Pwovèb 2

1 Fis mwen an, si ou resevwa pawòl mwen yo, e gade kòmandman mwen yo nan kè ou,

Pitit mwen, aprann sa m'ap moutre ou la a. Chache pou ou pa janm bliye sa mwen di ou fè a.

2 e fè zòrèy ou atantif a sajès; e enkline zòrèy ou vè bon konprann,

Se poutèt sa, louvri zòrèy ou pou ou tande sa moun ki gen sajès ap di ou. Chache konprann yo.

3 wi, si ou leve vwa w pou sajès; e leve vwa ou vè bon konprann;

Wi, pa janm sispann chache gen konesans. Mande pou ou gen bon konprann.

4 si ou chache li kon ajan, e fè rechèch dèyè li kon trezò ki kache;

Kouri dèyè konesans tankou moun k'ap kouri dèyè lajan. Chache konesans tankou moun k'ap chache ja lajan.

5 nan lè sa a, ou va dekouvri lakrent SENYÈ a, e dekouvri konesans Bondye a.

Si ou fè tou sa, w'a konnen sa ki rele gen krentif pou Bondye. W'a resi konnen ki moun Bondye ye.

6 Paske, SENYÈ a bay sajès. Nan bouch Li, soti konesans ak bon konprann.

Se Seyè a ki bay konesans. Pawòl ki soti nan bouch li bay lespri ak konprann.

7 Li mete sajès nan depo pou moun dwat la. Li se boukliye pou sila ki mache ak entegrite yo,

Lè yon moun mache dwat, Seyè a ba li bon konsèy. Lè yon moun serye, li pwoteje l'.

8 Ka p veye chemen lajistis yo, e pwoteje chemen a fidèl Li yo.

Li pwoteje moun ki pa fè lenjistis. Li pran defans moun ki kenbe fèm nan sèvis li.

9 Konsa, ou va dekouvri ladwati ak jistis, e menm egalite avèk tout bon chemen yo.

Si ou koute m', w'a konnen ki jan pou ou mennen bak ou byen, ki jan pou ou pa fè lenjistis. W'a konnen ki jan pou ou mache dwat nan lavi. W'a konnen tout bon bagay ou dwe fè.

10 Paske, sajès va antre nan kè ou, e konesans va fè ou alèz jis rive nan nanm ou.

Lè sa a, w'a gen bon konprann nan ou. W'a pran tout plezi ou nan konesans ou genyen.

11 Bon konprann va pwoteje ou, konesans va veye sou ou,

Entèlijans ou p'ap kite anyen rive ou, konesans ou pral yon pwoteksyon pou ou.

12 pou pwoteje ou kont chemen mal la, kont lòm ki pale bagay pèvès yo.

Yo p'ap kite ou fè sa ki mal. Yo p'ap kite moun k'ap fè bèl diskou pou twonpe moun pwoche bò kote ou.

13 Kont sila ki kite chemen ladwati yo pou mache nan chemen fènwa yo;

Moun sa yo, se moun ki kite chemen dwat la pou lage kò yo nan fènwa.

14 ki pran plezi nan fè sa ki mal e rejwi nan mechanste mal la.

Se moun ki pran plezi yo nan fè sa ki mal. Se moun ki kontan anpil pou wè mechanste lòt moun ap fè.

15 Chemen a sila ki vin kwochi yo e ki vin gaye kò yo nan tout sa yo fè.

Ou pa janm konnen kote ou ye ak moun sa yo, tout kò yo se plan.

16 Pou delivre ou soti nan men fanm etranje a, soti nan men fanm adiltè ki flate ak pawòl li;

Entèlijans ou ak konesans ou va delivre ou anba fanm adiltè yo, anba fanm lòt peyi ki gen bèl pawòl dous pou pran tèt ou.

17 ki kite konpanyen jenès li a, e ki bliye akò a Bondye li;

Fanm konsa se fanm k'ap twonpe mari yo, fanm ki bliye pwomès yo te fè Bondye.

18 paske lakay li mennen a lanmò e tras a pla pye li yo rive kote mò yo.

Si ou mete pye lakay yo, ou sou wout lanmò. Si ou ale lakay yo, ou pa lwen ale kote mò yo ye a.

19 Pèsòn ki ale kote li menm, pa retounen ankò, ni yo pa jwenn pa lavi.

Lakay yo, se antre pa soti. Pa gen lavi pou ou ankò!

20 Akoz sa a, ou va mache nan chemen a sila ki bon yo, e swiv tras a moun ladwati yo.

Se poutèt sa, swiv egzanp moun debyen. Mache pye pou pye dèyè moun ki pa fè chemen kwochi.

21 Paske moun dwat yo va viv nan peyi a, e sila ki san tò yo va rete ladann;

Paske se moun k'ap mache dwat yo ki pral rete nan peyi a. Se moun serye yo ki pral la.

22 men mechan yo va koupe retire nèt de peyi a, e moun trèt yo va dechouke de li.

Men, Bondye ap disparèt mechan yo nan peyi a. L'ap rache moun k'ap fè sa ki mal yo tankou yo rache move zèb.