Jòb 38

1 Konsa, Bondye te reponn Job nan van toubiyon an:

Lè sa a, nan yon gwo van tanpèt, Seyè a pale ak Jòb. Li di l' konsa:

2 Se kilès sa a ki twouble konsèy Mwen an ak pawòl san konesans yo?

-Kisa ou ye menm pou w'ap poze keksyon sou plan travay mwen ak yon bann diskou ki pa vle di anyen?

3 Alò, mare senti ou tankou gason, M ap mande ou e ou va enstwi M!

Mete gason sou ou! M' pral poze ou keksyon. Pare kò ou pou ou reponn mwen.

4 “Kote ou te ye lè M te poze fondasyon mond lan? Pale si ou gen bon konprann,

Kote ou te ye lè m' t'ap fè latè? Se pou ou reponn mwen si ou konn tout bagay!

5 Se kilès ki te etabli mezi li? Konsi ou konnen? Oswa se kilès ki te lonje lign sou li?

Ki moun ki te deside lajè l'ap genyen? Ki moun ki te pran mezi l'? Eske ou konn sa?

6 Sou kilès baz li yo te fonse? Oswa se kilès ki te poze ang prensipal li a,

Sou kisa fondasyon latè chita? Ki moun ki te poze wòch ki kenbe l' la?

7 lè zetwal maten yo te chante ansanm, e tout fis Bondye yo te rele fò ak gran jwa?

Jou maten sa a, tout zetwal yo t'ap chante, tout sèvitè Bondye yo t'ap bat bravo.

8 “Oswa se kilès ki te delimite lanmè a ak pòt yo, lè l te pete sòti nan vant lemonn nan;

Ki moun ki fèmen pòtay pou bare lanmè a, lè li pete soti nan vant latè a?

9 lè M te fè yon nwaj sèvi vètman li e fènwa byen pwès kon rad anfans li,

Lè mwen kouvri lanmè a ak nwaj, lè mwen vlope l' nan gwo nwaj nwa yo,

10 epi Mwen te plase lizyè sou li, e te kadnase pòt li yo,

mwen bay lanmè a bòn li. Mwen mete pòt avèk kle pou kenbe l' nan plas li.

11 lè Mwen te di: ‘Men la, ou va rive e pa plis; men la vag ògèy ou va rete’?

Mwen di l': Men limit ou. Pa depase l'. Se la m'ap kraze fòs lanm ou yo.

12 “Èske pandan tout vi ou, ou te pase lòd pou maten rive, e fè solèy granmaten an konnen plas li,

Jòb, èske yon sèl fwa ou janm bay lòd pou maten rive? Ou janm bay lè pou bajou kase?

13 pou l ta kenbe mechan yo sou pwent latè e souke l nèt pou yo sòti ladann?

Eske ou janm bay devanjou l' lòd pou l' klere sou tout latè, l' pou l' fè mechan yo soti nan twou yo?

14 Li vin chanje tankou ajil anba yon so; epi prezante la tankou yon abiman.

Lè sa a, tout mòn yo ak tout fon yo parèt aklè, tankou mak pye bèt nan labou. Yo pran koulè yo, ou ta di yon rad latè mete sou li.

15 Sou mechan yo, limyè yo retire e bwa souleve a vin kase.

Limyè solèy la antrave mechan yo nan travay yo. Yo blije kite mechanste yo te pare pou fè a.

16 “Èske ou konn antre nan sous lanmè yo, oswa mache nan fon pwofondè a?

Eske ou te desann jouk kote sous lanmè a pete a? Eske ou te mache nan fon lanmè a?

17 Èske pòtay lanmò yo te konn vin vizib a ou menm? Oswa èske ou konn wè pòtay lonbraj lanmò yo?

Eske yo te janm moutre ou pòtay peyi lanmò a? Eske ou te janm wè pòt ki louvri sou gwo twou san fon an?

18 Èske ou te konprann gwosè ak lajè tout tè a? Di M si ou konnen tout sa a.

Eske ou gen lide ki lajè latè a genyen? Reponn mwen non, si ou konnen!

19 “Kote chemen an ye pou rive nan abitasyon limyè a? Epi tenèb la, kote landwa li,

Eske ou konnen ki bò limyè soti, ki bò fènwa rete,

20 pou ou ta mennen li nan limit li, pou ou ta kab konprann chemen pou rive lakay li?

pou ou ka moutre yo jouk ki bò pou yo ale, osinon pou ou voye yo tounen lakay yo?

21 Fòk ou konnen paske ou te fèt avan sa, e kantite jou ou yo vast!

Si ou konn sa, enben, ou te fèt deja lè mwen t'ap kreye yo a. Ou pa manke gen laj sou tèt ou!

22 Èske ou konn antre nan kay depo nèj yo, oswa èske ou konn wè kay depo pou lagrèl yo,

Eske ou janm rive kote yo fè depo lanèj lan? Ou janm wè depo lagrèl la?

23 ke M te rezève pou tan twoub la, pou jou lagè ak batay la?

Ou konnen depo kote m' sere yo pou lè gen move tan, pou lè batay ak lagè ap fèt?

24 Kote chemen a ki pou fè loray divize a oswa ki kote van lès la te gaye sou tè a?

Ou konnen ki bò solèy la leve, ki bò van lès la soti pou l' soufle sou latè?

25 “Se kilès ki te kreve yon kanal pou gran inondasyon an, oswa yon chemen pou eklè ak tonnè a,

Ou konnen ki moun ki fè wout bay lapli tonbe, ki moun ki fè chemen pou loraj la,

26 Pou mennen lapli nan yon teren kote nanpwen moun, nan yon dezè san pèsòn ladann,

pou lapli tonbe sou dezè a kote moun pa rete,

27 Pou satisfè yon peyi savann dezole e fè grenn zèb yo vin jèmen.

pou wouze tè sèk k'ap fann nan solèy, pou fè zèb pouse nan savann?

28 Èske lapli gen papa? Oswa se kilès ki te reyisi fè gout lawouze yo?

Eske lapli a gen papa? Ki moun ki fè lawouze?

29 Nan ki vant manman a sila glas la te sòti? Epi fredi syèl la, se kilès ki te fè nesans li?

Ki bò moso glas yo soti? Lagrèl ki soti nan syèl la, ki moun ki manman l'?

30 Dlo vin di tankou wòch e sifas pwofondè a vin prizonye ladann.

Se yo menm ki fè dlo vin di kou wòch, ki fè tout dlo anwo lanmè a di kou wòch?

31 “Èske ou konn mare chenn zetwal Pleiades yo, oswa lage kòd zetwal Orion yo?

Ou ka mare zetwal Lapousiyè yo ansanm? Ou ka lage kòd ki kenbe zetwal Oryon yo ansanm?

32 Èske ou kab mennen fè parèt tout sign Zodyak yo nan sezon yo, oswa gide zetwal Gran Lous la ak pitit li yo?

Ou ka mennen zetwal yo soti lè lè yo rive? Ou ka bay Gwo Kabwèt la ak Ti Kabwèt la direksyon pou yo pran?

33 Èske ou konnen tout règleman syèl la, oswa èske ou kab etabli règleman pa yo sou tè a?

Ou konnen lwa k'ap gouvènen tout bagay nan syèl la? Eske ou ka sèvi ak lwa sa yo pou gouvènen sa k'ap pase sou latè?

34 Èske ou kab leve vwa ou rive nan nwaj yo, pou fè gwo kantite dlo vin kouvri ou?

Eske ou ka bay nwaj yo lòd pou yo voye gwo lapli sou ou?

35 Èske ou kab voye ekleraj yo pou yo rive di ou: ‘Men nou isit la’?

Si ou bay zèklè yo lòd pou yo pati, èske y'ap reponn ou: Wi, men nou?

36 Se kilès ki te mete sajès nan kè lòm, oswa te bay bon konprann nan panse a?

Ki moun ki penmèt krabye konprann lè pou li anonse dlo pral desann fè inondasyon? Ki moun ki fè gwo zwezo sa a konnen lè lapli pral tonbe?

37 Se kilès ki kab konte nwaj yo ak sajès, oswa vide gwo krich dlo syèl yo,

Ki moun ki ka konte kantite nwaj ki genyen, san manke yonn? Ki moun ki ka panche yo pou vide dlo lapli,

38 Pou pousyè a vin di nan yon gwo ma dlo e bòl tè yo vin kole ansanm?

pou pousyè tè a tounen labou, pou boul tè yo kole ansanm?

39 “Èske ou kab fè lachas pou bay lyon an manje, oswa satisfè apeti a jenn ti lyon yo,

Eske se ou ki jwenn manje pou bay lyon yo manje? Eske ou bay ti lyon yo manje plen vant yo,

40 Lè yo kouche nan kav pa yo e kouche tann pèlen bò lakay yo?

kote yo kache nan twou yo a, osinon kote yo kouche ap tann nan nich yo a?

41 Se kilès ki prepare manje pou kòbo a lè pitit li rele kote Bondye e mache gaye grangou?

Ki moun ki pare manje pou kònèy yo, lè grangou fè yo soti nan nich yo, lè pitit yo ap rele nan pye m' pou m' ba yo manje?