Sòm 149

1 Lwanj pou Seyè a! Chante yon chante tou nèf pou Seyè a! Fè lwanj li nan mitan tout moun k'ap sèvi l' yo lè yo reyini!

Louwe SENYÈ a! Chante a SENYÈ a yon chan tounèf, avèk lwanj Li nan asanble fidèl Li yo.

2 Se pou pèp Izrayèl la fè kè l' kontan, paske se li menm ki fè yo. Se pou tout pèp Siyon an fè fèt, paske se li menm ki wa yo.

Kite Israël fè kè kontan nan Kreyatè li a. Kite fis a Sion yo rejwi nan Wa yo a.

3 Se pou nou danse pou fè lwanj li! Se pou nou bat tanbou, se pou nou jwe gita pou li!

Kite yo louwe non Li avèk dans! Kite yo chante lwanj a Li avèk tanbouren ak gita.

4 Seyè a pran plezi l' nan pèp li a, li fè bèl bagay pou malere yo, li delivre yo.

Paske SENYÈ a pran plezi nan pèp Li a. Li va anbeli enb yo avèk sali Li.

5 Se pou pèp Bondye a fè kè yo kontan, paske yo genyen batay la.

Kite fidèl yo leve wo nan glwa. Kite yo chante ak lajwa sou kabann yo.

6 Se pou yo rele byen fò lè y'ap fè lwanj Bondye, avèk nepe nan men yo,

Ke gwo lwanj a Bondye yo kapab nan bouch yo, ak yon nepe file de bò nan men yo,

7 pou tire revanj sou nasyon yo, pou pini pèp yo,

pou fè vanjans sou nasyon yo, avèk pinisyon sou lòt pèp yo;

8 pou yo mete wa yo nan chenn, pou mete grannèg yo nan sèp an fè,

pou mare wa yo ak chenn, ak moun pwisan yo nan gwo chenn an fè,

9 pou ba yo chatiman ki te ekri a. Se va yon bèl bagay pou tout moun k'ap sèvi Bondye. Lwanj pou Seyè a!

pou egzekite sou yo jijman ki te ekri a. Sa se lonè de tout fidèl Li yo. Louwe SENYÈ a!