תהילים 150

1 הַלְלוּ ־ יָהּ ׀ הַֽלְלוּ־אֵל בְּקׇדְשׁוֹ הַֽלְלוּהוּ בִּרְקִיעַ עֻזּֽוֹ׃

הללו-יה הללו-אל בקדשו הללוהו ברקיע עזו

2 הַלְלוּהוּ בִגְבוּרֹתָיו הַלְלוּהוּ כְּרֹב גֻּדְלֽוֹ׃

הללוהו בגבורתיו הללוהו כרב גדלו

3 הַלְלוּהוּ בְּתֵקַע שׁוֹפָר הַלְלוּהוּ בְּנֵבֶל וְכִנּֽוֹר׃

הללוהו בתקע שופר הללוהו בנבל וכנור

4 הַלְלוּהוּ בְּתֹף וּמָחוֹל הַֽלְלוּהוּ בְּמִנִּים וְעֻגָֽב׃

הללוהו בתף ומחול הללוהו במנים ועגב

5 הַלְלוּהוּ בְצִלְצְלֵי־שָׁמַע הַֽלְלוּהוּ בְּֽצִלְצְלֵי תְרוּעָֽה׃

הללוהו בצלצלי-שמע הללוהו בצלצלי תרועה

6 כֹּל הַנְּשָׁמָה תְּהַלֵּל יָהּ הַֽלְלוּ־יָֽהּ׃

כל הנשמה תהלל יה הללו-יה