תהילים 15

1 מִזְמוֹר לְדָוִד יְהֹוָה מִי־יָגוּר בְּאׇהֳלֶךָ מִֽי־יִשְׁכֹּן בְּהַר קׇדְשֶֽׁךָ׃

מזמור לדוד יהוה מי יגור באהלך מי ישכן בהר קדשך׃

2 הוֹלֵךְ תָּמִים וּפֹעֵל צֶדֶק וְדֹבֵר אֱמֶת בִּלְבָבֽוֹ׃

הולך תמים ופעל צדק ודבר אמת בלבבו׃

3 לֹֽא־רָגַל ׀ עַל־לְשֹׁנוֹ לֹא־עָשָׂה לְרֵעֵהוּ רָעָה וְחֶרְפָּה לֹא־נָשָׂא עַל־קְרֹבֽוֹ׃

לא רגל על לשנו לא עשה לרעהו רעה וחרפה לא נשא על קרבו׃

4 נִבְזֶה ׀ בְּֽעֵינָיו נִמְאָס וְאֶת־יִרְאֵי יְהֹוָה יְכַבֵּד נִשְׁבַּע לְהָרַע וְלֹא יָמִֽר׃

נבזה בעיניו נמאס ואת יראי יהוה יכבד נשבע להרע ולא ימר׃

5 כַּסְפּוֹ ׀ לֹא־נָתַן בְּנֶשֶׁךְ וְשֹׁחַד עַל־נָקִי לֹא לָקָח עֹֽשֵׂה־אֵלֶּה לֹא יִמּוֹט לְעוֹלָֽם׃

כספו לא נתן בנשך ושחד על נקי לא לקח עשה אלה לא ימוט לעולם׃