< ପ୍ରକାସିତ୍ 18 >
1 ତେନ୍ଇଡ଼ିଂ ନିଂ ଆରି ମୁଇଂ ଦୁତ୍କେ କିତଂବାନ୍ ଜାର୍ଚେ ପାଙ୍ଗ୍ନେ ଙ୍କେକେ । ମେଁନେ ଜବର୍ ଅଦିକାର୍ ଲେଃଗେ ଆରି ମେଁନେ ମଇମାରେ କ୍ଲିଗ୍ ଦର୍ତନିକେ ତାର୍କିଗ୍ ଆଡିଙ୍ଗ୍ଡିଂଗେ ।
2 ମେଁ ଜବର୍ ୱାସାର୍ଚେ ବାସଙ୍ଗ୍କେ, “ମେଁନେ ବିନାସ୍ ଡିଂଲେଃକେ । ମ୍ନା ବାବିଲୋନ୍ ଗୁଣ୍ଡ୍ଗୁଣ୍ଡା ଡିଂଲେଃକେ! ଆତେନ୍ ଏଃକେ ବୁତ୍ ଆରି ଅପବିତ୍ର ଆତ୍ମାଇଂନେ ଲେଃନେ ଟାନ୍ ଡିଂଲେଃକେ । ସାପା ରକମ୍ ଅପବିତ୍ର ଆରି ଗିନ୍ ପ୍ଲିଗ୍ ଆତ୍ଅରିଆ ଉଂଚ୍ୟା ଗାଗ୍ଚେ ଲେଃଆର୍କେ ।
3 ଡାଗ୍ଲା ମେଁ କ୍ଲିଗ୍ ରେମୁଆଁ ଜାତିକେ ମେଁନେ ଜବର୍ ଅଡ଼ାରେଗ୍ ରକମ୍ ସୁରା ଆଉଗ୍ବକେ, ଦର୍ତନିନେ ଇଃସାଙ୍ଗ୍ଇଂକେ ମେଁ ଏତେ ଅଡ଼ାରେଗ୍ ପାପ୍ନ୍ନିଆ ଆଲିଗ୍ ବକେ, ଦର୍ତନିନେ ବେପାରିଇଂ ମେଁନେ ସାର୍ଦା ନ୍ସା ସାଉକାର୍ ଡିଂଲେଃଆର୍କେ ।”
4 ଆକେନ୍ ଇଡ଼ିଂ ନିଂ କିତଂବାନ୍ ବିନ୍ ମୁଇଂ ସାମୁଆଁ ଙକେ, “ନିଂନେ ରେମୁଆଁଇଂ ସାପାରେ ତାର୍ଚେ ପାଙ୍ଗ୍ଲାପା! ଆତ୍ ଡାଗ୍ରାବାନ୍ ତାର୍ଚେ ପାଙ୍ଗ୍ଲାପା! ପେଇଂ ମେଁନେ ପାପ୍ନ୍ନିଆ ଆରି ଲିଗ୍ଚେ ଆଲେଃଗେପା; ମେଁ ମୁଡ଼ି କସ୍ଟ ବାଏ ଆତ୍ଅରିଆନେ ମିସୁଣ୍ଡ୍ରେ ଆଡିଂଗେପା!
5 ମେଁନେ ପାପ୍ଇଂ ରିସିଙ୍ଗ୍ଚେ କିତଂପାକା ଡେଃଲେଃକେ । ମେଁନେ ପାପ୍ କାମ୍ଇଂ ସାପା ଇସ୍ପର୍ ମନେ ବକେ ।
6 ମେଁ ଡିରକମ୍ ପେନେ ଆଡ଼ାତ୍ରା ବେବଆର୍ ଡିଂବକେ, ପେଇଂ ମେଁନେ ଆଡ଼ାତ୍ରା ଟିକ୍ ଡେତ୍ରକମ୍ ବେବଆର୍ ଡିଂପା । ମେଁ ମେଃନେ ଡିଂବକେ, ଆମେକେ ମେଁନେ ମ୍ବାର୍ଗୁନ୍ କାମ୍ ବିଃପା । ଆପେକେ ଆଉଗ୍ନେ ନ୍ସା ମେଁ ମୁଡ଼ି ଉଗ୍ନେ ଆଃରେ ବଗେ, ମେଁନେ ମ୍ବାର୍ଗୁନ୍ କଟୁ ଣ୍ଡିଆଃ ମେଁନେ ଉଗ୍ନେ ଙ୍କୁଇନ୍ନିଆ ଆଃତ୍ନବିପା ।
7 ମେଁ ନିଜ୍କେ ଉଡ଼ି ପ୍ରସଂସା ଡିଙ୍ଗ୍ଡିଙ୍ଗେ ଆରି ସାର୍ଦାନ୍ନିଆ ଲଗ୍ ଲେଃଗେ, ଆତେନ୍ ଇସାବ୍ରେ ଆମେକେ ଦୁକ୍କସ୍ଟ ବିଃପା । ଡାଗ୍ଲା ମେଁ ନିଜର୍ନେ ଆମ୍ନାଚେ ବାସଙ୍ଗ୍ଡିଂକେ, ‘ନିଂ ଆକ୍ଅରିଆ ରାନି ସୁଗୁଆ କନ୍ଲେଃକେ! ନିଂ ଗୁଏସାଂକୁଏ ଣ୍ଡୁ, ନିଂନେ ଅଃନାଡିଗ୍ ଦୁକ୍ ଆଡିଂ ଣ୍ଡୁ!’
8 ମେଁନେ ଆକେନ୍ ସାପା ପାପ୍ ନ୍ସା ରଗ୍, ଅଃନେ, ମୁର୍ଡି ମେଃସୁଆ ଆମେକେ ମୁଇଂ ତର୍କେ ଆଚିନାଏ । ବାରି ମେଁ ସୁଆନ୍ନିଆ କ୍ଲିଗ୍ଡା ଗିଃ ୱେଏ । ଡାଗ୍ଲା ମେଁନେ ଜା ବିଚାର୍ ଡିଙ୍ଗ୍ଡିଂକେ ଆତେନ୍ ମାପ୍ରୁ ଇସ୍ପର୍ ମ୍ନା ବପୁଣ୍ଡ୍ରେ ।”
9 ଦର୍ତନିନେ ମୁଡ଼ି ଇଃସାଙ୍ଗ୍ ମ୍ନାଇଃସାଙ୍ଗ୍ଇଂ ମେଁ ଏତେ ଅଡ଼ାରେଗ୍ ଆରି ପାପ୍ କାମ୍ଇଂ ଡିଂବଆର୍ଗେ ମେଁଇଂ ମେଁନେ ଗିଃ ଡିଂକ୍ନେ ଗାଗ୍ଡ଼େବାନ୍ ତଃଡ଼ିଆଡିଂକ୍ନେ ମାଃସ କେଚେ ଅଃ ଆର୍ଏ ।
10 ମେଁନେ ଦୁକ୍କସ୍ଟନ୍ନିଆ ମିସୁ ନ୍ସା ବୁଟଚେ ମେଁଇଂ ମେଁବାନ୍ ଜାବର୍ ସ୍ଲ ତୁଆଁଚେ ଲେଃଆର୍ଏ ବାରି ଆୟ ଆୟ ଡିଂଚେ ବାସଙ୍ଗ୍ଆର୍ଏ, “କି ବୟଙ୍କାର୍! କି ବୟଙ୍କାର୍! ନାଁ ମେଃନେ ଆତେନ୍ ସକ୍ତିସାଲି ମ୍ନାଇନି ବାବିଲୋନ୍! ମାତର୍ ମୁଇଂ ଗଣ୍ଟା ବିତ୍ରେ ଡେକ୍ରକମ୍ ସାସ୍ତି ବା ନାୱେଗେ!”
11 ବାରି ଦର୍ତନିନେ ବେପାରିଇଂ ମେଁ ନ୍ସା ଅଃ ଆର୍ଏ ଡାଗ୍ଲା ଆରି ଜାଣ୍ଡେ ମେଁଇଂ ସ ଡିଂଆର୍କ୍ନେ ଜିନିସ୍ ଆବେହାର୍ ଣ୍ଡୁ ।
12 ମେଁଇଂନେ ସୁନା, ରୁପା, ମଣି, ମୁକ୍ତା ମେଁଇଂନେ ତୁଲୁଏ କାର୍ପାସ୍ ସକା, କାଲା, ଚିରାଃ ବାନା, ପଟ୍ଟସକା ଆରି ସିନ୍ଦୁର୍ ବାନା ସକା; ସାପା ରକମ୍ ଦଦ୍ୟା ସୁଆ; ଆତି ଗ୍ନି ଆରି ମୁଲ୍ୟବାନ୍ ସୁଆ ଏତେ ଆରେକ୍ନେ ଜିନିସ୍; ପିତଲ୍ ଲୁଆ ଆରି ମର୍ମର ବ୍ରି ଏତେ ଆରେକ୍ନେ ଜିନିସ୍
13 ଦାରୁଚିନି ଆରି ବିନ୍ବିନ୍ ମସ୍ଲା ଜିନିସ୍; ଦୁପ୍ ନିମାଣ୍ଡା ମଃକ୍ନେ ଲିଗ୍ନେ ଜିନିସ୍ କୁନ୍ଦୁରୁ ସାଗ୍ରା ଞ୍ଚୁ ମଇଦା ଗହମ୍ ଅରେଃ ମେଣ୍ଡା ଗୋଡ଼ା ରତ୍ ଡେକ୍ରକମ୍ କି ଗତିରେ ଣ୍ଡୁଲା ଆତ୍ମାମିସୁକ୍ନେ ରେମୁଆଁଇଂକେ ଣ୍ଡିଗ୍ ବେହାର୍ ନ୍ସା ଜାଣ୍ଡିଗ୍ ବେହାର୍ଣ୍ଡ୍ରେ ଆତାର୍ଆର୍ ଣ୍ଡୁ ।
14 ବେପାରିଇଂ ଆମେକେ ବାସଙ୍ଗ୍ଆର୍ଏ: “ନାଁନେ ଇକ୍ଚା ସାପା ନିମାଣ୍ଡା ଜିନିସ୍ ବୁଃଡ଼ି ୱେଲେଃକେ ବାରି ନାଁନେ ଦନ୍ ସମ୍ପତିନେ ଜିଗ୍ଜାଗ୍ ଆରି ଣ୍ଡୁ । ନାଁ ଆତେନ୍ଇଂକେ ଆରି ଅଃନାଡିଗ୍ ଆଣ୍ଡେ ନାବା ଣ୍ଡୁ!”
15 ମୁଡ଼ି ବେପାରିଇଂ ଆତେନ୍ ଇନିନ୍ନିଆ ବେପାର୍ ଡିଂଚେ ସାଉକାର୍ ଡିଂଲେଃଆର୍ଗେ ମେଁଇଂ ମେଁନେ ଦୁକ୍ବାନ୍ନିଆ ମିସୁନେ ବୁଟଚେ ଜାବର୍ ସ୍ଲ ତୁଆଁଚେ ଲେଃଆର୍ଏ । ମେଁଇଂ ଅଃଚେ
16 ବାସଙ୍ଗ୍ଆର୍ଏ, “ହାଏ! ମ୍ନାଇନିନେ ଅବସ୍ତା ଏକେ ଉଡ଼ି ବୟଙ୍କାର୍ ଉଡ଼ି କସ୍ଟ! ମେଁ ତୁଲୁଏ ସକା, କାଲା, ଚିରାଃ ଆରି ସିନ୍ଦୁର୍ ବାନା ସକା ସଲେଃଗେଣ୍ଡ୍ରେ ସୁଗୁଆ ଲେଃଗେ ବାରି ସୁନା ମଣି ଆରି ମୁକ୍ତାନ୍ନିଆ ତଗଃ ଲେଃଗେ ।
17 ମାତର୍ ମୁଇଂ ଗଣ୍ଟା ବିତ୍ରେ ମେଁ ଆକେନ୍ ସାପା ସମ୍ପତି ଆନ୍ତାର୍କେ!” ଜାଆଜ୍ଇଂନେ ସାଉକାର୍ ୱେଣ୍ଡ୍ରେ ଆଚାଲେଣ୍ଡ୍ରେ ଆରି କେଣ୍ଡିଆନ୍ନିଆନେ ବେପାରିଇଂ ଜାବର୍ ସ୍ଲ ତୁଆଁଆର୍କେ
18 ଆରି ଗିଃ ଡିଂକ୍ନେ କେଚେ ଜବର୍ ୱାସାର୍ଚେ ବାସଙ୍ଗ୍କେ “ଆକେନ୍ ମ୍ନାଇନି ସୁଗୁଆ ଆରି ମୁଡ଼ିଡିଗ୍ ଇନି ଆଲେଃଗେ ।”
19 ମେଁଇଂ ବାଆଃ ଆଡ଼ାତ୍ରା ବାଲି ତ୍ଲାଗ୍ଚେ ଅଃଚେ ବାସଙ୍ଗ୍ଆର୍କେ “ଉଡ଼ି ବୟଙ୍କାର୍! ଇନିନେ ଆକେନ୍ ଉଡ଼ି ବୟଙ୍କାର୍ କସ୍ଟ! କେଣ୍ଡିଆନ୍ନିଆ ୱେଆର୍ଡିଂକ୍ନେ ଜାଆଜ୍ଇଂ ମେଁନେ ଦନ୍ନ୍ନିଆ ମ୍ନା ଲେଃଆର୍ଗେ! ମାତର୍ ମୁଇଂଗଣ୍ଟା ବିତ୍ରେ ମେଁ ଦଂସ ଡିଂଲେଃକେ!”
20 ଏ କିତଂ ରେମୁଆଁ! ମେଁ ଦଂସ ବା ଲେଃକେସା ମ୍ଲେଡ଼୍ୟାପା । ଏ ସାଦୁରେଇଂ; ବେକ୍ନେ ସିସ୍ ଆରି ବାବବାଦିଇଂ! ସାର୍ଦା ଡିଂପା ଡାଗ୍ଲା ପେନେ ଆଡ଼ାତ୍ରା ମେଁ ମେଃନେ ଡିଂବଗେ ଆତେନ୍ସା ଇସ୍ପର୍ ଆମେକେ ସାସ୍ତି ବିବକେ ।
21 ତେନ୍ଇଡ଼ିଂ ମୁଇଂ ଜବର୍ ବପୁକ୍ନେ ଦୁତ୍ ପ୍ନେଡିର୍ ରକମ୍ନେ ମୁଇଂ ମ୍ନା ବ୍ରି ଡୁଂୱେଚେ କେଣ୍ଡିଆନ୍ନିଆ ଜଗ୍ତ୍ଲାଗ୍କେ ଆରି ବାସଙ୍ଗ୍କେ “ମ୍ନାଇନି ବାବିଲୋନ୍ ଡେକ୍ରକମ୍ ବାବ୍ରେ ଜଗ୍ତ୍ଲାଗ୍ଏ ବାରି ଆମେକେ ଆରି ଜାଣ୍ଡେ ଅଃନାଡିଗ୍ କିକେ ଆୟାଆର୍ ଣ୍ଡୁ ।
22 ମେଃ ବିନା ମେଃ ଅସ୍ମାର୍ ବାଉଁସି ଣ୍ଡୁଲା ପ୍ନି ସବ୍ଦ ଅଃନାଡିଗ୍ ଆରି ନାଁନେ ବିତ୍ରେ ଆନ୍ନାଂ ଣ୍ଡୁ । ମୁଃଡ଼ି ସ୍ଲେରେ ଣ୍ଡୁଲା ଆଃରେଣ୍ଡ୍ରେ ନାଁନେ ବିତ୍ରେ ଆରି ଆତ୍ନାଆର୍ ଣ୍ଡୁ; କି ପ୍ନେଡିର୍ ଉଃନେ ସବ୍ଦ ଆନ୍ନାଂ ଣ୍ଡୁ ।
23 ନାଁ ବିତ୍ରେ ଆରି ଅଃନାଡିଗ୍ କୁପିସ ଆତାର୍କିଗ୍ ଣ୍ଡୁ; ଣ୍ଡୁଲା ଙ୍ଗିରେ ସେଲାଇଂନେ ବାଲିର୍ବାତା ଆନ୍ନାଂ ଣ୍ଡୁ । ଡାଗ୍ଲା ନାଁନେ ବେପାରିଇଂ ଦର୍ତନିନ୍ନିଆ ଜବର୍ ବପୁ ଡିଂଚେ ଲେଃଆର୍ଗେ ନାଁନେ ଜାଦୁବିଦ୍ୟାବାନ୍ ନାଁ ଦର୍ତନିନେ ସାପା ଜାତିକେ ନାଲେଚେ ନାବଗେ ।”
24 ବାରି ଆକେନ୍ ଇନିନ୍ନିଆ ଦର୍ତନିନେ ଗୁଲେରୁଆ ବାବବାଦି ଆରି ସାଦୁଇଂନେ ମରନ୍ ଡିଂଲେଃଗେ । ଆକେନ୍ ସାପା ପାପ୍ ନ୍ସା ମେଁ ସମାନ୍ ଡଣ୍ଡ୍ ବାଲେଃକେ ।
