< Psalmorum 4 >
1 In finem, in carminibus. Psalmus David. [Cum invocarem exaudivit me Deus justitiæ meæ, in tribulatione dilatasti mihi. Miserere mei, et exaudi orationem meam. Filii hominum, usquequo gravi corde? ut quid diligitis vanitatem, et quæritis mendacium?
2 Et scitote quoniam mirificavit Dominus sanctum suum; Dominus exaudiet me cum clamavero ad eum.
3 Irascimini, et nolite peccare; quæ dicitis in cordibus vestris, in cubilibus vestris compungimini.
4 Sacrificate sacrificium justitiæ, et sperate in Domino. Multi dicunt: Quis ostendit nobis bona?
5 Signatum est super nos lumen vultus tui, Domine: dedisti lætitiam in corde meo.
6 A fructu frumenti, vini, et olei sui, multiplicati sunt.
7 In pace in idipsum dormiam, et requiescam;
8 quoniam tu, Domine, singulariter in spe constituisti me.]
