Job 33

1 “Inge, Job, lohng akwoya Ma nukewa nga ac fahk nu sum uh.

2 Nga akola in fahk ma oan in nunak luk uh.

3 Kas luk inge nukewa ma ke nunak na pwaye luk, Ac nga ac kaskas na pwaye nu sum.

4 Ngun lun God pa oreyula, ac ase nu sik moul.

5 “Topukyu kom fin ku. Akoela kas in alein lom an.

6 Nga kom oana sie ye mutun God, Kut kewa orekla ke fohk kle.

7 Ke ma inge wangin sripa kom in sangeng sik; Nga ac tia funmweti kom.

8 “Pa inge ma nga lohng kom fahk ah:

9 Kom fahk mu, ‘Wangin ma koluk luk; wangin ma sufal nga orala. Nga nasnas ac wangin mwetik.

10 A God El sifacna sokak sripa lal in akkeokyeyu, Ac oreyu oana sie mwet lokoalok lal.

11 El kapriya niuk ke mwe kapir, Ac tawi mukuikui nukewa luk.’

12 “Tuh nga fahk nu sum Job, kom tafongla. God El fulat liki kutena mwet.

13 Efu ku kom akkolukye God Ac fahk mu El tiana topuk tukak lun mwet uh?

14 God El ne kaskas na kaskas, A wanginna mwet lohang nu ke ma El fahk uh.

15 Ke mwet uh ac motul ke fong uh, God El ac sramsram nu selos ke mweme ac oayapa ke aruruma.

16 El oru elos in lohng ma El fahk, Ac elos sangeng ke kas in sensenkakin lal nu selos uh.

17 God El kaskas in tuh kutongya orekma koluk lalos Ac in molelosla elos in tia inse fulat.

18 El ac fah tia lela in kunausyukla elos; El molelos liki misa.

19 God El aksuwosye sie mwet ke El sang mas nu sel Ac nwakla manol ke waiok.

20 Sie mwet mas ac srungala mongo, Finne mongo ma arulana yu, a ac akkolukye ikwal.

21 Manol ac srila nwe Kom ac ku in liye sri nukewa kacl uh;

22 Ac tia paht el ac som nu in facl sin mwet misa.

23 “Sahp ac oasr lipufan tuku kasrel — Sie sin lipufan tausin lun God, Su akesmakinye mwet uh ke ma kunalos.

24 Ke sripen pakomuta lal, lipufan sac ac fahk, ‘Fuhlella, El ac tia som nu in facl sin mwet misa. Pa inge molin aksukosokyal uh.’

25 Manol ac fah sifil fusri, ac kui;

26 Ke el pre, God El ac fah topkol; El ac fah alu nu sin God ke engan; God El ac fah oru tuh ma nukewa in sifil wola nu sel.

27 El ac fahk ye mutun mwet uh, ‘Nga orekma koluk. Nga tia oru ma wo, tusruktu God El sruokyuwi na ac tia sisyula.

28 El sruokyuwi tuh nga in tia som nu in facl sin mwet misa, Ac inge nga srakna moul.’

29 “God El nuna oru na ouinge pacl nukewa;

30 El ac molela moul lun sie mwet Ac sang nu sel tuh elan arulana engan lah el moul.

31 “Inge, Job, porongo ma nga fahk uh; Misla ac lela ngan kaskas.

32 Tuh fin oasr ma kom lungse fahk, kom fahk nga in lohng; Fin tuh pwaye ma kom fahk an, nga fah insewowo in fahk mu pwaye sum.

33 A fin wangin ma kom ac fahk, kom misla ac porongeyu, Ac nga ac fah luti nu sum in lalmwetmet.”