Sòm 85

1 Pou direktè koral la; Yon Sòm a fis a Koré yo O SENYÈ, Ou te montre favè Ou a peyi Ou a. Ou te restore kaptivite a Jacob la.

Pou chèf sanba yo. Se yon sòm pitit Kore yo. Seyè, ou te bon pou peyi ou la! Ou te mennen pitit Jakòb ki te prizonye yo tounen!

2 Ou te padone inikite a pèp Ou a. Ou te kouvri tout peche yo.

Ou te padonnen tou sa yo te fè ki mal, ou te efase tout peche yo.

3 Ou te retire tout gran kòlè Ou. Ou te detounen kòlè Ou ki brile a.

Ou pa t' fache sou yo ankò! Ou te sispann fè kòlè sou yo!

4 Restore nou, O Bondye a sali nou an, e fè endiyasyon Ou anvè nou, sispann.

Mete nou kanpe sou de pye nou ankò! O Bondye, ou menm ki delivrans nou! Ou pa bezwen fache sou nou ankò!

5 Èske Ou va fache avèk nou jis pou tout tan? Èske Ou va pwolonje kòlè Ou jis a tout jenerasyon yo?

Eske w'ap toujou rete fache sou nou? Eske ou p'ap janm byen ak nou ankò?

6 Èske se pa Ou menm ki pou fè nou reprann ankò? Pou pèp Ou a kapab rejwi nan Ou?

Eske ou p'ap ban nou lavi ankò, pou pèp ou ka fè fèt pou ou?

7 Montre nou lanmou dous Ou a, O SENYÈ. Pèmèt nou resevwa sali Ou a.

Seyè, fè nou wè jan ou renmen nou! Delivre nou non!

8 Mwen va tande sa ke Bondye, SENYÈ a, va di. Paske La p pale lapè a pèp Li a, a fidèl Li yo, men pa kite yo retounen nan foli yo.

M'ap koute sa Seyè, Bondye a, ap di: Li pale ak pèp li a, ak moun ki kenbe l' fèm yo, li pwomèt pou l' fè yo viv ak kè poze, depi yo pa janm lage kò yo nan fè betiz ankò.

9 Anverite, sekou Li toupre a (sila) ki gen lakrent Li yo, pou laglwa Li kapab rete nan peyi nou an.

Wi, li pare pou l' delivre moun ki gen krentif pou li, pou l' fè yo santi pouvwa li, pou l' toujou la avèk yo.

10 Lanmou dous avèk verite te vin jwenn ansanm. Ladwati avèk lapè te vin bo youn lòt.

Lè sa a nan peyi a, moun yo yonn va renmen lòt, pesonn p'ap bay lòt manti ankò. Moun va viv byen yonn ak lòt, pesonn p'ap fè lòt lenjistis ankò!

11 Verite vòltije sòti nan latè, e Ladwati veye depi anwo nan syèl la.

Sou latè moun p'ap vire do bay Bondye. Bondye menm, bò pa li, va rete nan syèl la, l'a gade anba san patipri.

12 Anverite, SENYÈ a va bay sa ki bon, e peyi nou an va bay rekòlt li.

Seyè a va fè nou jwenn tout kalite bon bagay. Jaden nou yo va bay bèl rekòt.

13 Ladwati va mache devan L. L ap prepare yon gran chemen pou mak pla pye Li yo.

Moun k'ap mache dwat yo va pran devan. Kote yo pase moun ap viv byen yonn ak lòt.