Psalm 49

1 [Psalm Lun Tulik Natul Korah] Lohng ma inge, kowos nukewa! Porongo, kowos mwet in acn nukewa —

2 Mwet fulat ac mwet srisrik oana sie, Mwet kasrup ac oayapa mwet sukasrup.

3 Nunak luk ac fah kalem; Nga ac fah kaskas ke kas in lalmwetmet.

4 Nga fah nunku ke soakas uh, Ac aketeya kalmac ke nga srital ke harp uh.

5 Nga tia sangeng in pacl in ongoiya Ke mwet lokoalok elos rauniyula,

6 Ku ke mwet koluk, su lulalfongi na ke mwe kasrup lalos, Elos ac konkin ke ma puspis lalos.

7 Sie mwet tia ku in sifacna molella; El tia ku in moli nu sin God ke moul lal,

8 Mweyen molin moul lun sie mwet arulana yokla. Ma el ac sang moli an tia ku in fal

9 In sang molella liki misa, Tuh elan ku in moul nwe tok.

10 Mwet nukewa ku in liye pac lah finne mwet lalmwetmet, elos ac misa pac, Oapana mwet lalfon ac mwet lofong. Elos nukewa ac misa ac filiya mwe kasrup lalos nu sin fwilin tulik natulos.

11 Kulyuk lalos pa lohm selos nu tok ma pahtpat; Pa ingan nien muta lalos nwe tok, Finne tuh oasr acn lalos sifacna meet.

12 Fulat lun sie mwet tia ku in sruokilya liki misa; El ac misa pacna, oana ma orakrak nukewa.

13 Liye ma sikyak nu selos su lulalfongi kaclos sifacna, Liye saflaiyalos su pwayekin mwe kasrup lalos —

14 Elos ac misa pac oana sheep uh, Na Misa pa ac fah shepherd lalos. Mwet suwoswos elos fah kutangulosla, Ke manolos sa na kulawi In facl lun mwet misa, loesla liki acn selos. (Sheol h7585)

15 Tusruktu God El ac fah moliyula; El fah moliyula liki ku lun misa. (Sheol h7585)

16 Nik kom supwarla sie mwet el fin kasrupi, Ku mwe kasrup lal fin yokelik na;

17 El tia ku in us ma ingan ke el misa; Mwe kasrup lal tia ku in welul.

18 Mwet se finne insewowo in moul lal pacl inge, Ac kaksakinyuk el ke sripen el mwet eteyuk se,

19 El ac fah weang pacna mwet matu lal su misa meet, Ac som nu in acn lohsr ma pahtpat.

20 Fulat lun sie mwet tia ku in sruokilya liki misa; El ac nuna misa pacna, oana ma orakrak nukewa.