Jòb 13
1 “Veye byen, zye m gen tan wè tout sa. Zòrèy mwen tande e konprann li.
Wi, mwen wè tou sa ak de je m'. Mwen tande tou sa ak de zòrèy mwen epi mwen konprann.
2 Sa ou konnen yo, mwen konnen yo tou; mwen pa pi ba pase ou.
Sa nou konnen an, mwen konnen l' tou. M' pa pi sòt pase nou.
3 “Men mwen ta pale ak Toupwisan an; mwen vle diskite ak Bondye.
Men, mwen menm, se ak Bondye ki gen tout pouvwa m' annafè. Se avè l' mwen vle pale pou m' defann kòz mwen.
4 Men nou sal moun ak manti. Se yon bann doktè sanzave nou ye.
Nou menm, kote nou pa konnen nou bay manti. Nou tankou dòktè ki pa janm geri pyès moun.
5 Oswa pito ke ou ta rete an silans nèt; ke sa ta sèvi kon sajès ou!
Pito nou pe bouch nou! Lè sa a, n'a pase pou moun ki gen bon konprann.
6 Souple, tande pawòl mwen, e koute mo a lèv mwen.
Koute sa mwen gen sou kè m'. Louvri zòrèy nou pou n' tande jan m' pral plede kòz mwen.
7 Èske ou kab pale pou Bondye sa ki pa jis, e pale sa ki manti pou Li?
Se defann nou vle defann Bondye kifè n'ap bay tout manti sa yo, kifè n'ap pale kwochi konsa?
8 Èske ou va pran ka pa Li? Èske ou va diskite pou Bondye?
Se pou li n'ap pran? Se kòz li nou ranmase?
9 Èske sa va sòti byen lè Li bay ou egzamen? Oswa èske ou va twonpe Li kon yon moun konn twonpe yon moun?
Pou li, li ta bon pou nou si li t'ap chache konnen sa nou gen nan fon kè nou! Pa konprann nou ka woule Bondye tankou nou woule moun!
10 Anverite, Li va repwoche ou si ou apye yon bò ak patripri.
Li ta regle nou byen regle, paske li ta tou wè se figi l' n'ap achte anba chal.
11 Èske majeste Li p ap bay ou lakrent? Laperèz Li p ap tonbe sou ou?
Nou pa pè gwo pouvwa Bondye a? Nou pa pè li kraze nou?
12 Ansyen pwovèb ou yo se pwovèb ki fèt ak sann; defans ou yo se defans ki fèt ak ajil.
Bèl pawòl nou yo pa gen plis valè pase pousyè tè. Repons n'ap ban mwen yo pa kenbe, yo tankou miray sab.
13 “Rete an silans devan m pou m kab pale; epi kite nenpòt sa ki rive m k ap rive.
Koulye a, pe bouch nou! Ban m' yon chans pou m' pale. Sa ki pou rive a te mèt rive!
14 Poukisa mwen ta mete chè m nan pwòp dan m e mete lavi m nan men m?
Mwen mèt mouri! Zafè! M' mare ren m', m' sere dan m'!
15 Malgre Li ta touye mwen, mwen va mete espwa m nan Li. Malgre, mwen va fè diskou chemen mwen yo devan L.
Bondye te mèt touye m'. Sèl chans mwen se pou m' esplike avè l'.
16 Se sa, anplis, ki va delivrans mwen; paske yon enkwayan p ap parèt nan prezans Li.
Nou pa janm konnen, se sa ki ka sove m', paske moun ki fè mal pa ka parèt devan Bondye.
17 Koute pawòl mwen byen pre e kite deklarasyon mwen yo ranpli zòrèy ou.
Koute byen sa m' pral di la a. Louvri zòrèy nou pou n' tande deklarasyon mwen.
18 Tande koulye a, mwen te prepare ka mwen an; mwen konnen ke mwen va jistifye.
M' pare pou m' defann kòz mwen, paske mwen konnen mwen nan dwa m'.
19 Se kilès ki va diskite kont mwen? Paske konsa, mwen ta rete anpè e mouri.
Bondye, èske se ou ki pral plede avè m'? M' tou pare pou m' pe bouch mwen, pou m' asepte lanmò m'.
20 “Se sèl de bagay pou pa fè mwen; konsa mwen p ap kache devan figi Ou:
De sèl ti chans ase m'ap mande ou. Apre sa, m' p'ap kache pou ou ankò.
21 Retire men Ou sou mwen e pa kite laperèz Ou fè m sezi.
Sispann leve men ou sou mwen. Sispann fè m' pè tout pè sa a.
22 Epi rele e mwen va reponn; oswa kite m pale epi reponn mwen.
Ou mèt pale anvan, m'a reponn ou. Osinon, kite m' pale anvan, w'a reponn mwen.
23 Fè m wè fòs kantite inikite mwen yo avèk peche m yo? Fè m rekonèt rebelyon mwen ak peche m yo.
Konbe peche, konbe bagay mal mwen fè? Kisa m' fè mwen pa t' dwe fè? Kisa m' fè ki mal?
24 Poukisa Ou kache figi Ou e konsidere m kon lènmi Ou?
Poukisa w'ap kache pou mwen konsa? Poukisa ou fè tankou si se lènmi ou mwen ye?
25 Èske Ou ta fè yon fèy k ap vole nan van tranble? Oswa èske Ou va kouri dèyè pay van an seche a.
Poukisa w'ap chache fè m' pè? Poukisa ou leve dèyè m' konsa? M' tou fini, m' tankou fèy bwa, tankou pay chèch van ap pote ale.
26 Paske Ou ekri bagay anmè kont mwen e fè m eritye tout inikite a jenès mwen yo.
W'ap akize m' yon bann bagay k'ap fè m' mal. W'ap fè m' peye tou sa m' te fè lè m' te jenn gason.
27 Ou mete pye m nan chenn e ou veye tout chemen mwen yo. Ou limite distans pla pye m kab rive,
Ou mete pye m' nan sèp. Ou veye tout vire tounen m'. Ou gade tout kote m'ap mete pye m'.
28 pandan mwen ap dekonpoze kon yon bagay k ap pouri, kon yon vètman ki manje pa mit.”
M'ap dekale tankou bwa pouri, tankou rad sizo ap manje.
