איוב 13

1 הן כל ראתה עיני שמעה אזני ותבן לה׃

הֶן־כֹּל רָאֲתָה עֵינִי שָֽׁמְעָה אׇזְנִי וַתָּבֶן לָֽהּ׃

2 כדעתכם ידעתי גם אני לא נפל אנכי מכם׃

כְּֽדַעְתְּכֶם יָדַעְתִּי גַם־אָנִי לֹֽא־נֹפֵל אָנֹכִי מִכֶּֽם׃

3 אולם אני אל שדי אדבר והוכח אל אל אחפץ׃

אוּלָם אֲנִי אֶל־שַׁדַּי אֲדַבֵּר וְהוֹכֵחַ אֶל־אֵל אֶחְפָּֽץ׃

4 ואולם אתם טפלי שקר רפאי אלל כלכם׃

וְֽאוּלָם אַתֶּם טֹפְלֵי־שָׁקֶר רֹפְאֵי אֱלִל כֻּלְּכֶֽם׃

5 מי יתן החרש תחרישון ותהי לכם לחכמה׃

מִי־יִתֵּן הַחֲרֵשׁ תַּחֲרִישׁוּן וּתְהִי לָכֶם לְחׇכְמָֽה׃

6 שמעו נא תוכחתי ורבות שפתי הקשיבו׃

שִׁמְעוּ־נָא תוֹכַחְתִּי וְרִבוֹת שְׂפָתַי הַקְשִֽׁיבוּ׃

7 הלאל תדברו עולה ולו תדברו רמיה׃

הַלְאֵל תְּדַבְּרוּ עַוְלָה וְלוֹ תְּֽדַבְּרוּ רְמִיָּֽה׃

8 הפניו תשאון אם לאל תריבון׃

הֲפָנָיו תִּשָּׂאוּן אִם־לָאֵל תְּרִיבֽוּן׃

9 הטוב כי יחקר אתכם אם כהתל באנוש תהתלו בו׃

הֲטוֹב כִּֽי־יַחְקֹר אֶתְכֶם אִם־כְּהָתֵל בֶּאֱנוֹשׁ תְּהָתֵלּוּ בֽוֹ׃

10 הוכח יוכיח אתכם אם בסתר פנים תשאון׃

הוֹכֵחַ יוֹכִיחַ אֶתְכֶם אִם־בַּסֵּתֶר פָּנִים תִּשָּׂאֽוּן׃

11 הלא שאתו תבעת אתכם ופחדו יפל עליכם׃

הֲלֹא שְׂאֵתוֹ תְּבַעֵת אֶתְכֶם וּפַחְדּוֹ יִפֹּל עֲלֵיכֶֽם׃

12 זכרניכם משלי אפר לגבי חמר גביכם׃

זִֽכְרֹנֵיכֶם מִשְׁלֵי־אֵפֶר לְגַבֵּי־חֹמֶר גַּבֵּיכֶֽם׃

13 החרישו ממני ואדברה אני ויעבר עלי מה׃

הַחֲרִישׁוּ מִמֶּנִּי וַאֲדַבְּרָה־אָנִי וְיַעֲבֹר עָלַי מָֽה׃

14 על מה אשא בשרי בשני ונפשי אשים בכפי׃

עַל־מָה ׀ אֶשָּׂא בְשָׂרִי בְשִׁנָּי וְנַפְשִׁי אָשִׂים בְּכַפִּֽי׃

15 הן יקטלני לא איחל אך דרכי אל פניו אוכיח׃

הֵן יִקְטְלֵנִי (לא) [לוֹ] אֲיַחֵל אַךְ־דְּרָכַי אֶל־פָּנָיו אוֹכִֽיחַ׃

16 גם הוא לי לישועה כי לא לפניו חנף יבוא׃

גַּם־הוּא־לִי לִישׁוּעָה כִּי־לֹא לְפָנָיו חָנֵף יָבֽוֹא׃

17 שמעו שמוע מלתי ואחותי באזניכם׃

שִׁמְעוּ שָׁמוֹעַ מִלָּתִי וְאַחֲוָתִי בְּאׇזְנֵיכֶֽם׃

18 הנה נא ערכתי משפט ידעתי כי אני אצדק׃

הִנֵּה־נָא עָרַכְתִּי מִשְׁפָּט יָדַעְתִּי כִּי־אֲנִי אֶצְדָּֽק׃

19 מי הוא יריב עמדי כי עתה אחריש ואגוע׃

מִי־הוּא יָרִיב עִמָּדִי כִּֽי־עַתָּה אַחֲרִישׁ וְאֶגְוָֽע׃

20 אך שתים אל תעש עמדי אז מפניך לא אסתר׃

אַךְ־שְׁתַּיִם אַל־תַּעַשׂ עִמָּדִי אָז מִפָּנֶיךָ לֹא אֶסָּתֵֽר׃

21 כפך מעלי הרחק ואמתך אל תבעתני׃

כַּפְּךָ מֵעָלַי הַרְחַק וְאֵמָתְךָ אַֽל־תְּבַעֲתַֽנִּי׃

22 וקרא ואנכי אענה או אדבר והשיבני׃

וּקְרָא וְאָנֹכִי אֶעֱנֶה אֽוֹ־אֲדַבֵּר וַהֲשִׁיבֵֽנִי׃

23 כמה לי עונות וחטאות פשעי וחטאתי הדיעני׃

כַּמָּה לִי עֲוֺנוֹת וְחַטָּאוֹת פִּֽשְׁעִי וְחַטָּאתִי הֹדִיעֵֽנִי׃

24 למה פניך תסתיר ותחשבני לאויב לך׃

לָֽמָּה־פָנֶיךָ תַסְתִּיר וְתַחְשְׁבֵנִי לְאוֹיֵב לָֽךְ׃

25 העלה נדף תערוץ ואת קש יבש תרדף׃

הֶעָלֶה נִדָּף תַּעֲרוֹץ וְאֶת־קַשׁ יָבֵשׁ תִּרְדֹּֽף׃

26 כי תכתב עלי מררות ותורישני עונות נעורי׃

כִּֽי־תִכְתֹּב עָלַי מְרֹרוֹת וְתוֹרִישֵׁנִי עֲוֺנוֹת נְעוּרָֽי׃

27 ותשם בסד רגלי ותשמור כל ארחותי על שרשי רגלי תתחקה׃

וְתָשֵׂם בַּסַּד ׀ רַגְלַי וְתִשְׁמוֹר כׇּל־אׇרְחוֹתָי עַל־שׇׁרְשֵׁי רַגְלַי תִּתְחַקֶּֽה׃

28 והוא כרקב יבלה כבגד אכלו עש׃

וְהוּא כְּרָקָב יִבְלֶה כְּבֶגֶד אֲכָלוֹ עָֽשׁ׃