איוב 17

1 רוחי חבלה ימי נזעכו קברים לי

רוּחִי חֻבָּלָה יָמַי נִזְעָכוּ קְבָרִים לִֽי׃

2 אם-לא התלים עמדי ובהמרותם תלן עיני

אִם־לֹא הֲתֻלִים עִמָּדִי וּבְהַמְּרוֹתָם תָּלַן עֵינִֽי׃

3 שימה-נא ערבני עמך מי הוא לידי יתקע

שִֽׂימָה־נָּא עׇרְבֵנִי עִמָּךְ מִי הוּא לְיָדִי יִתָּקֵֽעַ׃

4 כי-לבם צפנת משכל על-כן לא תרמם

כִּֽי־לִבָּם צָפַנְתָּ מִשָּׂכֶל עַל־כֵּן לֹא תְרֹמֵֽם׃

5 לחלק יגיד רעים ועיני בניו תכלנה

לְחֵלֶק יַגִּיד רֵעִים וְעֵינֵי בָנָיו תִּכְלֶֽנָה׃

6 והציגני למשל עמים ותפת לפנים אהיה

וְֽהִצִּיגַנִי לִמְשֹׁל עַמִּים וְתֹפֶת לְפָנִים אֶהְיֶֽה׃

7 ותכה מכעש עיני ויצרי כצל כלם

וַתֵּכַהּ מִכַּעַשׂ עֵינִי וִיצֻרַי כַּצֵּל כֻּלָּֽם׃

8 ישמו ישרים על-זאת ונקי על-חנף יתערר

יָשֹׁמּוּ יְשָׁרִים עַל־זֹאת וְנָקִי עַל־חָנֵף יִתְעֹרָֽר׃

9 ויאחז צדיק דרכו וטהר-ידים יסיף אמץ

וְיֹאחֵז צַדִּיק דַּרְכּוֹ וּֽטְהׇר־יָדַיִם יֹסִיף אֹֽמֶץ׃

10 ואולם--כלם תשבו ובאו נא ולא-אמצא בכם חכם

וְֽאוּלָם כֻּלָּם תָּשֻׁבוּ וּבֹאוּ נָא וְלֹֽא־אֶמְצָא בָכֶם חָכָֽם׃

11 ימי עברו זמתי נתקו-- מורשי לבבי

יָמַי עָבְרוּ זִמֹּתַי נִתְּקוּ מוֹרָשֵׁי לְבָבִֽי׃

12 לילה ליום ישימו אור קרוב מפני-חשך

לַיְלָה לְיוֹם יָשִׂימוּ אוֹר קָרוֹב מִפְּנֵי־חֹֽשֶׁךְ׃

13 אם-אקוה שאול ביתי בחשך רפדתי יצועי (Sheol h7585)

אִם־אֲקַוֶּה שְׁאוֹל בֵּיתִי בַּחֹשֶׁךְ רִפַּדְתִּי יְצוּעָֽי׃ (Sheol h7585)

14 לשחת קראתי אבי אתה אמי ואחתי לרמה

לַשַּׁחַת קָרָאתִי אָבִי אָתָּה אִמִּי וַאֲחֹתִי לָרִמָּֽה׃

15 ואיה אפו תקותי ותקותי מי ישורנה

וְאַיֵּה אֵפוֹ תִקְוָתִי וְתִקְוָתִי מִי יְשׁוּרֶֽנָּה׃

16 בדי שאל תרדנה אם-יחד על-עפר נחת (Sheol h7585)

בַּדֵּי שְׁאֹל תֵּרַדְנָה אִם־יַחַד עַל־עָפָר נָֽחַת׃ (Sheol h7585)