תהילים 87

1 לבני קרח מזמור שיר יסודתו בהררי קדש׃

לִבְנֵי־קֹרַח מִזְמוֹר שִׁיר יְסוּדָתוֹ בְּהַרְרֵי־קֹֽדֶשׁ׃

2 אהב יהוה שערי ציון מכל משכנות יעקב׃

אֹהֵב יְהֹוָה שַׁעֲרֵי צִיּוֹן מִכֹּל מִשְׁכְּנוֹת יַעֲקֹֽב׃

3 נכבדות מדבר בך עיר האלהים סלה׃

נִכְבָּדוֹת מְדֻבָּר בָּךְ עִיר הָאֱלֹהִים סֶֽלָה׃

4 אזכיר רהב ובבל לידעי הנה פלשת וצור עם כוש זה ילד שם׃

אַזְכִּיר ׀ רַהַב וּבָבֶל לְֽיֹדְעָי הִנֵּה פְלֶשֶׁת וְצֹר עִם־כּוּשׁ זֶה יֻלַּד־שָֽׁם׃

5 ולציון יאמר איש ואיש ילד בה והוא יכוננה עליון׃

וּלְצִיּוֹן ׀ יֵאָמַר אִישׁ וְאִישׁ יֻלַּד־בָּהּ וְהוּא יְכוֹנְנֶהָ עֶלְיֽוֹן׃

6 יהוה יספר בכתוב עמים זה ילד שם סלה׃

יְֽהֹוָה יִסְפֹּר בִּכְתוֹב עַמִּים זֶה יֻלַּד־שָׁם סֶֽלָה׃

7 ושרים כחללים כל מעיני בך׃

וְשָׁרִים כְּחֹלְלִים כׇּֽל־מַעְיָנַי בָּֽךְ׃