Sòm 25

1 Yon sòm David A Ou menm, O SENYÈ, mwen leve nanm mwen.

Se yon sòm David. Seyè, m'ap fè lapriyè m' moute devan ou. Bondye mwen, se nan ou mwen mete tout konfyans mwen.

2 O Bondye mwen, nan Ou, mwen mete konfyans mwen. Pa kite mwen vin wont; pa kite lènmi m yo fè fèt sou mwen.

Piga ou fè m' wont, pa kite lènmi yo pase m' nan betiz.

3 Anverite, nanpwen nan (sila) ki tann Ou yo ki va wont; (sila) ki fè konplo kont Ou san koz yo, va wont.

Wi, moun ki mete konfyans yo nan ou p'ap janm wont. Men, moun ka soti wont yo, se moun k'ap trayi ou pou gremesi.

4 Fè m konnen pa Ou yo, O SENYÈ; enstwi m nan chemen Ou yo.

Seyè, fè m' konnen jan ou vle m' viv la! Moutre m' nan ki chemen ou vle pou m' mache a!

5 Mennen mwen nan verite Ou e enstwi mwen, Paske se Ou menm ki Bondye delivrans mwen; se Ou m ap tann tout lajounen.

Moutre m' sa pou m' fè pou m' viv yon jan ki konfòm ak verite ou la, paske se ou menm ki delivrans mwen. Se sou ou mwen konte tout jounen.

6 Sonje, O SENYÈ, mizerikòd Ou ak lanmou dous Ou a, Paske se yo ki la depi tan ale nèt.

Seyè, chonje jan ou gen kè sansib, chonje jan ou renmen nou depi nan tan lontan.

7 Pa sonje peche jenès mwen yo, ni transgresyon mwen yo. Selon lanmou dous Ou, sonje mwen, Pou koz a bonte Ou, O SENYÈ.

Pa chonje peche ak fòt mwen te fè lè m' te jenn. Seyè, jan ou renmen m' sa a, jan ou gen bon kè, tanpri, pa bliye m'!

8 Bon e plen ladwati, se SENYÈ a; pou sa, Li enstwi pechè yo nan chemen an.

Seyè a bon, li pa nan patipri, li moutre moun k'ap fè sa ki mal yo jan pou yo viv.

9 Li dirije enb yo nan jistis, e Li va enstwi enb yo nan chemen Li.

Li pran men moun ki soumèt devan l' yo, li fè yo mache nan bon chemen an, li moutre yo jan li vle pou yo viv la.

10 Tout chemen Bondye se nan lanmou dous avèk verite pou (sila) ki kenbe akò Li yo ak temwayaj Li yo.

Moun ki kenbe kontra li fe ak yo a, moun ki obeyi kòmandman l' yo, li fè yo wè jan li renmen yo, jan li p'ap janm lage yo.

11 Pou koz a non Ou, O SENYÈ, padone inikite mwen, paske li anpil.

Seyè, poutèt non ou pote a, padonnen peche m' yo, paske yo anpil.

12 Kilès nonm nan ki gen krent SENYÈ a? Li va enstwi li nan chemen li ta dwe chwazi a.

Si yon moun gen krentif pou Seyè a, Seyè a va moutre l' chemen pou l' pran.

13 Nanm li va viv alèz. Desandan li yo va resevwa eritaj peyi a.

L'ap toujou gen kè kontan. Pitit li yo va pran peyi a pou yo.

14 Lamitye SENYÈ a se pou (sila) ki gen lakrent Li yo. Li va fè yo konnen akò Li.

Seyè a, se zanmi moun ki gen krentif pou li. Li fè yo konnen kontra li pase ak yo a.

15 Zye m toujou vè SENYÈ a, paske Li va retire pye mwen nan pèlen an.

Se sou Seyè a m'ap gade tout tan, l'ap delivre m' lè m' nan move pa.

16 Vire vè mwen e fè m gras, paske mwen abandone e aflije.

Seyè, vire je ou bò kote m'. Gen pitye pou mwen, paske mwen pou kont mwen, mwen san fòs.

17 Twoub a kè m yo vin plis. Mennen m sòti nan gwo detrès sa a.

Pa kite m' ak kè sere sa a. Wete m' nan tray m'ap pase a.

18 Gade sou afliksyon mwen avèk twoub mwen yo, e padone tout peche mwen yo.

Gade nan ki mizè mwen ye! Gade jan m'ap soufri! Padonnen tout peche m' yo.

19 Gade sou tout lènmi mwen yo, paske yo anpil. Epi yo rayi mwen avèk yon rayisman ki vyolan.

Gade tout kantite lènmi mwen genyen! Gade jan yo rayi m', jan y'ap pousib mwen.

20 Gade nanm mwen e delivre mwen. Pa kite m vin wont, paske mwen pran refij nan Ou menm.

Pwoteje m' non! Delivre m' non! Piga ou fè m' wont, paske se bò kote ou m'ap chache pwoteksyon, se anba zèl ou mwen vin kache.

21 Kite entegrite avèk ladwati pwoteje mwen, paske se Ou m ap tann.

Fè m' viv yon jan ki san repwòch. Fè m' mache dwat pou ou ka pwoteje m', paske tout espwa mwen se nan ou li ye.

22 Delivre Israël, O Bondye, sou tout twoub li yo.

O Bondye, delivre pèp Izrayèl la anba tray l'ap pase yo.