Sòm 121

1 Se yon chante pou yo chante lè y'ap moute lavil Jerizalèm. Mwen leve je m', mwen gade mòn yo, mwen di: -Ki bò m'a jwenn sekou?

Yon Sòm pou monte vè tanp lan Mwen leve zye m vè mòn yo. Se kibò sekou mwen va sòti?

2 Sekou mwen soti nan men Seyè a. Se li menm ki fè syèl la ak latè a.

Sekou m sòti nan SENYÈ a, ki te fè syèl la ak tè a.

3 Li p'ap kite pye ou chape, moun k'ap veye sou ou a p'ap janm dòmi.

Li p ap kite pye ou chape. (Sila) ki kenbe ou a p ap kabicha, ni dòmi.

4 Moun k'ap veye sou pèp Izrayèl la p'ap kabicha, li p'ap dòmi.

Gade byen, (Sila) ki kenbe Israël p ap kabicha, ni Li p ap dòmi.

5 Se Seyè a k'ap veye sou ou, l'ap kanpe bò dwat ou tankou lonbraj ou. Se li ki tout pwoteksyon ou.

SENYÈ a se gadyen ou. SENYÈ a se lonbraj a men dwat ou.

6 Lajounen, solèy la p'ap fè ou anyen, lannwit, lalin lan p'ap fè ou anyen.

Solèy p ap frape ou lajounen, ni lalin pandan lannwit.

7 Seyè a ap pwoteje ou pou anyen pa rive ou, li p'ap kite anyen rive ou.

SENYÈ a va pwoteje ou de tout mal. Li va kenbe nanm ou.

8 L'ap pwoteje ou kit w'ap antre, kit w'ap soti, depi koulye a ak pou tout tan.

Li va pwoteje ou lè ou sòti ak lè ou antre, depi nan moman sa a e jis rive pou tout tan.