Abụ Ọma 82

1 Abụ Ọma Asaf. Chineke na-ewere ọnọdụ ịchị isi nʼetiti ọgbakọ dị ukwuu; ọ na-ekpebi ikpe nʼetiti chi niile.

A Psalm by Asaph. God presides in the great assembly. He judges amongst the gods.

2 Ruo ole mgbe ka unu ga-anọgide na-ekpe ikpe na-ezighị ezi? Ruo ole mgbe ka unu ga na-egosi ndị ajọ omume ihuọma? (Sela)

“How long will you judge unjustly, and show partiality to the wicked?” (Selah)

3 Kperenụ ndị na-adịghị ike na ndị na-enweghị nna ikpe ziri ezi; hụnụ na ndị ogbenye na ndị a na-emegbu nwetara ihe ruuru ha.

“Defend the weak, the poor, and the fatherless. Maintain the rights of the poor and oppressed.

4 Gbapụtanụ ndị na-adịghị ike na ndị nọ na mkpa; napụta ha site nʼaka ndị ajọ omume.

Rescue the weak and needy. Deliver them out of the hand of the wicked.”

5 Ha amaghị ihe ọbụla, ha aghọtaghị ihe ọbụla. Ha na-ejegharị nʼọchịchịrị; ntọala niile nke ụwa na-ama jijiji.

They don’t know, neither do they understand. They walk back and forth in darkness. All the foundations of the earth are shaken.

6 “Asịrị m, ‘Unu bụ “chi,” unu niile bụ ụmụ ndị ikom nke Onye kachasị ihe niile elu.’

I said, “You are gods, all of you are sons of the Most High.

7 Ma unu ga-anwụ ọnwụ dịka mmadụ ndị ọzọ; unu ga-ada dịka ndị ọchịchị ọzọ.”

Nevertheless you shall die like men, and fall like one of the rulers.”

8 O Chineke, bilie kpee ụwa ikpe, nʼihi na mba niile bụ ihe nketa gị.

Arise, God, judge the earth, for you inherit all of the nations.