Psalm 78

1 [Psalm lal Asaph] Mwet luk, porongo mwe luti luk, Ac lohang nu ke ma nga fahk.

2 Nga ac orekmakin kas lalmwetmet In aketeya ma lukma in pacl somla,

3 Ke ma su kut lohng ac etu, Su mwet matu lasr elos srumun nu sesr.

4 Kut ac fah tia okanla ma inge liki tulik natusr; Kut ac fah fahkak nu sin fwil tok uh Ke ku lun LEUM GOD ac orekma yohk lal Ac ma wolana su El oru.

5 El sang ma sap nu sin mwet Israel Ac ma sap ku nu sin fwil natul Jacob. El sapkin nu sin mwet matu lasr Tuh elos in luti ma sap lal nu sin tulik natulos.

6 Tuh fwil se tok uh in etu ke ma inge Ac elos in tafwela pac nu sin tulik natulos.

7 Fin ouinge, elos fah oayapa filiya lulalfongi lalos in God Ac tia mulkunla orekma lal, A elos fah akos ma sap lal pacl e nukewa.

8 Elos ac fah tia oana mwet matu lalos meet ah, Su seakos ac likkeke, Ac lulalfongi lalos tiana ku, Ac elos tia nunak pwaye nu sin God.

9 Mwet Ephraim elos tuh us pisr ac sukan pisr natulos A elos kaingla in len in mweun.

10 Elos tia liyaung wuleang lalos nu sin God, Ac elos srangesr akos ma sap lal.

11 Elos mulkunla orekma lal, Oayapa mwenmen su El oru ye mutalos.

12 God El oru ma usrnguk ye mutun mwet matu lalos In acn Zoan in facl Egypt.

13 God El oralik meoa ac lela tuh elos in fahsr sasla; El oru tuh kof uh in tuyak oana eol.

14 Ke len uh El kololos ke sie pukunyeng, Ac ke fong uh ke kalem ke e.

15 El foklalik eot uh yen mwesis Ac sang kof nimalos liki acn loal.

16 El oru tuh soko infacl srisrik in tuku ke eot uh me, Ac orala tuh kof uh soror oana soko infacl.

17 Tusruktu, elos srakna orekma koluk lain God, Ac elos lain El Su Fulatlana yen mwesis.

18 Elos ke pacna srike God Ke elos sapkin tuh Elan kitalos ke mwe mongo elos lungse.

19 Elos kaskas lain God ac fahk, “Ya God El ku in ase mwe mongo in acn mwesis uh?

20 Pwaye lah El puokya eot uh Ac kof uh kahkma. Na fuka, El ku pac in ase bread nasr Ac kite mwet lal ke ikwa?”

21 Ke ma inge LEUM GOD El kasrkusrak ke El lohng kas lalos. El akkeokye mwet lal ke e, Ac kasrkusrak lal kaclos yokelik,

22 Mweyen wangin lulalfongi lalos in El, Ac elos tia lulalfongi lah El ac ku in molelosla.

23 Na God El kaskas nu yen engyeng uh Ac sapkin tuh srungul we in ikakelik;

24 El sang wheat inkusrao me Ke El supwama manna nalos.

25 Ouinge, mwet uh mongo ke mwe mongo nun lipufan, Ac God El supwama fal nu ke enenu lalos.

26 El oayapa oru tuh eng kutulap in tuhyak, Ac ke ku lal El purakak eng eir me.

27 Na El supweya won nu sin mwet lal, Pus oana puk weacn uh.

28 Won inge putati infulwen na nien aktuktuk lalos, Ac raunela lohm nuknuk selos.

29 Ouinge mwet uh mongo ac arulana kihp, Tuh God El sang nu selos fal nu ke enenu lalos.

30 Tusruktu, elos soenna muti ke kena lalos, Ac elos srakna mongo

31 Ke God El kasrkusrak selos Ac uniya mukul su fokoko emeet lalos; Aok, mukul fusr su wo emeet sin mwet Israel.

32 Ne ouinge elos srakna oru ma koluk God El finne orek mwenmen nu selos, ac elos srakna tia lulalfongel.

33 Ke ma inge God El aksafye len lalos oana lusen mong se; In kitin pacl na El arulana kunausla moul lalos.

34 Pacl nukewa ma God El ac onela kutu selos Na mwet lula uh ac forla nu sel, Elos ac auliyak ac pre ke kuiyalos nufon.

35 Elos esamak lah God El nien molela lalos, Ac El Su Kulana El tuku kasrelos.

36 Tusruktu kas nukewa lalos kikiap — Tiana pwaye ma elos fahk.

37 Elos tia nunak pwaye nu sel; Elos tia inse pwaye nu ke wuleang lalos nu sel.

38 Tusruktu, God El pakomuta mwet lal. El nunak munas ke ma koluk lalos Ac tia kunauselosla. Pacl pus El sruokya mulat lal lukelos, Ac kutongya kasrkusrak lal.

39 El esam lah mwet inge elos mwet moul in ikwa, Moul lalos oana eng uh ke ac tuhwot ac tia folok.

40 Pus na pacl elos aktoasrye God yen mwesis, Oayapa pus na pacl elos aksupwaryal.

41 Pus na pacl elos srike God Ac akkeokye insien God Mutal lun Israel.

42 Elos mulkunla ku lulap lal Ac len se El tuh molelosla liki mwet lokoalok lalos,

43 Ac orala ma ku ac usrnguk In acn Zoan in facl Egypt.

44 El ekulla infacl we nu ke srah Na wangin kof mwet Egypt in nim.

45 El supwala un loang nu inmasrlolos, mwe akkeokyalos, Ac frog in kunausla acn selos.

46 El supwala locust in kangla fokinsak sunalos Ac in kunausla ima lalos.

47 El kunausla ima grape lalos ke af yohk kosra, Ac kunausla sak fig ke aunfong oyohu.

48 El uniya cow natulos ke af yohk kosra, Ac un kosro natulos ke sarom.

49 El srunglulos Ke kasrkusrak ac mulat lal, Oana sie un lipufan su tuku in use misa.

50 El tia sruokya mulat lal Ku molela moul lalos, A El onelos ke mwe akkeok.

51 El uniya wounse nukewa In sou nukewa lun mwet Egypt.

52 Na El kolla mwet lal oana sie shepherd, Ac pwanulos sasla yen mwesis.

53 El kololos in misla ac elos tia sangeng, A meoa tuku ac afunla mwet lokoalok lalos.

54 El kololos nu ke acn mutal sel, Nu ke eol we su El sifacna eisla.

55 El lusak mwet in facl sac ke mwet lal elos utyak Ac El kitalik acn selos nu sin sruf lun Israel, Ac sang lohm sin mwet we nu sin mwet lal.

56 Tusruktu, elos tuyak lain God Kulana, Ac kena sifilpa srikal. Elos tia akos ma sap lal,

57 A elos forla liki God ac tia pwaye nunak lalos nu sel, oapana mwet matu lalos meet ah; Elos sesuwos oana soko sukan pisr kururu.

58 Elos arulana akkasrkusrakye God ke nien alu lalos Ac ke ma sruloala lalos.

59 God El arulana mulat ke El liye ma inge, Ac El sisla na pwaye mwet Israel.

60 God El som liki lohm nuknuk sel in Shiloh, Lohm se su El muta loac inmasrlosr.

61 El lela tuh mwet lokoalok lasr in sruokya Tuptup in Wuleang, Su akilenyen ku ac wolana lal.

62 El arulana toasr sin mwet lal Ac El lela tuh elos in anwuki sin mwet lokoalok lalos.

63 Mukul fusr elos misa ke mweun, Ac mutan fusr uh wangin mwet elos in payuk se.

64 Mwet tol elos anwuki, Na tia lela tuh katinmas kialos in eoksra.

65 Na Leum El sifil ngutalik oana mwet se su motul ngutalik — El oana sie mukul fokoko su pirikyukyak ke sripen wain.

66 Na El ukwauk mwet lokoalok ac kutangulosla, Pwanang elos mwekinla nwe tok.

67 Tusruk El sisla sruf lal Joseph, Ac El tia sulela sruf lal Ephraim.

68 A El sulela sruf lal Judah, Oayapa Eol Zion, su El arulana lungse.

69 El musaela Tempul lal ingo, In oana lohm sel inkusrao. El oru in okak ac ku, oana faclu, Su oakwuki nwe tok.

70 God El sulella David, mwet kulansap lal, Su El usalu liki inima,

71 Acn el muta liyaung sheep we, Ac El oru tuh elan tokosra fin Israel — Elan oana sie mwet shepherd lun mwet lun God.

72 Ouinge David el liyalosyang ke inse pwaye Ac ke pah in nunak lal, el kololos.