Jòb 41
1 Èske ou ka rale Levyatan an deyò ak yon zen lapèch? Oswa peze lang li desann ak yon kòd?
Eske ou ka pran levyatan an nan zen? Eske ou ka mare lang li ak yon kòd?
2 Èske ou kab mete yon kòd nan nen l, oswa pèse machwè l ak yon zen?
Eske ou ka pase yon bwa wozo nan nen l'? Eske ou ka pèse machwè l' ak yon gwo zen?
3 Èske l ap fè ou anpil siplikasyon, oswa èske l ap pale ak ou ak pawòl dous?
Eske li pral mande ou: Tanpri souple, kite m' ale? Eske l'ap pale dous avè ou?
4 Èske l ap fè yon akò avèk ou? Èske ou va pran l pou yon sèvitè pou tout tan?
Eske l'ap pase kontra avè ou pou l' sèvi ou pou tout tan?
5 Èske ou va jwe avè l konsi se yon zwazo, oswa èske ou va mare li pou demwazèl ou yo?
Eske ou ka mare l' tankou yon ti zwezo pou pitit fi ou yo ka jwe avè l'?
6 Èske komèsan yo va fè komès avè l? Èske y ap divize li pami machann yo?
Eske moun k'ap fè lapèch yo pral fè lajan avè l'? Eske machann yo pral koupe l' an moso pou yo vann?
7 Èske ou kab plen po li ak gwo lans, oswa tèt li ak fren lapèch?
Eske ou ka pike tout po kò l' ak fwenn? Eske ou ka pèse tèt li ak yon fwenn?
8 Poze men ou sou li! Sonje batay la byen! Ou p ap fè l ankò
Seye mete men ou sou li yon grenn fwa, ou p'ap janm fè sa ankò, lè w'a chonje sa l'a fè ou!
9 Gade byen, esperans ou fo. Èske ou p ap vin bese ou, menm devan rega li?
Depi ou wè levyatan an, ou pèdi tout kouraj ou. Ou annik wè l', ou tonbe atè.
10 Nanpwen moun ki gen kouraj ase pou l ta tante fè l leve. Ebyen, se kilès li ye ki kab kanpe devan M?
Si yo leve l' nan dòmi, li move. Pa gen moun ki ka kanpe devan l'.
11 Kilès ki te ban Mwen yon bagay pou M ta rekonpanse li? Tout bagay anba tout syèl la se pa M.
Ki moun ki ka atake l' san anyen pa rive l'? Pa gen moun sou latè ki ka fè sa.
12 Konsa, Mwen p ap rete an silans akoz manm li yo, oswa gran pwisans li, oswa jan kò l byen òganize.
Mwen pa bezwen di ou anyen sou pa t' janm li yo. Men, m'a fè ou konnen pa gen bèt ki gen fòs pase l'.
13 Se kilès ki kab retire pwotèj eksteyè li? Kilès ki kab penetre pwotèj fèt ak chenn doub?
Pesonn pa janm rive dechire premye po li. Ni pesonn pa janm rive pèse karapas li.
14 Kilès ki kab ouvri pòt figi li? Gwo laperèz antoure dan l.
Ki moun ki janm fòse l' louvri bouch li? Dan nan bouch li, se bagay ki pou fè moun kouri.
15 Gwo kal li yo se gran ògèy li; yo fèmen byen byen di.
Tout do l', se yon seri gwo kal mare yonn ak lòt. Yo di kou wòch.
16 Youn tèlman pre lòt ke menm lè pa kab pase antre yo.
Yo kole yonn ak lòt, yo fè yon sèl. Pa gen yon ti fant nan mitan yo pou lè pase.
17 Yo jwenn youn ak lòt; yo kole yo chak youn sou lòt e yo pa kab separe.
Yo sitèlman byen kole yonn ak lòt anyen pa ka separe yo.
18 Lè li estène, li fè limyè vin parèt; e zye li tankou pòpyè zye nan maten.
Lè l' estènen, limyè fè yan-yan. Je l' klere tankou solèy lè l'ap leve.
19 Tòch dife yo sòti nan bouch li; sann volan yo vòltije vin parèt.
Flanm dife ap soti nan bouch li. Tensèl dife ap vole soti ladan l'.
20 Sòti nan nen l, se lafimen; konsi k ap sòti nan yon gwo bonm k ap bouyi, oswa fèy sèch k ap pran dife.
Lafimen ap soti nan tout twou nen l' tankou nan yon chodyè k'ap bouyi sou dife.
21 Souf li ka limen chabon, e flanm yo sòti nan bouch li.
Souf li ta ka limen bwa dife. Flanm dife ap soti nan bouch li.
22 Kou li se yon rezèvwa fòs e gwo laperèz danse devan l.
Se nan kou li tout fòs li ye. Depi moun wè l', kè yo kase.
23 Tout pli sou chè li vin jwenn ansanm; byen solid sou li, e yo pa kab deplase.
Po li fè kal kal sou tout kò li. Yo kole yonn ak lòt. Yo di kou wòch.
24 Kè li di tankou wòch, di menm tankou gwo wòch moulen.
Kè li di kou wòch, li pa pè anyen. Li fèm kou wòl moulen.
25 Lè l leve pi pwisan yo vin pè; akoz gwo son kraze brize a, yo fè bak nèt.
Lè li leve kanpe, ata gwonèg yo pè. Yo kouri san gad dèyè.
26 Nepe ki rive kote li pa kab fè anyen, ni gwo lans lan, flèch la, ni frenn nan.
Pa gen nepe ki ka blese l'. Ni fwenn, ni lans, ni flèch pa ka fè l' anyen.
27 Pou li moso fè se konsi se pay; bwonz se tankou bwa pouri.
Pou li, nenpòt bout fè lejè kou pay, nenpòt bout asye mou tankou bannann mi.
28 Flèch pa kab fè l sove ale; wòch fistibal se kras raje devan l.
Pa gen kout flèch ki pou fè l' kouri. Wòch fistibal, se boul koton pou li.
29 Baton yo menm se pay. Li ri lè frenn nan kouri vin jwenn l.
Yon baton fè se yon bwa mayi pou li. Li ri lè yo voye lans sou li.
30 Pati anba li se tankou cha kanari; li gaye tankou yon baton ki vannen sou labou.
Anba vant li graj graj tankou moso kannari kraze. Kote li pase nan labou a, li make l' tankou machin k'ap kraze boul tè nan jaden.
31 Li fè pwofondè li yo bouyi tankou yon bonm; li fè lanmè a vin tankou yon ja pomad.
Lè l' plonje, li boulvèse fon lanmè a, se tankou dlo nan chodyè k'ap bouyi sou dife. Li fè l' bouyi tankou dlo nan veso y'ap boule odè.
32 Dèyè l, li fè yon pa kim dlo briye; konsi ou ta konnen se cheve blanch k ap soti nan fon dlo a.
Lè l'ap naje, li kite nan dlo a yon chemen ki klere nan solèy la. Li fè tout lanmè a kimen.
33 Nanpwen anyen sou latè ki tankou li; yon bèt ki fèt san pè anyen.
Pa gen bèt tankou l' sou latè. Bondye kreye l' pou l' pa janm pè anyen.
34 Li gade sou tout bagay ki wo; Li se wa sou tout fis ògèy yo.
Li gade bèt ki pi fewòs yo nan je. Se li ki wa tout bèt sovaj yo.
