Psalm 77

1 [Psalm lal Asaph] Nga wowoyak tung nu sin God, Nga tung ke pusra lulap ac El porongeyu.

2 In pacl in ongoiya, nga pre nu sin Leum, Ke fong nufon nga sralak pouk in pre, Tusruktu nga tia ku in konauk misla.

3 Ke nga esamak God, nga oela, Ac ke nga nunku yohk kacl, insiuk munasla.

4 El oru tuh ngan ngetnget ke fong fon. Yokna mwe tukulkul in nunak luk, ac nga tia etu lah mea nga ac fahk.

5 Nga nunku ke len pus somla, Ac esamak yac puspis in pacl oemeet ah.

6 Nga ngetnget ke fong nufon ke sripen nunak luk. Nga nunak, ac pa inge ma nga siyuk sik sifacna:

7 “Ya Leum El ac siskutlana? Ya El ac fah tiana sifil insewowo sesr?

8 Ya El tila lungse kut? Ya El ac tiana akpwayeye wuleang lal nu sesr?

9 Ya God El mulkunla in pakoten? Ya kasrkusrak eisla acn sin pakoten?”

10 Na nga fahk, “Ma se nga nunku yohk emeet uh pa inge: Lah ku lun God uh in wanginla.”

11 Nga ac fah esam na orekma yohk lom, O LEUM GOD, Nga ac fah esamak orekma sakirik lom in pacl meet ah.

12 Nga ac fah nunku ke ma nukewa kom tuh oru, Ac nga fah nunku yohk ke orekma ku lom.

13 O God, ma nukewa kom oru, mutal. Wangin pac sie god oana kom.

14 Kom pa God se su orek mwenmen. Kom akkalemye ku lom inmasrlon mutunfacl uh.

15 Ke ku lom kom molela mwet lom, Fwil natul Jacob ac natul Joseph.

16 Ke kof uh liye kom, O God, elos sangeng, Ac acn loal in meoa uh rarrar.

17 Pukunyeng uh okoala af, Pulahl kas yen engyeng uh, Ac sarom sarmelik nu yen nukewa.

18 Pusren pulahl lulap lom ngirla, Ac kalmen sarom sarmelik fin faclu, Ac faclu rarrar ac kusrusrsrusr.

19 Kom fahsr sasla in noa uh Ac tupalla kof loal meoa, A falkom tiana ku in liyeyuk.

20 Ke kolyuk lun Moses ac Aaron, Kom kolla mwet lom oana sie shepherd.