Thaburi 29

1 Thaburi ya Daudi Rahai Jehova, inyuĩ ciũmbe cia igũrũ, rahai Jehova tondũ nĩwe ũrĩ riiri na hinya.

A Psalm of David. Ascribe to the LORD, O heavenly beings, ascribe to the LORD glory and strength.

2 Rahai Jehova, mũheane ũhoro wa riiri wa rĩĩtwa rĩake; thathaiyai Jehova thĩinĩ wa ũkengi wa ũthingu wake.

Ascribe to the LORD the glory due His name; worship the LORD in the splendor of His holiness.

3 Mũgambo wa Jehova ũragamba na kũu iria-inĩ; Mũrungu ũcio wa riiri nĩararuruma, Jehova araruruma igũrũ rĩa maaĩ maingĩ.

The voice of the LORD is over the waters; the God of glory thunders; the LORD is heard over many waters.

4 Mũgambo wa Jehova nĩ ũrĩ ũhoti; mũgambo wa Jehova ũiyũrĩte riiri.

The voice of the LORD is powerful; the voice of the LORD is majestic.

5 Mũgambo wa Jehova unangaga mĩtarakwa; Jehova oinangaga mĩtarakwa ya Lebanoni ĩgatuĩka tũcunjĩ.

The voice of the LORD breaks the cedars; the LORD shatters the cedars of Lebanon.

6 Atũmaga bũrũri wa Lebanoni ũtũũhe ta njaũ, nakĩo Kĩrĩma gĩa Sirioni gĩgatũũha ta njaũ ya mbogo.

He makes Lebanon skip like a calf, and Sirion like a young wild ox.

7 Mũgambo wa Jehova ũhenũkaga nĩnĩmbĩ cia mwaki.

The voice of the LORD strikes with flames of fire.

8 Mũgambo wa Jehova ũinainagia werũ; Jehova ainainagia Werũ wa Kadeshi.

The voice of the LORD shakes the wilderness; the LORD shakes the Wilderness of Kadesh.

9 Mũgambo wa Jehova ũthioraga mĩtĩ ya mĩgandi, na ũgatũma mĩtitũ ĩhũrũrũke ĩgatigwo ũtheri. Nakuo hekarũ-inĩ yake arĩa othe marĩ kuo makaanĩrĩra makoiga, “Kaĩ arĩ riiri-ĩ!”

The voice of the LORD twists the oaks and strips the forests bare. And in His temple all cry, “Glory!”

10 Jehova arĩ igũrũ rĩa mũiyũro wa maaĩ aikarĩire gĩtĩ kĩa ũnene; Jehova egũtũũra aikarĩire gĩtĩ kĩa ũnene arĩ Mũthamaki nginya tene.

The LORD sits enthroned over the flood; the LORD is enthroned as King forever.

11 Jehova aheaga andũ ake hinya; Jehova arathimaga andũ ake magaikara na thayũ.

The LORD gives His people strength; the LORD blesses His people with peace.