תהילים 65

1 למנצח מזמור לדוד שיר ב לך דמיה תהלה אלהים בציון ולך ישלם-נדר

2 שמע תפלה-- עדיך כל-בשר יבאו

3 דברי עונת גברו מני פשעינו אתה תכפרם

4 אשרי תבחר ותקרב-- ישכן חצריך נשבעה בטוב ביתך קדש היכלך

5 נוראות בצדק תעננו-- אלהי ישענו מבטח כל-קצוי-ארץ וים רחקים

6 מכין הרים בכחו נאזר בגבורה

7 משביח שאון ימים--שאון גליהם והמון לאמים

8 וייראו ישבי קצות--מאותתיך מוצאי בקר וערב תרנין

9 פקדת הארץ ותשקקה רבת תעשרנה-- פלג אלהים מלא מים תכין דגנם כי-כן תכינה

10 תלמיה רוה נחת גדודה ברביבים תמגגנה צמחה תברך

11 עטרת שנת טובתך ומעגליך ירעפון דשן

12 ירעפו נאות מדבר וגיל גבעות תחגרנה

13 לבשו כרים הצאן-- ועמקים יעטפו-בר יתרועעו אף-ישירו