Abụ Ọma 118
1 Keleenụ Onyenwe anyị nʼihi na ọ dị mma; ịhụnanya ya na-adịgide ruo mgbe ebighị ebi.
| הודו ליהוה כי טוב כי לעולם חסדו׃ |
2 Ka ụmụ Izrel kwupụta nʼonwe ha sị, “Ịhụnanya ya na-adịgide ruo mgbe ebighị ebi.”
| יאמר נא ישראל כי לעולם חסדו׃ |
3 Ka ndị ezinaụlọ Erọn kwuokwa sị, “Ịhụnanya ya na-adịgide ruo mgbe ebighị ebi.”
| יאמרו נא בית אהרן כי לעולם חסדו׃ |
4 Ka ndị niile na-atụ egwu Onyenwe anyị kwuo sị, “Ịhụnanya ya na-adịgide ruo mgbe ebighị ebi.”
| יאמרו נא יראי יהוה כי לעולם חסדו׃ |
5 Nʼọnọdụ oke ihe mgbu m, akpọkuru m Onyenwe anyị, ọ zara m, mee ka m nwere onwe m.
| מן המצר קראתי יה ענני במרחב יה׃ |
6 Onyenwe anyị nọnyeere m, agaghị m atụ egwu. Gịnị ka mmadụ pụrụ ime m?
| יהוה לי לא אירא מה יעשה לי אדם׃ |
7 Onyenwe anyị nọnyere m; ọ bụ onye na-enyere m aka. Aga m ele ndị iro m anya na mmeri.
| יהוה לי בעזרי ואני אראה בשנאי׃ |
8 Ọ kachasị mma ịgbaba nʼime Onyenwe anyị karịa ịtụkwasị ụmụ mmadụ obi.
| טוב לחסות ביהוה מבטח באדם׃ |
9 Ọ kachasị mma ịgbaba nʼime Onyenwe anyị karịa ịtụkwasị ndị amara aha ha obi.
| טוב לחסות ביהוה מבטח בנדיבים׃ |
10 Mba niile gbara m gburugburu ma site nʼaha Onyenwe anyị aga m ala ha nʼiyi.
| כל גוים סבבוני בשם יהוה כי אמילם׃ |
11 Ha gbara m gburugburu, ma site nʼaha Onyenwe anyị ka m na-egbuda ha.
| סבוני גם סבבוני בשם יהוה כי אמילם׃ |
12 Ha gbara m gburugburu dịka aṅụ, ma e menyụọla ha dịka ogwu na-ere ọkụ; site nʼaha Onyenwe anyị, ka m na-egbuda ha.
| סבוני כדבורים דעכו כאש קוצים בשם יהוה כי אמילם׃ |
13 Akwaghachiri m azụ, agaara m ada, ma Onyenwe anyị nyere m aka.
| דחה דחיתני לנפל ויהוה עזרני׃ |
14 Onyenwe anyị bụ ike m na abụ m; ọ ghọọla nzọpụta m.
| עזי וזמרת יה ויהי לי לישועה׃ |
15 Olu iti mkpu ọṅụ na mmeri na-ada nʼime ụlọ ikwu ndị ezi omume: “Aka nri Onyenwe anyị emeela ọtụtụ ihe dị ukwuu!
| קול רנה וישועה באהלי צדיקים ימין יהוה עשה חיל׃ |
16 Aka nri Onyenwe anyị bụ ihe e weliri elu; aka nri Onyenwe anyị emeela ọtụtụ ihe dị ukwuu!”
| ימין יהוה רוממה ימין יהוה עשה חיל׃ |
17 Agaghị m anwụ, kama aga m adị ndụ kwusaara ndị ọzọ ọrụ ebube Onyenwe anyị rụrụ.
| לא אמות כי אחיה ואספר מעשי יה׃ |
18 Onyenwe anyị tara m ahụhụ nke ukwuu, ma o nyefeeghị m nʼaka ọnwụ.
| יסר יסרני יה ולמות לא נתנני׃ |
19 Megheere m ọnụ ụzọ ama nke ezi omume; aga m abanye nye Onyenwe anyị ekele.
| פתחו לי שערי צדק אבא בם אודה יה׃ |
20 Nke a bụ ọnụ ụzọ ụlọnsọ Onyenwe anyị, ebe ndị ezi omume ga-esite na ya banye.
| זה השער ליהוה צדיקים יבאו בו׃ |
21 Aga m enye gị ekele, nʼihi na ị zara m; ị ghọọla nzọpụta m.
| אודך כי עניתני ותהי לי לישועה׃ |
22 Nkume ahụ ndị na-ewu ụlọ jụrụ, aghọọla nkume isi ntọala ụlọ;
| אבן מאסו הבונים היתה לראש פנה׃ |
23 nke a bụ ọrụ aka Onyenwe anyị, ọ bụkwa ihe ịtụnanya nʼanya anyị.
| מאת יהוה היתה זאת היא נפלאת בעינינו׃ |
24 Nke a bụ ụbọchị Onyenwe anyị anyị mere, ka anyị ṅụrịa ọṅụ, nweekwa obi ụtọ nʼime ya.
| זה היום עשה יהוה נגילה ונשמחה בו׃ |
25 O Onyenwe anyị, zọpụta anyị; o Onyenwe anyị, mee ka ihe gaara anyị nke ọma.
| אנא יהוה הושיעה נא אנא יהוה הצליחה נא׃ |
26 Onye a gọziri agọzi ka onye ahụ bụ, nke na-abịa nʼaha Onyenwe anyị. Anyị sitere nʼụlọ Onyenwe anyị na-agọzi gị.
| ברוך הבא בשם יהוה ברכנוכם מבית יהוה׃ |
27 Onyenwe anyị bụ Chineke, ọ bụ ya mere ka ìhè ya mụkwasị anyị. Chịrị igu nkwụ nʼaka gị, soro ndị ji ọṅụ bata nʼogige Chineke bịaruo nʼebe ịchụ aja.
| אל יהוה ויאר לנו אסרו חג בעבתים עד קרנות המזבח׃ |
28 Ị bụ Chineke m, aga m eto gị; ị bụ Chineke m, aga m ebuli gị elu.
| אלי אתה ואודך אלהי ארוממך׃ |
29 Keleenụ Onyenwe anyị nʼihi na ọ dị mma, ịhụnanya ya na-adịgide ruo mgbe ebighị ebi.
| הודו ליהוה כי טוב כי לעולם חסדו׃ |
