Sòm 85

1 Pou chèf sanba yo. Se yon sòm pitit Kore yo. Seyè, ou te bon pou peyi ou la! Ou te mennen pitit Jakòb ki te prizonye yo tounen!

Pou direktè koral la; Yon Sòm a fis a Koré yo O SENYÈ, Ou te montre favè Ou a peyi Ou a. Ou te restore kaptivite a Jacob la.

2 Ou te padonnen tou sa yo te fè ki mal, ou te efase tout peche yo.

Ou te padone inikite a pèp Ou a. Ou te kouvri tout peche yo.

3 Ou pa t' fache sou yo ankò! Ou te sispann fè kòlè sou yo!

Ou te retire tout gran kòlè Ou. Ou te detounen kòlè Ou ki brile a.

4 Mete nou kanpe sou de pye nou ankò! O Bondye, ou menm ki delivrans nou! Ou pa bezwen fache sou nou ankò!

Restore nou, O Bondye a sali nou an, e fè endiyasyon Ou anvè nou, sispann.

5 Eske w'ap toujou rete fache sou nou? Eske ou p'ap janm byen ak nou ankò?

Èske Ou va fache avèk nou jis pou tout tan? Èske Ou va pwolonje kòlè Ou jis a tout jenerasyon yo?

6 Eske ou p'ap ban nou lavi ankò, pou pèp ou ka fè fèt pou ou?

Èske se pa Ou menm ki pou fè nou reprann ankò? Pou pèp Ou a kapab rejwi nan Ou?

7 Seyè, fè nou wè jan ou renmen nou! Delivre nou non!

Montre nou lanmou dous Ou a, O SENYÈ. Pèmèt nou resevwa sali Ou a.

8 M'ap koute sa Seyè, Bondye a, ap di: Li pale ak pèp li a, ak moun ki kenbe l' fèm yo, li pwomèt pou l' fè yo viv ak kè poze, depi yo pa janm lage kò yo nan fè betiz ankò.

Mwen va tande sa ke Bondye, SENYÈ a, va di. Paske La p pale lapè a pèp Li a, a fidèl Li yo, men pa kite yo retounen nan foli yo.

9 Wi, li pare pou l' delivre moun ki gen krentif pou li, pou l' fè yo santi pouvwa li, pou l' toujou la avèk yo.

Anverite, sekou Li toupre a (sila) ki gen lakrent Li yo, pou laglwa Li kapab rete nan peyi nou an.

10 Lè sa a nan peyi a, moun yo yonn va renmen lòt, pesonn p'ap bay lòt manti ankò. Moun va viv byen yonn ak lòt, pesonn p'ap fè lòt lenjistis ankò!

Lanmou dous avèk verite te vin jwenn ansanm. Ladwati avèk lapè te vin bo youn lòt.

11 Sou latè moun p'ap vire do bay Bondye. Bondye menm, bò pa li, va rete nan syèl la, l'a gade anba san patipri.

Verite vòltije sòti nan latè, e Ladwati veye depi anwo nan syèl la.

12 Seyè a va fè nou jwenn tout kalite bon bagay. Jaden nou yo va bay bèl rekòt.

Anverite, SENYÈ a va bay sa ki bon, e peyi nou an va bay rekòlt li.

13 Moun k'ap mache dwat yo va pran devan. Kote yo pase moun ap viv byen yonn ak lòt.

Ladwati va mache devan L. L ap prepare yon gran chemen pou mak pla pye Li yo.