dicentes hunc invenimus subvertentem gentem nostram et prohibentem tributa dari Caesari et dicentem se Christum regem esse
3 Pilatus autem interrogavit eum, dicens: Tu es rex Iudæorum? At ille respondens ait: Tu dicis.
Pilatus autem interrogavit eum dicens tu es rex Iudaeorum at ille respondens ait tu dicis
4 Ait autem Pilatus ad principes sacerdotum, et turbas: Nihil invenio causæ in hoc homine.
ait autem Pilatus ad principes sacerdotum et turbas nihil invenio causae in hoc homine
5 At illi invalescebant, dicentes: Commovet populum docens per universam Iudæam, incipiens a Galilæa usque huc.
at illi invalescebant dicentes commovet populum docens per universam Iudaeam et incipiens a Galilaea usque huc
6 Pilatus autem audiens Galilæam, interrogavit si homo Galilæus esset.
Pilatus autem audiens Galilaeam interrogavit si homo Galilaeus esset
7 Et ut cognovit quod de Herodis potestate esset, remisit eum ad Herodem, qui et ipse Ierosolymis erat illis diebus.
et ut cognovit quod de Herodis potestate esset remisit eum ad Herodem qui et ipse Hierosolymis erat illis diebus
8 Herodes autem viso Iesu, gavisus est valde. Erat enim cupiens ex multo tempore videre eum, eo quod audierat multa de eo, et sperabat signum aliquod videre ab eo fieri.
Herodes autem viso Iesu gavisus est valde erat enim cupiens ex multo tempore videre eum eo quod audiret multa de illo et sperabat signum aliquod videre ab eo fieri
9 Interrogabat autem eum multis sermonibus. At ipse nihil illi respondebat.
interrogabat autem illum multis sermonibus at ipse nihil illi respondebat
10 Stabant autem principes sacerdotum, et scribæ constanter accusantes eum.
stabant etiam principes sacerdotum et scribae constanter accusantes eum
11 Sprevit autem illum Herodes cum exercitu suo: et illusit indutum veste alba, et remisit ad Pilatum.
sprevit autem illum Herodes cum exercitu suo et inlusit indutum veste alba et remisit ad Pilatum
12 Et facti sunt amici Herodes et Pilatus in ipsa die: nam antea inimici erant ad invicem.
et facti sunt amici Herodes et Pilatus in ipsa die nam antea inimici erant ad invicem
13 Pilatus autem convocatis principibus sacerdotum, et magistratibus, et plebe,
Pilatus autem convocatis principibus sacerdotum et magistratibus et plebe
14 dixit ad illos: Obtulistis mihi hunc hominem, quasi avertentem populum, et ecce ego coram vobis interrogans, nullam causam inveni in homine isto ex his, in quibus eum accusatis.
dixit ad illos obtulistis mihi hunc hominem quasi avertentem populum et ecce ego coram vobis interrogans nullam causam inveni in homine isto ex his in quibus eum accusatis
15 Sed neque Herodes: nam remisi vos ad illum, et ecce nihil dignum morte actum est ei.
sed neque Herodes nam remisi vos ad illum et ecce nihil dignum morte actum est ei
16 Emendatum ergo illum dimittam.
emendatum ergo illum dimittam
17 Necesse autem habebat dimittere eis per diem festum, unum.
necesse autem habebat dimittere eis per diem festum unum
18 Exclamavit autem simul universa turba, dicens: Tolle hunc, et dimitte nobis Barabbam,
exclamavit autem simul universa turba dicens tolle hunc et dimitte nobis Barabban
19 qui erat propter seditionem quamdam factam in civitate et homicidium, missus in carcerem.
qui erat propter seditionem quandam factam in civitate et homicidium missus in carcerem
20 Iterum autem Pilatus locutus est ad eos, volens dimittere Iesum.
iterum autem Pilatus locutus est ad illos volens dimittere Iesum
21 At illi succlamabant, dicentes: Crucifige, crucifige eum.
at illi succlamabant dicentes crucifige crucifige illum
22 Ille autem tertio dixit ad illos: Quid enim mali fecit iste? nullam causam mortis invenio in eo: corripiam ergo illum, et dimittam.
ille autem tertio dixit ad illos quid enim mali fecit iste nullam causam mortis invenio in eo corripiam ergo illum et dimittam
23 At illi instabant vocibus magnis postulantes ut crucifigeretur: et invalescebant voces eorum.
at illi instabant vocibus magnis postulantes ut crucifigeretur et invalescebant voces eorum
24 Et Pilatus adiudicavit fieri petitionem eorum.
et Pilatus adiudicavit fieri petitionem eorum
25 Dimisit autem illis eum, qui propter homicidium, et seditionem missus fuerat in carcerem, quem petebant, Iesum vero tradidit voluntati eorum.
dimisit autem illis eum qui propter homicidium et seditionem missus fuerat in carcerem quem petebant Iesum vero tradidit voluntati eorum
26 Et cum ducerent eum, apprehenderunt Simonem quemdam Cyrenensem venientem de villa: et imposuerunt illi crucem portare post Iesum.
et cum ducerent eum adprehenderunt Simonem quendam Cyrenensem venientem de villa et inposuerunt illi crucem portare post Iesum
27 Sequebatur autem illum multa turba populi, et mulierum: quæ plangebant, et lamentabantur eum.
sequebatur autem illum multa turba populi et mulierum quae plangebant et lamentabant eum
28 Conversus autem ad illas Iesus, dixit: Filiæ Ierusalem, nolite flere super me, sed super vos ipsas flete, et super filios vestros.
conversus autem ad illas Iesus dixit filiae Hierusalem nolite flere super me sed super vos ipsas flete et super filios vestros
29 Quoniam ecce venient dies, in quibus dicent: Beatæ steriles, et ventres, qui non genuerunt, et ubera, quæ non lactaverunt.
quoniam ecce venient dies in quibus dicent beatae steriles et ventres qui non genuerunt et ubera quae non lactaverunt
30 Tunc incipient dicere montibus: Cadite super nos: et collibus: Operite nos.
tunc incipient dicere montibus cadite super nos et collibus operite nos
31 Quia si in viridi ligno hæc faciunt, in arido quid fiet?
quia si in viridi ligno haec faciunt in arido quid fiet
32 Ducebantur autem et alii duo nequam cum eo, ut interficerentur.
ducebantur autem et alii duo nequam cum eo ut interficerentur
33 Et postquam venerunt in locum, qui vocatur Calvariæ, ibi crucifixerunt eum: et latrones, unum a dextris, et alterum a sinistris.
et postquam venerunt in locum qui vocatur Calvariae ibi crucifixerunt eum et latrones unum a dextris et alterum a sinistris
34 Iesus autem dicebat: Pater, dimitte illis: non enim sciunt quid faciunt. Dividentes vero vestimenta eius, miserunt sortes.
Iesus autem dicebat Pater dimitte illis non enim sciunt quid faciunt dividentes vero vestimenta eius miserunt sortes
35 Et stabat populus spectans, et deridebant eum principes cum eis, dicentes: Alios salvos fecit, se salvum faciat, si hic est Christus Dei electus.
et stabat populus expectans et deridebant illum principes cum eis dicentes alios salvos fecit se salvum faciat si hic est Christus Dei electus
36 Illudebant autem ei et milites accedentes, et acetum offerentes ei,
inludebant autem ei et milites accedentes et acetum offerentes illi
37 et dicentes: Si tu es rex Iudæorum, salvum te fac.
dicentes si tu es rex Iudaeorum salvum te fac
38 Erat autem et superscriptio scripta super eum litteris Græcis, et Latinis, et Hebraicis: Hic est rex Iudæorum.
erat autem et superscriptio inscripta super illum litteris graecis et latinis et hebraicis hic est rex Iudaeorum
39 Unus autem de his, qui pendebant, latronibus, blasphemabat eum, dicens: Si tu es Christus, salvum fac temetipsum, et nos.
unus autem de his qui pendebant latronibus blasphemabat eum dicens si tu es Christus salvum fac temet ipsum et nos
40 Respondens autem alter increpabat eum, dicens: Neque tu times Deum, quod in eadem damnatione es.
respondens autem alter increpabat illum dicens neque tu times Deum quod in eadem damnatione es
41 Et nos quidem iuste, nam digna factis recipimus: hic vero nihil mali gessit.
et nos quidem iuste nam digna factis recipimus hic vero nihil mali gessit
42 Et dicebat ad Iesum: Domine, memento mei, cum veneris in regnum tuum.
et dicebat ad Iesum Domine memento mei cum veneris in regnum tuum
43 Et dixit illi Iesus: Amen dico tibi: Hodie mecum eris in Paradiso.
et dixit illi Iesus amen dico tibi hodie mecum eris in paradiso
44 Erat autem fere hora sexta, et tenebræ factæ sunt in universam terram usque ad horam nonam.
erat autem fere hora sexta et tenebrae factae sunt in universa terra usque in nonam horam
45 Et obscuratus est sol: et velum templi scissum est medium.
et obscuratus est sol et velum templi scissum est medium
46 Et clamans voce magna Iesus ait: Pater in manus tuas commendo spiritum meum. Et hæc dicens, expiravit.
et clamans voce magna Iesus ait Pater in manus tuas commendo spiritum meum et haec dicens exspiravit
47 Videns autem Centurio quod factum fuerat, glorificavit Deum, dicens: Vere hic homo iustus erat.
videns autem centurio quod factum fuerat glorificavit Deum dicens vere hic homo iustus erat
48 Et omnis turba eorum, qui simul aderant ad spectaculum istud, et videbant quæ fiebant, percutientes pectora sua revertebantur.
et omnis turba eorum qui simul aderant ad spectaculum istud et videbant quae fiebant percutientes pectora sua revertebantur
49 Stabant autem omnes noti eius a longe: et mulieres, quæ secutæ eum erant a Galilæa, hæc videntes.
stabant autem omnes noti eius a longe et mulieres quae secutae erant eum a Galilaea haec videntes
50 Et ecce vir nomine Ioseph, qui erat decurio, vir bonus, et iustus:
et ecce vir nomine Ioseph qui erat decurio vir bonus et iustus
51 hic non consenserat consilio, et actibus eorum, ab Arimathæa civitate Iudææ, qui expectabat et ipse regnum Dei.
hic non consenserat consilio et actibus eorum ab Arimathia civitate Iudaeae qui expectabat et ipse regnum Dei
52 Hic accessit ad Pilatum, et petiit corpus Iesu:
hic accessit ad Pilatum et petiit corpus Iesu
53 et depositum involvit sindone, et posuit eum in monumento exciso, in quo nondum quisquam positus fuerat.
et depositum involvit sindone et posuit eum in monumento exciso in quo nondum quisquam positus fuerat
54 Et dies erat Parasceves, et Sabbatum illucescebat.
et dies erat parasceves et sabbatum inlucescebat
55 Subsecutæ autem mulieres, quæ cum eo venerant de Galilæa, viderunt monumentum, et quemadmodum positum erat corpus eius.
subsecutae autem mulieres quae cum ipso venerant de Galilaea viderunt monumentum et quemadmodum positum erat corpus eius
56 Et revertentes paraverunt aromata, et unguenta: et Sabbato quidem siluerunt secundum mandatum.
et revertentes paraverunt aromata et unguenta et sabbato quidem siluerunt secundum mandatum
