איוב 11

1 ויען צפר הנעמתי ויאמר׃

וַיַּעַן צֹפַר הַֽנַּעֲמָתִי וַיֹּאמַֽר׃

2 הרב דברים לא יענה ואם איש שפתים יצדק׃

הֲרֹב דְּבָרִים לֹא יֵעָנֶה וְאִם־אִישׁ שְׂפָתַיִם יִצְדָּֽק׃

3 בדיך מתים יחרישו ותלעג ואין מכלם׃

בַּדֶּיךָ מְתִים יַחֲרִישׁו וַתִּלְעַג וְאֵין מַכְלִֽם׃

4 ותאמר זך לקחי ובר הייתי בעיניך׃

וַתֹּאמֶר זַךְ לִקְחִי וּבַר הָיִיתִי בְעֵינֶֽיךָ׃

5 ואולם מי יתן אלוה דבר ויפתח שפתיו עמך׃

וְֽאוּלָם מִֽי־יִתֵּן אֱלוֹהַּ דַּבֵּר וְיִפְתַּח שְׂפָתָיו עִמָּֽךְ׃

6 ויגד לך תעלמות חכמה כי כפלים לתושיה ודע כי ישה לך אלוה מעונך׃

וְיַגֶּד־לְךָ ׀ תַּֽעֲלֻמוֹת חָכְמָה כִּֽי־כִפְלַיִם לְֽתוּשִׁיָּה וְדַע כִּֽי־יַשֶּׁה לְךָ אֱלוֹהַ מֵעֲוֺנֶֽךָ׃

7 החקר אלוה תמצא אם עד תכלית שדי תמצא׃

הַחֵקֶר אֱלוֹהַ תִּמְצָא אִם עַד־תַּכְלִית שַׁדַּי תִּמְצָֽא׃

8 גבהי שמים מה תפעל עמקה משאול מה תדע׃ (Sheol h7585)

גָּבְהֵי שָׁמַיִם מַה־תִּפְעָל עֲמֻקָּה מִשְּׁאוֹל מַה־תֵּדָֽע׃ (Sheol h7585)

9 ארכה מארץ מדה ורחבה מני ים׃

אֲרֻכָּה מֵאֶרֶץ מִדָּהּ וּרְחָבָה מִנִּי־יָֽם׃

10 אם יחלף ויסגיר ויקהיל ומי ישיבנו׃

אִם־יַחֲלֹף וְיַסְגִּיר וְיַקְהִיל וּמִי יְשִׁיבֶֽנּוּ׃

11 כי הוא ידע מתי שוא וירא און ולא יתבונן׃

כִּי־הוּא יָדַע מְתֵי־שָׁוְא וַיַּרְא־אָוֶן וְלֹא יִתְבּוֹנָֽן׃

12 ואיש נבוב ילבב ועיר פרא אדם יולד׃

וְאִישׁ נָבוּב יִלָּבֵב וְעַיִר פֶּרֶא אָדָם יִוָּלֵֽד׃

13 אם אתה הכינות לבך ופרשת אליו כפך׃

אִם־אַתָּה הֲכִינוֹתָ לִבֶּךָ וּפָרַשְׂתָּ אֵלָיו כַּפֶּֽךָ׃

14 אם און בידך הרחיקהו ואל תשכן באהליך עולה׃

אִם־אָוֶן בְּיָדְךָ הַרְחִיקֵהוּ וְאַל־תַּשְׁכֵּן בְּאֹהָלֶיךָ עַוְלָֽה׃

15 כי אז תשא פניך ממום והיית מצק ולא תירא׃

כִּי־אָז ׀ תִּשָּׂא פָנֶיךָ מִמּוּם וְהָיִיתָ מֻצָק וְלֹא תִירָֽא׃

16 כי אתה עמל תשכח כמים עברו תזכר׃

כִּי־אַתָּה עָמָל תִּשְׁכָּח כְּמַיִם עָבְרוּ תִזְכֹּֽר׃

17 ומצהרים יקום חלד תעפה כבקר תהיה׃

וּֽמִצָּהֳרַיִם יָקוּם חָלֶד תָּעֻפָה כַּבֹּקֶר תִּהְיֶֽה׃

18 ובטחת כי יש תקוה וחפרת לבטח תשכב׃

וּֽבָטַחְתָּ כִּי־יֵשׁ תִּקְוָה וְחָפַרְתָּ לָבֶטַח תִּשְׁכָּֽב׃

19 ורבצת ואין מחריד וחלו פניך רבים׃

וְֽרָבַצְתָּ וְאֵין מַחֲרִיד וְחִלּוּ פָנֶיךָ רַבִּֽים׃

20 ועיני רשעים תכלינה ומנוס אבד מנהם ותקותם מפח נפש׃

וְעֵינֵי רְשָׁעִים תִּכְלֶינָה וּמָנוֹס אָבַד מִנְהֶם וְתִקְוָתָם מַֽפַּח־נָֽפֶשׁ׃