Job 40

1 Na LEUM GOD El fahk nu sel Job:

2 “Job, kom orek alein nu sin God Kulana. Mea, kom ac tari misla, ku kom akola in topukyu?”

3 Na Job el topuk LEUM GOD ac fahk, Nga tuh fahk kas na lalfon. Mea nga ac sang topuk kom uh?

4 Nga ac tia sifil srike in fahk kutena ma.

5 Kas luk ah alukela tari ma fal ngan fahk.”

6 Na, LEUM GOD El sifilpa kaskas nu sel Job liki eng upa sac me, ac fahk:

7 “Tuyak oana sie mukul, Ac topuk mwe siyuk luk inge.

8 Ya kom srike in akkalemye mu nga sesuwos — In tuh sutuu sik, a kom pa pwaye uh?

9 Ya kuiyom oana ku luk? Ya pusrem ku in ngirngir in pulahl, oana pusrek?

10 Fin pwaye, tuyak yunikomla ke pwengpeng ac fulat; Nuknukyang ke wal ac ke wolana.

11 Ngetla liye mwet inse fulat uh; Okoaung kasrkusrak lom nu faclos ac akpusiselyalos.

12 Aok, liyalos akwoya, ac kilukunulosi nwe ten; Itungya mwet sulallal uh ingena yen elos tu we an.

13 Puknulosi nufon ye fohk uh; Ac kaprelosi nu in facl sin mwet misa.

14 Na ac nga pa oemeet ac kaksakin kom uh, Ac fahkak lah kom kutangla ke ku lom sifacna.

15 “Nunkuwin ke kosro sulallal Behemoth; Nga pa oralla, ac nga pac pa orekomla. El mongo mah oana cow uh,

16 Tusruktu arulana yohk kuiyal, Ac yohk musul ke manol!

17 Pulal tuyak nu lucng oana soko sak cedar, Ac ku lun nial uh arulana yokla.

18 Sri kacl uh ku oana osra bronze, Ac nial oana polo iron uh.

19 “El pa nga tuh orala oemeet inmasrlon ma orakrak uh! Wanginna ma ku in kutangulla sayen El su oralla.

20 Mah ma el kang uh kap fineol, Yen kosro lemnak uh srital we.

21 El ac oan ye sak ma oasr otoh, Ac wikwik ye loa in acn furarrar uh.

22 El ac wiklana oan ye lulin sak ma oasr otoh, Ac sak willow ma oan pe infacl uh.

23 El tia sangeng ke asrasr lun infacl uh; Ac el ac oakwuk na ke Infacl Jordan ac fwela mutal.

24 Su ac ku in aklohsryela mutal ac sruokilya? Ku sruokya infwacl ke sruhf uh?