תהילים 129

1 שִׁיר הַֽמַּעֲלוֹת רַבַּת צְרָרוּנִי מִנְּעוּרַי יֹֽאמַר־נָא יִשְׂרָאֵֽל׃

שיר המעלות רבת צררוני מנעורי-- יאמר-נא ישראל

2 רַבַּת צְרָרוּנִי מִנְּעוּרָי גַּם לֹא־יָכְלוּ לִֽי׃

רבת צררוני מנעורי גם לא-יכלו לי

3 עַל־גַּבִּי חָרְשׁוּ חֹרְשִׁים הֶאֱרִיכוּ למענותם לְמַעֲנִיתָֽם׃

על-גבי חרשו חרשים האריכו למענותם (למעניתם)

4 יְהוָה צַדִּיק קִצֵּץ עֲבוֹת רְשָׁעִֽים׃

יהוה צדיק קצץ עבות רשעים

5 יֵבֹשׁוּ וְיִסֹּגוּ אָחוֹר כֹּל שֹׂנְאֵי צִיּֽוֹן׃

יבשו ויסגו אחור-- כל שנאי ציון

6 יִהְיוּ כַּחֲצִיר גַּגּוֹת שֶׁקַּדְמַת שָׁלַף יָבֵֽשׁ׃

יהיו כחציר גגות-- שקדמת שלף יבש

7 שֶׁלֹּא מִלֵּא כַפּוֹ קוֹצֵר וְחִצְנוֹ מְעַמֵּֽר׃

שלא מלא כפו קוצר וחצנו מעמר

8 וְלֹא אָֽמְרוּ ׀ הָעֹבְרִים בִּרְכַּֽת־יְהוָה אֲלֵיכֶם בֵּרַכְנוּ אֶתְכֶם בְּשֵׁם יְהוָֽה׃

ולא אמרו העברים-- ברכת-יהוה אליכם ברכנו אתכם בשם יהוה