Sòm 38

1 Se yon sòm David. Pou Bondye pa bliye nou. Seyè, pa pini m' lè ou fache! Pa kale m' lè ou an kòlè!

Youn Sòm David; tankou yon sonj memorab O SENYÈ, pa repwoche mwen nan kòlè Ou, ni fè m chatiman nan kòlè Ou k ap brile.

2 Ou bat mwen jouk ou blese m'. Ou kale m' byen kale.

Paske flèch Ou yo fin antre fon anndan m, epi men Ou fin peze m.

3 Ou te fache anpil, se sa ki fè pa gen yon pati nan kò m' ki pa malad. Mwen te peche, se sa ki fè tout zo nan kò m' ap fè m' mal.

Nanpwen anyen ki ansante nan chè m, akoz endiyasyon Ou. Nanpwen lasante nan zo m yo akoz peche mwen.

4 Peche m' yo fè pil, yo kouvri tèt mwen. Y'ap kraze m' tankou yon chay ki twò lou pou mwen.

Paske inikite mwen yo fin monte sou tèt mwen. Tankou yon fado lou, yo peze twòp pou mwen.

5 Malenng mwen yo santi, y'ap koule paske mwen te viv tankou moun fou.

Blesi mwen yo vin santi e anfle akoz foli mwen.

6 Mwen kagou, ren m' kase nèt. Tout lajounen m'ap mache tèt bese, dlo nan je.

Mwen fin koube nèt e bese anpil. Mwen ap fè doulè tout lajounen.

7 Mwen gen yon lafyèb cho sou mwen. Mwen santi mwen malad nan tout kò m'

Paske ren mwen plen ak brile. Nanpwen anyen ansante nan chè m.

8 Mwen san fòs, tout zo nan kò m' kraze. Kè m' sere, m'ap plenn sitèlman m'ap soufri.

Mwen pa kab santi anyen ankò. Mwen fin kraze nèt. Vwa m plenyen akoz kè m ajite.

9 Seyè, ou konnen tou sa mwen ta renmen. Ou wè jan m'ap soufri.

SENYÈ, tout volonte m devan Ou. Tout plent a vwa m yo pa kache a Ou menm.

10 Kè m' ap bat anpil, mwen pa kapab sipòte ankò! Ata je m', mwen pa ka louvri yo!

Kè m bat fò, fòs mwen kite m. Menm limyè a zye m, menm sa fin kite mwen.

11 Tout zanmi m', tout vwazinaj kanpe lwen mwen, tout fanmi m' rete lwen mwen poutèt malenng mwen an.

Pwòch mwen yo avèk zanmi mwen yo kanpe nan distans akoz touman m. Fanmi m yo kanpe byen lwen.

12 Moun ki ta renmen wè m' mouri yo tann pèlen pou mwen. Moun ki ta renmen wè malè rive m' yo ap plede di yon bann move pawòl sou mwen. Tout lajounen, y'ap fè konplo sou mwen.

(Sila) ki chache lavi m yo, ap prepare pyèj yo pou mwen. (Sila) ki chache fè m donmaj yo ap fè menas destriksyon. Y ap manniganse trayizon tout lajounen.

13 Mwen menm, mwen tankou yon moun ki soudè, mwen pa tande. Mwen tankou yon moun ki bèbè, mwen pa pale.

Men mwen menm, tankou yon moun mouri, mwen pa tande; Epi se tankou yon bèbè, ki pa ouvri bouch li.

14 Wi, mwen pa louvri bouch mwen reponn yo paske mwen tankou yon moun ki pa tande sa y'ap di a.

Wi, mwen tankou yon nonm ki pa tande. E nan bouch mwen, pa gen repons.

15 Seyè, se nan ou mwen mete tout konfyans mwen, se ou menm ki va reponn pou mwen, o Seyè, Bondye mwen.

Paske mwen mete espwa m nan Ou, O SENYÈ. Ou va reponn, O SENYÈ, Bondye mwen an.

16 Paske, mwen di nan kè m': -Pa kite yo fè fèt sou tèt mwen, pa kite yo moute sou mwen si pye m' chape.

Paske mwen te di: “Ke yo pa vin rejwi sou mwen. Pou lè pye m chape, pou yo ta vante tèt yo kont mwen.”

17 Mwen prèt pou m' tonbe. Doulè a pi rèd sou mwen.

Paske mwen prèt pou tonbe. Tristès mwen devan m tout tan.

18 Mwen rekonèt mechanste mwen fè. Kè m' sere lè m' wè sa m' fè.

Konsa, mwen konfese inikite mwen. Mwen ranpli avèk regrè akoz peche m.

19 Lènmi m' yo gwonèg, yo anpil. Se yon bann moun ki rete konsa yo pa vle wè m'.

Men lènmi m yo plen kouraj e fò. Yo anpil ki rayi mwen san koz.

20 Moun sa yo rann mwen mal pou byen, yo leve kont mwen, paske m'ap chache fè byen.

(Sila) ki remèt mal pou byen yo se lènmi m akoz mwen swiv sa ki bon.

21 Pa lage m' Seyè! Bondye mwen, pa rale kò ou dèyè!

Pa abandone m, O SENYÈ. O Bondye m nan, pa rete lwen m!

22 Prese vin pote m' sekou, Seyè, ou menm ki delivrans mwen.

Fè vit pou ede mwen, O SENYÈ, delivrans mwen an!