Job 30

1 “Tusruktu, mwet ma fusr likiyu elos orek tafunkas keik in pacl inge! Papa tumalos uh nuna mwet na wangin sripa emeet me, Oru nga tia pac lela elos in wi kosro ngalngul uh karingin sheep nutik.

2 Un mwet na wanginla ku la, Elos arulana munas ac tia ku in oru kutena orekma luk.

3 Elos arulana sukasrup ac masrinsral, Oru elos ac kontini okan sak pulamlamla uh — Ke fong, in acn na koluk ac wangin mwet we.

4 Elos ac fusak ac kang mah yen mwesis uh Wi pacna okah ma wangin ema ke sak broom uh!

5 Mwet nukewa ac wowoyak ac luselosla Oana ke elos woi mwet pusrapasr uh.

6 Elos mutana in luf, Ac in acn ma pukpukla pe eol uh.

7 In acn mwesis uh elos ac wowo oana kosro lemnak uh, Ac tukeni lokeni muta ye sak inima uh.

8 Sie un mwet na lusrongten, wangin sripa, ac wangin akilenya pa inge! Ukohkyak elos liki fin acn uh.

9 “Inge elos foloko isrunyu; Nga pilasrla — oana sie mwe aksruksruk nu selos.

10 Elos arulana kwaseyu, Ac pangon mu elos wo likiyu. Elos ac tuku pac ani nu in mutuk.

11 Mweyen God El arulana akmunasyeyula ac nga tia ku in sifacna, Oru elos forma lainyu ke folo lalos nufon.

12 Un mwet se inge arulana suwoswos in oru alein lalos nu sik; Elos ukweyu nga kaing; ac elos akola in kunausyula.

13 Elos kosrala acn in kaing luk, ac srike in uniyuwi; Ac wangin mwet in kutongolosi.

14 Elos ac fokolak kalkal ma nga wikwik we, Ac putatme nu fuk ac toanyuwi nu infohk uh.

15 Sangeng luk nwekyula. Nga tila orek mukul, a nga oana sie fosr in eng, Ac kasrpuk sohkla oana sie pukunyeng.

16 “Inge nga apkuran in misa, Ac wangin ma in akfisrasrye keok luk.

17 Ke fong uh sri keik uh nufon waiok, Ac ngal lulap su ngalngalisyu tiana tui.

18 God El sruokya kala in nuknuk luk Ac furokya nwe ke na tingilya kwawuk.

19 El kipakinyuwi nu yen furarrar uh; Ac nga oana fohk furarrar ye mutal.

20 “Nga pang nu sum, O God, tuh kom tiana topukyu; Ac ke pacl nga pre, kom tia lohma nu sik.

21 Kom arulana sulallal nu sik, Ac akkeokyeyu ke kuiyom nufon.

22 Kom lela eng uh in ukyula; Ac kom sisyuwot sisyume ke eng upa uh.

23 Nga etu lah kom ac usyula nu ke misa, Nu ke ouiya su akola nu sin mwet nukewa.

24 Efu ku kom uni sie mwet ma arulana musalla tari, Su wangin ma ku in oru sayen ngisre ke pakomuta?

25 Ya nga tuh tia wi tung yurin mwet su sun ongoiya, Ac pakomutalos su enenu?

26 Nga tuh finsrak in oasr engan ac kalem yuruk, A ongoiya ac lohsr pa sunyu.

27 Insiuk arulana kuelik ke fosrnga ac waiok; Nga muta in keok len nu ke len.

28 Nga foroht forma in lohsr matoltol, yen wangin kalmen faht we; Nga tuyak in walil uh ac siyuk ke kasru.

29 Pusrek asor ac supwar, Oana pusren tung lun soko kosro fox, ku sie won ostrich.

30 Monuk sroalsroalla; ac nga folla ke fifa.

31 Sie pacl ah nga tuh lohng pusren on engan, A inge nga lohng pusren asor ac tung mukena.