Sòm 114

1 Lè Israël te sòti an Égypte, lakay Jacob soti de yon pèp lang etranje,

Lè pèp Izrayèl la te soti nan peyi Lejip, lè pitit pitit Jakòb yo te kite peyi etranje yo,

2 Juda te vin sanktiyè Li a, Israël, wayòm Li.

Bondye chwazi branch fanmi Jida a pou pèp li, moun Izrayèl yo pou byen pa l'.

3 Lanmè a te gade e te sove ale. Jourdain an te vire fè bak.

Lè Lanmè Wouj la wè l', li pran kouri san gad dèyè. Larivyè Jouden sispann koule desann.

4 Mòn yo te sote tankou belye, kolin yo tankou ti mouton.

Mòn yo sote ponpe tankou bouk kabrit, ti mòn yo sote ponpe tankou ti mouton.

5 Sa k pase ou menm, O lanmè, ke ou te sove ale konsa? O Jourdain an, ke Ou te vire fè bak konsa?

Kisak pase ou, lanmè, kifè ou pran kouri konsa? Ou menm larivyè Jouden, kisak rive ou kifè ou sispann koule?

6 O mòn yo, ke ou sote tankou belye konsa? O kolin yo, tankou ti mouton konsa?

Nou menm mòn yo, sa nou genyen pou n'ap sote ponpe konsa tankou bouk kabrit? Nou menm ti mòn yo, poukisa n'ap sote ponpe tankou ti mouton?

7 Pran tranble, O latè, devan SENYÈ a, Devan Bondye a Jacob la,

Ou menm latè, tranble devan Seyè a, devan Bondye Jakòb la.

8 Ki te fè wòch la devni yon ma dlo, wòch silèks la yon sous k ap koule.

Se li menm ki fè gwo wòch la tounen yon basen dlo, li fè wòch la tounen yon sous dlo.