Psalm 145

1 [Psalm lal David] Nga fah fahkak fulatlana lom, God luk a tokosra luk; Nga fah sot kulo nu sum nu tok ma pahtpat.

2 Nga fah sot kulo nu sum len nukewa; Nga fah kaksakin kom nu tok ma pahtpat.

3 LEUM GOD El fulat, ac fal in arulana kaksakinyuk; Fulat lal arulana yohk liki ma kut ku in kalem kac.

4 Orekma lom ac fah kaksakinyuk sin fwil nu ke fwil; Elos ac fah fahkak orekma ku lom.

5 Elos ac fah srumun ke wolana ac wal lom, Ac nga fah nunku yohk ke orekma wolana lom.

6 Mwet uh ac fah srumun ke orekma ku lom; Ac nga fah fahkak ke fulat lom.

7 Elos ac fah sulkakin yokiyen wo lom, Ac onkakin kulang lom.

8 LEUM GOD El kulang ac pakoten, El paht in mulat ac el sesseslana ke lungkulang.

9 El wo nu sin mwet nukewa Ac pakoten lal oan fin ma nukewa El orala.

10 O LEUM GOD, ma orekla lom nukewa fah kaksakin kom, Ac mwet lom nukewa fah sot kulo nu sum.

11 Elos fah kaskaskin wolana ke ku lun tokosrai lom, Ac fahkak ku lom,

12 Tuh mwet nukewa fah etu ke orekma ku lom Ac ke wolana ac fulat lun tokosrai lom.

13 Tokosrai lom oan ma pahtpat, Ac kom tokosra nwe tok. LEUM GOD El oaru nu ke wuleang lal; El pakoten in ma nukewa El oru.

14 El kasrelos nukewa su muta in ongoiya; Ac El tulokunulosyak nukewa su munasla.

15 Ma moul nukewa nget nu sum in finsrak lalos, Ac kom sang nu selos mwe mongo in pacl elos enenu.

16 Kom sang fal nu selos Ac kom akfalye enenu lun ma nukewa su moul.

17 LEUM GOD El suwoswos in ma nukewa El oru, Ac kulang in orekma lal nukewa.

18 El apkuran nu selos nukewa su pang nu sel, Su pang nu sel ke inse pwaye.

19 El akfalye enenu lalos nukewa su akfulatyal; El lohng pusren tung lalos ac molelosla.

20 El karinganulos nukewa su lungse El, Ac El ac fah kunausla mwet koluk.

21 Nga fah kaksakin LEUM GOD in pacl e nukewa. Lela ma orekla lal nukewa in kaksakin Ine mutal lal nwe tok.