Sòm 26

1 Yon sòm David Fè m jistis, O SENYÈ, paske mwen te mache nan entegrite mwen. Mwen te mete konfyans mwen nan SENYÈ a san varye.

2 Chache anndan m, O SENYÈ, e pase mwen a leprèv. Sonde panse mwen avèk kè m.

3 Paske lanmou dous Ou a devan zye m. Mwen te mache nan verite Ou.

4 Mwen pa chita avèk mesye k ap twonpe moun yo. Ni mwen pa pale avèk (sila) k ap pran poz yo.

5 Mwen rayi asanble malfektè yo, e mwen pa chita avèk mechan yo.

6 Mwen va lave men m nan inosans, e mwen va antoure lotèl Ou, O SENYÈ,

7 pou m kapab pwoklame avèk vwa remèsiman a, e deklare tout mèvèy Ou yo.

8 O SENYÈ, Mwen renmen abitasyon lakay Ou, avèk kote ke glwa Ou rete a.

9 Pa retire nanm mwen ansanm avèk pechè yo, ni lavi m avèk mesye ki vèse san yo,

10 nan men a (sila) ki gen manèv mechan yo, ki nan mechanste pote kado vèse anba tab yo.

11 Men pou mwen, mwen va mache nan entegrite mwen. Delivre mwen e fè m gras.

12 Pye m kanpe sou yon plas byen plat. Nan asanble a, mwen va beni SENYÈ a.