Numero 33

1 Dagitoy dagiti panagdaliasat dagiti tattao ti Israel kalpasan a pimmanawda ti daga ti Egipto segun kadagiti bunggoy dagiti armadada iti panangidaulo ni Moises ken ni Aaron.

2 Insurat ni Moises dagiti lugar a naggapgappoanda agingga iti napananda, a kas imbilin ni Yahweh. Dagitoy dagiti panagdaliasatda, segun kadagiti panagakar-akarda.

3 Nagdaliasatda manipud Rameses bayat iti umuna a bulan, nagrubwatda iti maika-15 nga aldaw ti umuna a bulan. Iti agsapa kalpasan ti Ilalabas, siwayawaya a nagrubwat dagiti tattao ti Israel iti imatang dagiti amin nga Egipcio.

4 Napasamak daytoy bayat nga itabtabon idi dagiti Egipcio dagiti inauna nga annakda a pinatay ni Yahweh kadakuada, ta inyegna met ti dusa kadagiti diosda.

5 Nagrubwat dagiti tattao ti Israel manipud Rameses ket nagkampoda idiay Succot.

6 Nagrubwatda manipud Succot ket nagkampoda idiay Etam, iti pungto ti let-ang.

7 Nagrubwatda manipud Etam ket nanglikawda idiay Pi-hahirot, a sango ti Baalsefon, a nagkampoanda iti sango ti Migdol.

8 Ket nagrubwatda manipud iti sango ti Pi-hahirot ket limmasatda iti tengnga ti baybay agingga iti let-ang. Nagdaliasatda iti tallo nga aldaw iti let-ang ti Etam, ket nagkampoda idiay Mara.

9 Nagrubwatda manipud Mara ket simmangpetda idiay Elim. Idiay Elim, nga ayan ti sangapulo ket dua nga ubbog ken pitupulo a kaykayo ti palma. Isu ti nagkampoanda.

10 Nagrubwatda manipud Elim ket nagkampoda iti igid ti baybay dagiti Runo.

11 Nagrubwatda manipud iti baybay dagiti Runo ket nagkampoda idiay let-ang ti Sin.

12 Nagrubwatda manipud iti let-ang ti Sin ket nagkampoda idiay Dofia.

13 Nagrubwatda manipud Dofia ket nagkampoda idiay Alus.

14 Nagrubwatda manipud Alus ket nagkampoda idiay Refidim, a no sadino ket awan ti masarakanda a danum nga inumen dagiti tattao.

15 Nagrubwatda manipud Refidim ket nagkampoda idiay let-ang ti Sinai.

16 Nagrubwatda manipud iti let-ang ti Sinai ket nagkampoda idiay Kibrot-hataava.

17 Nagrubwatda manipud Kibrot-haatava ket nagkampoda iti Haserot.

18 Nagrubwatda manipud Haserot ket nagkampoda idiay Ritma.

19 Nagrubwatda manipud Ritma ket nagkampoda idiay Rimmon-peres.

20 Nagrubwatda manipud Rimmon-peres ket nagkampoda idiay Libna.

21 Nagrubwatda manipud Libna ket nagkampoda idiay Rissa.

22 Nagrubwatda manipud Rissah ket nagkampoda idiay Ceelata.

23 Nagrubwatda manipud Ceelata ket nagkampoda idiay Bantay Sefer.

24 Nagrubwatda manipud iti Bantay Sefer ket nagkampoda idiay Harada.

25 Nagrubwatda manipud Harada ket nagkampoda idiay Maselot.

26 Nagrubwatda manipud Maselot ket nagkampoda idiay Tahat.

27 Nagrubwatda manipud Tahat ket nagkampoda idiay Tera.

28 Nagrubwatda manipud Tera ket nagkampoda idiay Mitka.

29 Nagrubwatda manipud Mitka ket nagkampoda idiay Hasmona.

30 Nagrubwatda manipud Hasmona ket nagkampoda idiay Moserot.

31 Nagrubwatda manipud Moserot ket nagkampoda idiay Bene-jaakan.

32 Nagrubwatda manipud Bene-jaakan ket nagkampoda idiay Hor Hagidgad.

33 Nagrubwatda manipud Hor Hagidgad ket nagkampoda idiay Jotbata.

34 Nagrubwatda manipud Jotbata ket nagkampoda idiay Abrona.

35 Nagrubwatda manipud Abrona ket nagkampoda idiay Esion-geber.

36 Nagrubwatda manipud Esion-geber ket nagkampoda iti let-ang ti Sin idiay Kades.

37 Nagrubwatda manipud Kades ket nagkampoda idiay Bantay Hor, iti pungto ti daga ti Edom.

38 Simmang-at ni Aaron a padi iti bantay Hor iti bilin ni Yahweh ket natay isuna sadiay iti maika-40 a tawen kalpasan iti ipapanaw dagiti tattao ti Israel iti Egipto, iti maika- 5 a bulan, iti umuna nga aldaw ti bulan.

39 Agtawen ti 123 ni Aaron idi natay isuna idiay Bantay Hor.

40 Ti Cananeo nga ari ti Arad nga agnanaed iti akin-abagatan a let-ang iti daga ti Caanan, ket nangngegna ti idadateng dagiti tattao ti Israel.

41 Nagrubwatda manipud iti bantay Hor ket nagkampoda idiay Salmona.

42 Nagrubwatda manipud Salmona ket nagkampoda idiay Punon.

43 Nagrubwatda manipud Punon ket nagkampoda idiay Obot.

44 Nagrubwatda manipud Obot ket nagkampoda idiay Ige-abarim, idiay beddeng ti Moab.

45 Nagrubwatda manipud Ige-abarim ket nagkampoda idiay Dibon-gad.

46 Nagrubwatda manipud Dibon-gad ket nagkampoda idiay Almon-diblataim.

47 Nagrubwatda manipud Almon-diblataim ket nagkampoda kadagiti bantay ti Abarim a sangoanan ti Nebo.

48 Nagrubwatda manipud kadagiti bantay ti Abarim ket nagkampoda kadagiti patad ti Moab iti igid ti Jordan idiay Jerico.

49 Nagkampoda iti igid ti Jordan, manipud Beth-jesimot agingga idiay Abel Shittim kadagiti patad iti Moab.

50 Nagsao ni Yahweh kenni Moises kadagiti patad ti Moab iti igid ti Jordan idiay Jerico ket kinunana,

51 “Agsaoka kadagiti tattao ti Israel ket ibagam kadakuada, 'Inton bummallasiwkayo iti Jordan iti daga ti Canaan,

52 ket masapul a papanawenyo dagiti amin nga agnanaed iti daga iti sangoananyo. Masapul a dadaelenyo dagiti amin a nakitikitan a ladawanda. Masapul a dadaelenyo amin a nasukog a ladawanda ken rebbaenyo amin dagiti nangangato a dissoda.

53 Masapul a tagikauenyo ti daga ket agnaedkayo iti daytoy, gapu ta intedko ti daga a tagikuaenyo.

54 Masapul a tawidenyo ti daga babaen ti panaggiginnasat segun iti tunggal puli. Masapul nga itedyo ti dakdakkel a bingay ti daga kadagiti dakdakkel a puli, ken itedyo ti basbassit a bingay ti daga kadagiti basbassit a puli. Sadinoman a pagbatugan iti maipallangato iti tunggal puli, kukuanto daytoy a puli dayta a daga. Tawidenyonto ti daga segun kadagiti tribu dagiti kapuonanyo.

55 Ngem no saanyo a papanawen dagiti agnanaed iti daga iti sangoananyo, ket agbalinto a makasulek kadagiti matayo ken sisiit kadagiti bakrangyo dagiti tattao a palubosanyo nga agtalinaed. Parigatendanto dagiti biagyo iti daga a pagnaedanyo.

56 Ket mapasamakto nga aniaman a panggepek nga aramiden kadagitoy a tattao, aramidekto met kadakayo.'