Sálmarnir 75

1 Þökk sé þér Drottinn! Máttarverk þín staðfesta umhyggju þína.

2 „Já, “svarar Drottinn, „og þegar stundin er komin mun ég refsa öllum illgjörðamönnum!

3 Þótt jörðin nötri og íbúar hennar skjálfi af ótta, eru undirstöður hennar traustar, enda verk handa minna!“

4 Ég sagði hinum hrokafullu að láta af drambi sínu og illmennunum að hætta sínum ögrandi augnagotum,

5 að láta af þrjósku og hroka.

6 Velgengni og völd getur enginn þakkað sér sjálfum,

7 allt eru það gjafir frá Guði. Hann upphefur einn, en niðurlægir annan.

8 Drottinn heldur á bikar fullum af freyðandi víni – það er dómurinn gegn illmennum heimsins. Þau skulu drekka hann í botn!

9 En ég mun vegsama Guð um aldur og ævi.

10 Styrkur hinna óguðlegu verður að engu, en réttlátir skulu ríkja með reisn.