< Psalm 139 >
1 [Psalm lal David] LEUM GOD, kom liyeyu ac eteyu.
2 Kom etu ma nukewa nga oru; Kom ne muta loes likiyu, kom etu nunak luk nukewa.
3 Kom liyeyu lah nga orekma, ku nga mongla; Kom etu mukuikui luk nukewa.
4 Meet liki na nga kaskas, Kom etu tari lah mea nga ac fahk.
5 Kom apinyula ke siska nukewa, Kom karinginyu ke ku lom.
6 Etu lom keik uh arulana yohk, Yohk liki ma nga ku in kalem kac.
7 Nga ac som nu ya in kaingla liki kom? Nga ac kaing nu ya liki ye motom?
8 Nga fin som nu inkusrao, kom oasr we; Nga fin ona infulan misa, kom oasr pac we. (Sheol )
9 Nga finne sokla loesla liki kutulap, Ku muta yen loeslana nu roto,
10 Kom ac oasr pac we in pwenyu, Kom ac oasr pa ingo in kasreyu.
11 Nga ku in siyuk lohsr uh in wikinyula Ku kalem su rauniyula in ekla nu ke fong,
12 Tusruktu, lohsr uh el tia lohsr nu sum, Ac fong uh arulana kalem nu sum, oana len. Lohsr ac kalem oana sie nu sum.
13 Kom lumahla ip nukewa ke monuk; Kom oakiyuwi insien nina kiuk.
14 Nga kaksakin kom mweyen fal mwet uh in sangeng sum. Ma nukewa kom oru, usrnguk ac wolana, Nga etu ouinge ke insiuk nufon.
15 Ke mutawauk in lumweyuk sri keik uh, Ac oakiyuki wo insien nina kiuk, Ke nga kapkapak ingo in lukma, Kom nuna etu lah nga oasr we.
16 Kom tuh liyeyu meet liki nga isusla. Pisen len ma oakiyuki nu sik tuh nga in moul Simla tari in book nutum Meet liki na kais sie ma inge mutawauk.
17 O God, arulana pus nunak lom, Ac arulana upa nu sik in kalem kac.
18 Nga fin oek, pisalos ac pus liki puk uh. Ke nga ngutalik, nga srakna muta yurum.
19 O God, nga kena tuh kom in uniya mwet koluk! Nga arulana kena tuh mwet sulallal in fahsr likiyu.
20 Elos fahk ma koluk keim; Elos fahk kas na koluk lain Inem.
21 O LEUM GOD, nga arulana srungalos su srungakom! Nga kwaselos su tuyak lain Kom.
22 Nga srungalos na pwaye; Nga oakalos mwet lokoalok luk.
23 Liyeyu, O God, ac etu insiuk; Srikeyu, ac konauk nunak luk.
24 Suk lah oasr kutena ma sufal in nga Ac kolyu ke inkanek kawil nu tok.
