תהילים 121

1 שִׁיר לַֽמַּעֲלוֹת אֶשָּׂא עֵינַי אֶל־הֶהָרִים מֵאַיִן יָבֹא עֶזְרִֽי׃

שיר למעלות אשא עיני אל-ההרים-- מאין יבא עזרי

2 עֶזְרִי מֵעִם יְהֹוָה עֹשֵׂה שָׁמַיִם וָאָֽרֶץ׃

עזרי מעם יהוה-- עשה שמים וארץ

3 אַל־יִתֵּן לַמּוֹט רַגְלֶךָ אַל־יָנוּם שֹׁמְרֶֽךָ׃

אל-יתן למוט רגלך אל-ינום שמרך

4 הִנֵּה לֹֽא־יָנוּם וְלֹא יִישָׁן שׁוֹמֵר יִשְׂרָאֵֽל׃

הנה לא-ינום ולא יישן-- שומר ישראל

5 יְהֹוָה שֹׁמְרֶךָ יְהֹוָה צִלְּךָ עַל־יַד יְמִינֶֽךָ׃

יהוה שמרך יהוה צלך על-יד ימינך

6 יוֹמָם הַשֶּׁמֶשׁ לֹֽא־יַכֶּכָּה וְיָרֵחַ בַּלָּֽיְלָה׃

יומם השמש לא-יככה וירח בלילה

7 יְֽהֹוָה יִשְׁמׇרְךָ מִכׇּל־רָע יִשְׁמֹר אֶת־נַפְשֶֽׁךָ׃

יהוה ישמרך מכל-רע ישמר את-נפשך

8 יְֽהֹוָה יִשְׁמׇר־צֵאתְךָ וּבוֹאֶךָ מֵעַתָּה וְעַד־עוֹלָֽם׃

יהוה ישמר-צאתך ובואך-- מעתה ועד-עולם