איוב 38

1 ויען-יהוה את-איוב מנהסערה (מן הסערה) ויאמר

וַיַּֽעַן־יְהֹוָה אֶת־אִיּוֹב (מנהסערה) [מִן ׀ הַסְּעָרָה] וַיֹּאמַֽר׃

2 מי זה מחשיך עצה במלין-- בלי-דעת

מִי זֶה ׀ מַחְשִׁיךְ עֵצָה בְמִלִּין בְּֽלִי־דָֽעַת׃

3 אזר-נא כגבר חלציך ואשאלך והודיעני

אֱזׇר־נָא כְגֶבֶר חֲלָצֶיךָ וְאֶשְׁאָלְךָ וְהוֹדִיעֵֽנִי׃

4 איפה היית ביסדי-ארץ הגד אם-ידעת בינה

אֵיפֹה הָיִיתָ בְּיׇסְדִי־אָרֶץ הַגֵּד אִם־יָדַעְתָּ בִינָֽה׃

5 מי-שם ממדיה כי תדע או מי-נטה עליה קו

מִי־שָׂם מְמַדֶּיהָ כִּי תֵדָע אוֹ מִֽי־נָטָה עָלֶיהָ קָּֽו׃

6 על-מה אדניה הטבעו או מי-ירה אבן פנתה

עַל־מָה אֲדָנֶיהָ הׇטְבָּעוּ אוֹ מִי־יָרָה אֶבֶן פִּנָּתָֽהּ׃

7 ברן-יחד כוכבי בקר ויריעו כל-בני אלהים

בְּרׇן־יַחַד כּוֹכְבֵי בֹקֶר וַיָּרִיעוּ כׇּל־בְּנֵי אֱלֹהִֽים׃

8 ויסך בדלתים ים בגיחו מרחם יצא

וַיָּסֶךְ בִּדְלָתַיִם יָם בְּגִיחוֹ מֵרֶחֶם יֵצֵֽא׃

9 בשומי ענן לבשו וערפל חתלתו

בְּשׂוּמִי עָנָן לְבֻשׁוֹ וַעֲרָפֶל חֲתֻלָּתֽוֹ׃

10 ואשבר עליו חקי ואשים בריח ודלתים

וָאֶשְׁבֹּר עָלָיו חֻקִּי וָאָשִׂים בְּרִיחַ וּדְלָתָֽיִם׃

11 ואמר--עד-פה תבוא ולא תסיף ופא-ישית בגאון גליך

וָאֹמַר עַד־פֹּה תָבוֹא וְלֹא תֹסִיף וּפֹא־יָשִׁית בִּגְאוֹן גַּלֶּֽיךָ׃

12 המימיך צוית בקר ידעתה שחר (ידעת השחר) מקמו

הֲֽמִיָּמֶיךָ צִוִּיתָ בֹּקֶר (ידעתה שחר) [יִדַּעְתָּ הַשַּׁחַר] מְקֹמֽוֹ׃

13 לאחז בכנפות הארץ וינערו רשעים ממנה

לֶאֱחֹז בְּכַנְפוֹת הָאָרֶץ וְיִנָּעֲרוּ רְשָׁ עִ ים מִמֶּֽנָּה׃

14 תתהפך כחמר חותם ויתיצבו כמו לבוש

תִּתְהַפֵּךְ כְּחֹמֶר חוֹתָם וְיִֽתְיַצְּבוּ כְּמוֹ לְבֽוּשׁ׃

15 וימנע מרשעים אורם וזרוע רמה תשבר

וְיִמָּנַע מֵרְשָׁ עִ ים אוֹרָם וּזְרוֹעַ רָמָה תִּשָּׁבֵֽר׃

16 הבאת עד-נבכי-ים ובחקר תהום התהלכת

הֲבָאתָ עַד־נִבְכֵי־יָם וּבְחֵקֶר תְּהוֹם הִתְהַלָּֽכְתָּ׃

17 הנגלו לך שערי-מות ושערי צלמות תראה

הֲנִגְלוּ לְךָ שַׁעֲרֵי־מָוֶת וְשַׁעֲרֵי צַלְמָוֶת תִּרְאֶֽה׃

18 התבננת עד-רחבי-ארץ הגד אם-ידעת כלה

הִתְבֹּנַנְתָּ עַד־רַחֲבֵי־אָרֶץ הַגֵּד אִם־יָדַעְתָּ כֻלָּֽהּ׃

19 אי-זה הדרך ישכן-אור וחשך אי-זה מקמו

אֵי־זֶה הַדֶּרֶךְ יִשְׁכׇּן־אוֹר וְחֹשֶׁךְ אֵי־זֶה מְקֹמֽוֹ׃

20 כי תקחנו אל-גבולו וכי-תבין נתיבות ביתו

כִּי תִקָּחֶנּוּ אֶל־גְּבוּלוֹ וְכִי־תָבִין נְתִיבוֹת בֵּיתֽוֹ׃

21 ידעת כי-אז תולד ומספר ימיך רבים

יָדַעְתָּ כִּי־אָז תִּוָּלֵד וּמִסְפַּר יָמֶיךָ רַבִּֽים׃

22 הבאת אל-אצרות שלג ואוצרות ברד תראה

הֲבָאתָ אֶל־אֹצְרוֹת שָׁלֶג וְאוֹצְרוֹת בָּרָד תִּרְאֶֽה׃

23 אשר-חשכתי לעת-צר ליום קרב ומלחמה

אֲשֶׁר־חָשַׂכְתִּי לְעֶת־צָר לְיוֹם קְרָב וּמִלְחָמָֽה׃

24 אי-זה הדרך יחלק אור יפץ קדים עלי-ארץ

אֵי־זֶה הַדֶּרֶךְ יֵחָלֶק אוֹר יָפֵץ קָדִים עֲלֵי־אָֽרֶץ׃

25 מי-פלג לשטף תעלה ודרך לחזיז קלות

מִֽי־פִלַּג לַשֶּׁטֶף תְּעָלָה וְדֶרֶךְ לַחֲזִיז קֹלֽוֹת׃

26 להמטיר על-ארץ לא-איש-- מדבר לא-אדם בו

לְהַמְטִיר עַל־אֶרֶץ לֹא־אִישׁ מִדְבָּר לֹא־אָדָם בּֽוֹ׃

27 להשביע שאה ומשאה ולהצמיח מצא דשא

לְהַשְׂבִּיעַ שֹׁאָה וּמְשֹׁאָה וּלְהַצְמִיחַ מֹצָא דֶֽשֶׁא׃

28 היש-למטר אב או מי-הוליד אגלי-טל

הֲיֵשׁ־לַמָּטָר אָב אוֹ מִי־הוֹלִיד אֶגְלֵי־טָֽל׃

29 מבטן מי יצא הקרח וכפר שמים מי ילדו

מִבֶּטֶן מִי יָצָא הַקָּרַח וּכְפֹר שָׁמַיִם מִי יְלָדֽוֹ׃

30 כאבן מים יתחבאו ופני תהום יתלכדו

כָּאֶבֶן מַיִם יִתְחַבָּאוּ וּפְנֵי תְהוֹם יִתְלַכָּֽדוּ׃

31 התקשר מעדנות כימה או-משכות כסיל תפתח

הַֽתְקַשֵּׁר מַעֲדַנּוֹת כִּימָה אֽוֹ־מֹשְׁכוֹת כְּסִיל תְּפַתֵּֽחַ׃

32 התציא מזרות בעתו ועיש על-בניה תנחם

הֲתֹצִיא מַזָּרוֹת בְּעִתּוֹ וְעַיִשׁ עַל־בָּנֶיהָ תַנְחֵֽם׃

33 הידעת חקות שמים אם-תשים משטרו בארץ

הֲיָדַעְתָּ חֻקּוֹת שָׁמָיִם אִם־תָּשִׂים מִשְׁטָרוֹ בָאָֽרֶץ׃

34 התרים לעב קולך ושפעת-מים תכסך

הֲתָרִים לָעָב קוֹלֶךָ וְֽשִׁפְעַת־מַיִם תְּכַסֶּֽךָּ׃

35 התשלח ברקים וילכו ויאמרו לך הננו

הַֽתְשַׁלַּח בְּרָקִים וְיֵלֵכוּ וְיֹֽאמְרוּ לְךָ הִנֵּֽנוּ׃

36 מי-שת בטחות חכמה או מי-נתן לשכוי בינה

מִי־שָׁת בַּטֻּחוֹת חׇכְמָה אוֹ מִֽי־נָתַן לַשֶּׂכְוִי בִינָֽה׃

37 מי-יספר שחקים בחכמה ונבלי שמים מי ישכיב

מִֽי־יְסַפֵּר שְׁחָקִים בְּחׇכְמָה וְנִבְלֵי שָׁמַיִם מִי יַשְׁכִּֽיב׃

38 בצקת עפר למוצק ורגבים ידבקו

בְּצֶקֶת עָפָר לַמּוּצָק וּרְגָבִים יְדֻבָּֽקוּ׃

39 התצוד ללביא טרף וחית כפירים תמלא

הֲתָצוּד לְלָבִיא טָרֶף וְחַיַּת כְּפִירִים תְּמַלֵּֽא׃

40 כי-ישחו במעונות ישבו בסכה למו-ארב

כִּֽי־יָשֹׁחוּ בַמְּעוֹנוֹת יֵֽשְׁבוּ בַסֻּכָּה לְמוֹ־אָֽרֶב׃

41 מי יכין לערב צידו כי-ילדו אל-אל ישועו יתעו לבלי-אכל

מִי יָכִין לָעֹרֵב צֵידוֹ כִּֽי־יְלָדָו אֶל־אֵל יְשַׁוֵּעוּ יִתְעוּ לִבְלִי־אֹֽכֶל׃