Resansman 1

1 SENYÈ a te pale a Moïse nan dezè Sinaï a, nan tant asanble a, nan premye jou a dezyèm mwa a, nan dezyèm ane lè yo te fin sòti nan peyi Égypte la. Li te di:

Premye jou dezyèm mwa nan dezyèm lanne depi moun pèp Izrayèl yo te soti kite peyi Lejip la, antan yo te nan dezè Sinayi a, Seyè a pale ak Moyiz nan Tant Randevou a. Li di l' konsa:

2 “Fè yon chif kontwòl tout asanble fis Israël yo selon fanmi zansèt pa yo, selon papa lakay yo, selon kantite, non a chak gason, tèt pa tèt,

-Se pou ou menm ak Arawon, nou fè yon resansman pou konte tout moun nan pèp Izrayèl la, dapre fanmi yo, dapre branch fanmi yo. W'a pran non tout gason, yonn apre lòt.

3 soti nan ventan oplis, nenpòt moun ki kapab fè lagè an Israël. Ou menm avèk Aaron va konte yo pa lame yo.

N'a konte tou sa ki gen ventan osinon ki pi gran, depi yo bon pou fè lagè. N'a fè resansman an dapre jan lame a òganize.

4 Anplis de nou menm, va genyen yon moun ki sòti nan chak tribi, yo chak ki se tèt a fanmi zansèt pa li.

N'a pran yon chèf nan chak branch fanmi, dapre zansèt yo, pou ede nou.

5 “Alò, sa yo se nonm mesye ki va kanpe avèk ou yo: pou Ruben: Élitsur, fis a Schedéur;

Men non moun ki va ede nou nan resansman an: Nan branch fanmi Woubenn lan, se va Elizou, pitit gason Chedeyou.

6 pou Siméon: Schelumiel, fis a Tsurischaddaï;

Nan branch fanmi Simeyon an, se va Cheloumyèl, pitit gason Sourichadayi.

7 pou Juda: Nachschon, fis a Amminadab;

Nan branch fanmi Jida a, se va Nakchon, pitit gason Aminadab.

8 pou Issacar: Nethaneel, fis a Tsuar;

Nan branch fanmi Isaka a, se va Netanèl, pitit gason Swa.

9 pou Zabulon: Éliab, fis a Hélon;

Nan branch fanmi Zabilon an, se va Eliyab, pitit gason Elon.

10 pou fis a Joseph yo, pou Éphraïm: Élischama, fis a Ammihud; pou Manassé: Gamaliel, fis a Pedahtsur;

Nan branch fanmi Efrayim, premye pitit gason Jozèf la, se va Elichama, pitit gason Amiyoud. Nan branch fanmi Manase, dezyèm pitit gason Jozèf la, se va Gamliyèl, pitit gason Pedachou.

11 pou Benjamin: Abidan, fis a Guideoni;

Nan branch fanmi Benjamen an, se va Abidan, pitit gason Gideyoni.

12 pou Dan: Ahiézer, fis a Mamischaddaï;

Nan branch fanmi Dann lan, se va Ayezè, pitit gason Amichadayi.

13 pou Aser: Paguiel, fis a Ocran;

Nan branch fanmi Asè a, se va Pagiyèl, pitit gason Okran.

14 pou Gad: Éliasapah, fis a Déuel;

Nan branch fanmi Gad la, se va Elyasaf, pitit gason Dewèl.

15 pou Nephthali: Ahira, fis a Énan.”

Nan branch fanmi Neftali a, se va Ayira, pitit gason Enan.

16 Se sila yo ki te rele pa asanble a, dirijan a tribi fanmi zansèt pa yo; yo te chèf a dè milye an Israël.

Se moun sa yo yo te chwazi nan pèp la pou fè travay la. Se yo ki te chèf lakay yo, chèf branch fanmi zansèt yo.

17 Konsa, Moïse avèk Aaron te pran mesye sa yo ki te chwazi pa non yo.

Moyiz ak Arawon pran douz mesye Bondye te nonmen yo,

18 Yo te reyini tout kongregasyon an ansanm nan premye jou nan dezyèm mwa a. Konsa, yo te fè anrejistreman selon fanmi zansèt pa yo, selon kay papa yo, selon kantite ki te nome yo, soti nan ventan oswa plis, tèt pa tèt.

yo reyini tout pèp la, premye jou dezyèm mwa a. Yo pran non tout moun dapre fanmi yo, dapre branch fanmi zansèt yo. Yo konte tout gason, yonn apre lòt, tou sa ki gen ventan osinon ki pi gran,

19 Jan SENYÈ a te kòmande Moïse la, konsa li te konte yo nan dezè ki rele Sinaï a.

dapre lòd Seyè a te bay Moyiz la. Se nan dezè Sinayi a yo te fè resansman tout pèp la.

20 Alò fis a Ruben yo, premye ne pou Israël, anrejistreman pa yo selon fanmi zansèt yo, selon fanmi papa pa yo, selon kantite ki te nome yo, tèt pa tèt, tout gason soti nan ventan oswa plis ki ta kapab fè lagè.

Se konsa yo konte tout gason nan branch fanmi Woubenn, premye pitit Jakòb la, tou sa ki gen ventan ak tou sa ki pi gran epi ki bon pou fè lagè. Yo pran non yo yonn apre lòt, yo di pitit ki moun yo ye, dapre fanmi yo, dapre branch fanmi zansèt yo.

21 Kantite mesye ki te konte nan tribi Ruben an te karann-si-mil-senk san.

Yo jwenn karannsimil senksan (46.500) gason pou branch fanmi Woubenn lan.

22 Pou fis Siméon yo, anrejistreman pa yo selon fanmi zansèt yo, selon fanmi papa pa yo, selon kantite ki te nome yo, tèt pa tèt, tout gason soti nan ventan oswa plis ki ta kapab fè lagè.

Yo fè menm bagay la tou pou tout lòt branch fanmi yo. Pou branch fanmi Simeyon an,

23 Kantite mesye ki te konte nan tribi Siméon an te senkant-nèf-mil, twa-san.

yo jwenn senkantnèfmil twasan (59.300) gason.

24 Pou fis Gad yo, anrejistreman pa yo selon fanmi zansèt yo, selon fanmi papa pa yo, selon kantite ki te nome yo, tèt pa tèt, tout gason soti nan ventan oswa plis ki ta kapab fè lagè.

Pou branch fanmi Gad la,

25 Kantite mesye ki te konte nan tribi Gad la te karann-senk-mil-sis-san-senkant.

yo jwenn karannsenkmil sisansenkant (45.650) gason.

26 Pou fis Juda yo, anrejistreman pa yo selon fanmi zansèt yo, selon fanmi papa pa yo, selon kantite non yo, tèt pa tèt, tout gason soti nan ventan oswa plis ki ta kapab fè lagè.

Pou branch fanmi Jida a,

27 Kantite mesye ki te konte nan tribi Juda a te swasann-katòz-mil-sis-san.

yo jwenn swasannkatòzmil sisan (74.600) gason.

28 Pou fis Issacar yo, anrejistreman pa yo selon fanmi zansèt yo, selon fanmi papa pa yo, selon kantite non yo, tèt pa tèt, tout gason soti nan ventan oswa plis ki ta kapab fè lagè.

Pou branch fanmi Isaka a,

29 Kantite mesye ki te konte nan tribi Issacar a te senkant-kat-mil-kat-san.

yo jwenn senkannkatmil katsan (54.400) gason.

30 Pou fis Zabulon yo, anrejistreman pa yo selon fanmi zansèt yo, selon fanmi papa pa yo, selon kantite non yo, tèt pa tèt, tout gason soti nan ventan oswa plis ki ta kapab fè lagè.

Pou branch fanmi Zabilon an,

31 Kantite mesye ki te konte nan tribi Zabulon an te senkant-sèt-mil-kat-san.

yo jwenn senkannsètmil katsan (57.400) gason.

32 Pou fis Joseph sa vle di Éphraïm, anrejistreman pa yo selon fanmi zansèt yo, selon fanmi papa pa yo, selon kantite non yo, tèt pa tèt, tout gason soti nan ventan oswa plis ki ta kapab fè lagè.

Pou branch fanmi Efrayim, premye pitit gason Jozèf la,

33 Kantite mesye ki te konte nan tribi Éphraïm nan te karann-sèt-mil-senk-san.

yo jwenn karantmil senksan (40.500) gason.

34 Pou fis Manassé yo, anrejistreman pa yo selon fanmi zansèt yo, selon fanmi papa pa yo, selon kantite non yo, tèt pa tèt, tout gason soti nan ventan oswa plis ki ta kapab fè lagè.

Pou branch fanmi Manase, dezyèm pitit gason Jozèf la,

35 Fòs kantite mesye ki te konte nan tribi Manassé a te trann-de-mil-de-san.

yo jwenn tranndemil desan (32.200) gason.

36 Pou fis Benjamin yo, anrejistreman pa yo selon fanmi zansèt yo, selon fanmi papa pa yo, selon kantite non yo, tèt pa tèt, tout gason soti nan ventan oswa plis ki ta kapab fè lagè.

Pou branch fanmi Benjamen an,

37 Kantite mesye ki te konte nan tribi Benjamin an te trann-senk-mil-kat-san.

yo jwenn trannsenkmil katsan (35.400) gason.

38 Pou fis Dan yo, anrejistreman pa yo selon fanmi zansèt yo, selon fanmi papa pa yo, selon kantite non yo, tèt pa tèt, tout gason soti nan ventan oswa plis ki ta kapab fè lagè.

Pou branch fanmi Dann lan,

39 Kantite mesye ki te konte nan tribi Dan nan te swasann-de-mil-sèt-san.

yo jwenn swasanndemil sètsan (62.700) gason.

40 Pou fis Aser yo, anrejistreman pa yo selon fanmi zansèt yo, selon fanmi papa pa yo, selon kantite non yo, tèt pa tèt, tout gason soti nan ventan oswa plis ki ta kapab fè lagè.

Pou branch fanmi Asè a,

41 Kantite mesye ki te konte nan tribi Aser a te karanteyen-mil-senk-san.

yo jwenn karanteyenmil senksan (41.500) gason.

42 Pou fis Nephthali yo, anrejistreman pa yo selon fanmi zansèt yo, selon fanmi papa pa yo, selon kantite non yo, tèt pa tèt, tout gason soti nan ventan oswa plis ki ta kapab fè lagè.

Pou branch fanmi Neftali a,

43 Kantite mesye ki te konte nan tribi Nephtali a te senkant-twa-mil-kat-san.

yo jwenn senkanntwamil katsan (53.400) gason.

44 Sa yo se sila ki te konte yo, ke Moïse avèk Aaron te konte yo, selon chèf Israël yo, douz gason, chak ki te sòti lakay zansèt papa pa yo.

Se non tout moun sa yo Moyiz ak Arawon te pran lè sa a. Te gen douz chèf, yonn pou chak branch fanmi pèp Izrayèl la, ki t'ap ede yo nan travay la.

45 Konsa se tout gason nan fis Israël yo ki te konte selon fanmi zansèt yo, selon fanmi papa pa yo, selon kantite non yo, tèt pa tèt, tout gason soti nan ventan oswa plis ki ta kapab fè lagè an Israël.

Pou tout branch fanmi yo ansanm,

46 Jiskaske tout mesye ki te konte yo te sis-san-twa-mil-senk-san-senkant.

yo jwenn sisantwamil senksansenkant (603.550) gason.

47 Men Levit yo pa t konte pami yo selon tribi zansèt papa pa yo.

Men yo pa t' fè resansman branch fanmi Levi a ansanm ak lòt branch fanmi yo,

48 Paske SENYÈ a te pale avèk Moïse e te di:

paske Seyè a te di Moyiz konsa:

49 “Sèlman tribi Levi a, nou p ap konte, ni nou p ap fè kontwòl anrejistreman pa yo pami fis Israël yo.

-Ou pa bezwen fè resansman branch fanmi Levi a. Ou pa bezwen konte moun fanmi Levi yo ansanm ak rès moun pèp Izrayèl yo.

50 Men nou va chwazi Levit yo sou tabènak temwayaj la, sou tout zafè li yo ak tout sa ki apatyen a li menm. Yo va pote tabènak la avèk tout zafè li, e yo va okipe li; yo va osi fè kan antoure tabènak la.

Men, w'a mete moun fanmi Levi yo reskonsab Tant Randevou a ak tou sa ki ladan l' ansanm ak tou sa ki pou li. Se yo ki pou pote l' ansanm ak tou sa ki ladan l'. Se yo ki pou sèvi ladan l' epi yo gen pou yo moute kay yo fè wonn Tant Randevou a.

51 Konsa lè tabènak la ap pati, Levit yo va desann li; epi lè tabènak la vin kanpe, Levit yo va monte li. Men sila ki pa Levit ki vin toupre va vin mete a lanmò.

Lè pou Tant Bondye a deplase, se moun fanmi Levi yo ki va demoute l'. Lè yo rive kote pou yo rete a, se moun fanmi Levi yo ki va moute l' tou. Nenpòt lòt moun ki pa nan branch fanmi Levi a epi ki ta pwoche bò tant lan, se pou yo touye l'.

52 “Fis Israël yo va fè kan, chak mesye bò kote kan pa li, e chak mesye bò drapo pa li, selon lame yo.

Lòt moun pèp Izrayèl yo menm va moute tant yo apa, chak fanmi ansanm bò làbanyè yo, dapre pozisyon yo nan lame a.

53 Men Levit yo va fè kan antoure tabènak temwayaj la, pou kòlè pa vin sou asanble fis Israël yo. Konsa Levit yo va kenbe chaj sou Tabènak Temwayaj la.”

Men, moun fanmi Levi yo va moute kay yo fè wonn Tant Randevou a pou kòlè Bondye pa tonbe sou pèp Izrayèl la. Se yo menm tou ki la pou veye sou Tant Randevou a.

54 Se konsa ke fis Israël yo te fè. Selon tout sa ke SENYÈ a te kòmande Moïse yo, konsa yo te fè.

Moun pèp Izrayèl yo te fè tou sa Seyè a te bay Moyiz lòd fè a. Se konsa yo te fè l' vre.