תהילים 87

1 לִבְנֵי־קֹרַח מִזְמוֹר שִׁיר יְסוּדָתוֹ בְּהַרְרֵי־קֹֽדֶשׁ׃

לבני קרח מזמור שיר יסודתו בהררי קדש׃

2 אֹהֵב יְהֹוָה שַׁעֲרֵי צִיּוֹן מִכֹּל מִשְׁכְּנוֹת יַעֲקֹֽב׃

אהב יהוה שערי ציון מכל משכנות יעקב׃

3 נִכְבָּדוֹת מְדֻבָּר בָּךְ עִיר הָאֱלֹהִים סֶֽלָה׃

נכבדות מדבר בך עיר האלהים סלה׃

4 אַזְכִּיר ׀ רַהַב וּבָבֶל לְֽיֹדְעָי הִנֵּה פְלֶשֶׁת וְצֹר עִם־כּוּשׁ זֶה יֻלַּד־שָֽׁם׃

אזכיר רהב ובבל לידעי הנה פלשת וצור עם כוש זה ילד שם׃

5 וּלְצִיּוֹן ׀ יֵאָמַר אִישׁ וְאִישׁ יֻלַּד־בָּהּ וְהוּא יְכוֹנְנֶהָ עֶלְיֽוֹן׃

ולציון יאמר איש ואיש ילד בה והוא יכוננה עליון׃

6 יְֽהֹוָה יִסְפֹּר בִּכְתוֹב עַמִּים זֶה יֻלַּד־שָׁם סֶֽלָה׃

יהוה יספר בכתוב עמים זה ילד שם סלה׃

7 וְשָׁרִים כְּחֹלְלִים כׇּֽל־מַעְיָנַי בָּֽךְ׃

ושרים כחללים כל מעיני בך׃