Psalm 106

1 Kaksakin LEUM GOD! Sang kulo nu sin LEUM GOD, tuh El wo, Ac lungkulang lal oan ma pahtpat.

2 Su ku in fahk ke ma wo nukewa ma El oru? Su ku in fahk lupan kaksak su fal nu sel?

3 Insewowo elos su liyaung ma sap lal, Su oru ma suwohs pacl e nukewa.

4 Esamyu, LEUM GOD, ke kom kasru mwet lom; Oekyu ke kom ac molela mwet lom.

5 Lela tuh nga in liye kapkapak lun mwet lom Ac wi engan lun mutanfahl lom, Tuh nga in welulos su konkin in pangpang mwet lom.

6 Kut orekma koluk oana mwet matu lasr somla; Kut mwet koluk ac sesuwos.

7 Mwet matu lasr elos tia kalem ke orekma wolana lal in acn Egypt, Elos tia esam pacl puspis ma El akkalemye lungse lal nu selos, Ac elos lain El su Kulana ke sisken Meoa Srusra.

8 Tusruktu El molelosla oana El tuh wulela kac, In akkalemye ku lulap lal.

9 El sang sap lal nu sin Meoa Srusra, Na mu paola; El kolla mwet lal fahla fin acn pao.

10 El molelosla liki inpoun mwet su srungalos; El aksukosokyalos liki mwet lokoalok lalos.

11 A mwet lokoalok lalos walomla in kof uh; Wangin sie selos lula.

12 Na mwet lal elos tufah lulalfongi wuleang lal Ac elos on ac kaksakunul.

13 Tusruktu, elos sa na mulkunla ma El oru; Elos orekma na, tia tupan kas lal.

14 Nunkunma nwakulosla yen mwesis, Ac elos srike God we.

15 Ke ma inge El sang ma elos siyuk kac, Tusruk El supwala pac sie mas upa nu inmasrlolos.

16 In acn mwesis, elos sok sel Moses Ac Aaron, mwet kulansap mutal lun LEUM GOD.

17 Ke ma inge faclu mangelik ac okmulla Dathan, Ac piknilya Abiram ac sou lal.

18 Oayapa e tuku lucng me Ac esukak un mwet koluk su welulos.

19 Elos sang gold ac orala soko cow fusr kac in acn Sinai, Ac elos alu nu ke ma sruloala sac.

20 Ouinge elos aolla wolana lun God Ke luman soko kosro su mongo mah.

21 Elos mulkunla God su molelosla Ke orekma kulana lal in acn Egypt.

22 Fuka lupan wolana ke ma El oru we, Ac mwe lut lulap su El oru sisken Meoa Srusra!

23 Ke God El fahk mu El ac kunausla mwet lal, Na Moses, mwet kulansap su El sulela, el tuyak lainul kac, Ac el sikulya mulat lun God tuh Elan tia kunauselosla.

24 Na elos sisla facl wowo sac, Mweyen elos tia lulalfongi wulela lun God.

25 Elos muta torkaskas in lohm nuknuk selos, Ac tia porongo pusren LEUM GOD.

26 Ke ma inge El fulahk nu selos Lah El ac oru tuh elos in misa yen mwesis uh,

27 Ac akfahsryelik fwil natulos nu inmasrlon mwet pegan, Ac lela elos in misa in acn sin mwetsac.

28 Na in acn Peor elos sifacna eisalosyang in wi alu nu sel Baal, Ac kang mongo ma kisakinyuk nu sin god misa uh.

29 Ouinge elos arulana purakak kasrkusrak lun LEUM GOD ke ma elos oru, Na mas na upa se sikyak inmasrlolos.

30 Na Phinehas el tuyak ac sang kai nu selos su oru ma koluk, Ac mas sac wanginla.

31 Ma se inge mwe esmakin na yohk kacl, Oayapa nu sin fwil nu ke fwil tok uh.

32 Mwet uh sifilpa akkasrkusrakye LEUM GOD sisken kof Meribah, Ac ma inge aktukulkulyel Moses.

33 Elos oru Moses el arulana kasrkusrak Pwanang el kaskas ac tia nunku ke ma el fahk.

34 Elos tiana onela mwet pegan In oana ma LEUM GOD El fahk nu selos.

35 A elos payuk nu selos Ac oru ouiya lun mwet pegan.

36 Mwet lun God elos alu nu ke ma sruloala, Na ma inge kunauselosla.

37 Elos kisakin wen ac acn natulos Tuh in mwe kisa nu sin ma sruloala in facl Canaan.

38 Elos uniya tulik natulos su wangin koluk la, Ac acn we kolukla ke srahn akmas inge.

39 Ouinge elos akfohkfokyalos ke orekma koluk lalos Ac elos tia inse pwaye nu sin God.

40 Ke ma inge LEUM GOD El mulat sin mwet lal; Ac El srungalosla.

41 El fuhlelosyang nu inpoun mwet pegan, Ac mwet lokoalok lalos elos leum faclos.

42 Mwet lokoalok lalos akkeokyalos Ac elos muta ye nununku lalos.

43 Pacl puspis LEUM GOD El molela mwet lal, Tusruktu elos sikalani in lainul Pwanang elos tili in ma koluk.

44 Tusruktu, LEUM GOD El akilen keok lalos Ac porongalos ke elos wowoyak nu sel.

45 Ke sripalos, El esam wuleang lal, Ac ke sripen lungse yohk lal nu selos El pakomutalos ac auliyak.

46 El oru tuh elos su akkohsyelos In pakomutalos.

47 Molikutla, O LEUM GOD lasr, Ac uskutme liki inmasrlon mutunfacl uh, Tuh kut fah fahkak kulo lasr nu sum Ac kaksakin Ine mutal lom.

48 Kaksakin LEUM GOD, God lun Israel; Kaksakunul inge ac nwe tok. Lela mwet nukewa in fahk, “Amen.” Kaksakin LEUM GOD!