Dagiti Salmo 132

1 O Yahweh, lagipem para kenni David dagiti amin a pakarigatanna.

2 Lagipem no kasano a nagsapata isuna kenni Yahweh, ti panagkarina iti Mannakabalin a Dios ni Jacob.

3 Kinunana, “Saanakto a sumrek iti balayko wenno mapan iti pagiddaak,

4 saanakto a maturog wenno aginana

5 aginggana makabirukak iti lugar nga agpaay kenni Yahweh, a tabernakulo para iti Mannakabalin a Dios ni Jacob.”

6 Adtoy, nangngegmi iti maipanggep iti daytoy idiay Efrata; nasarakanmi daytoy kadagiti kataltalonan ti Jaar.

7 Umunegkaminto iti tabernakulo ti Dios; agdayawkaminto iti sakaananna.

8 Tumakderka, O Yahweh; umayka iti pagin-inanaam a lugar.

9 Makawesan koma iti kinatarnaw dagiti papadim; agpukkaw koma iti rag-o dagiti napudno a taom.

10 Para iti adipenmo a ni David, saanmo a tallikodan ti pinulotam nga ari.

11 Nagsapata ni Yahweh nga agbalin a matalek kenni David; saananto a baliwan iti sapatana: “Isaadkonto ti maysa kadagiti kaputotam iti tronom.

12 No salimetmetan dagiti annakmo ti tulag ken dagiti lintegko nga isurokto kadakuada, agtugawto met dagiti annakda iti tronom iti agnanayon nga awan patinggana.”

13 Pudno a pinili ni Yahweh ti Sion; tinarigagayanna isuna a pagnaedanna.

14 Daytoy ti lugar a paginanaak iti agnanayon, agnaedakto ditoy, ta tarigagayak isuna.

15 Aglaplapusananto a bendisionak isuna iti pakasapulanna; pennekekto iti tinapay dagiti nakurapayna.

16 Kawesakto dagiti papadina iti pannakaisalakan; agpukkawto dagiti napudno a tattaona iti napigsa gapu iti rag-o.

17 Sadiay, patuboekto ti sara ni David; nangikabilak sadiay iti pagsilawan para iti pinulotak.

18 Kawesakto dagiti kabusorna iti bain, ngem agraniagto ti balangatna.