Psalms 47

1 To victorie, a salm to the sones of Chore. Alle ye folkis, make ioie with hondis; synge ye hertli to God in the vois of ful out ioiyng.

2 For the Lord is hiy and ferdful; a greet kyng on al erthe.

3 He made puplis suget to vs; and hethene men vndur oure feet.

4 He chees his eritage to vs; the fairnesse of Jacob, whom he louyde.

5 God stiede in hertli song; and the Lord in the vois of a trumpe.

6 Synge ye to oure God, synge ye; synge ye to oure kyng, synge ye.

7 For God is kyng of al erthe; synge ye wiseli.

8 God schal regne on hethene men; God sittith on his hooli seete.

9 The princes of puplis ben gaderid togidere with God of Abraham; for the stronge goddis of erthe ben reisid greetli.