< Ngeche 24 >
1 Kik nyiego maki gi joricho bende kik iyie chunyi gomb bedo e chokruok margi;
2 nimar chunjegi chano timo mamono to dhogi wacho mana gik makelo chandruok.
3 Rieko ema igerogo ot, to kuom winjo ogurore mosiko;
4 kuom ngʼeyo, utene maiye ipongʼo gi gik moko ma ok yudo yot kod mwandu mabeyo.
5 Ngʼat mariek nigi teko maduongʼ; to ngʼat man-gi ngʼeyo medo teko;
6 nimar dhiyo e lweny dwaro ni ongʼadni rieko, to bedo gi loch dwaro jongʼad rieko mangʼeny.
7 Rieko bor moyombo ngʼat mofuwo; e kar bura mar alap oonge gi gima onyalo wacho.
8 Ngʼat machano gima rach biro ngʼere kaka ja-andhoga.
9 Andhoga mar fuwo en richo, to ji mon kod ja-jar ji.
10 Ka tekri orumo mipodho e kinde mar lweny, to mano kaka tekri tin!
11 Res jogo mitero kar tho; mak jogo mawuotho ka tangni dhiyo kar yengʼo.
12 Ka iwacho niya, “Ne ok wangʼeyo gimoro kuom wachni,” donge ngʼatno mapimo chuny dhano ongʼeyo wachno? Donge ngʼat morito kendo ngʼiyo ngimani ongʼeyogo? To donge obiro chulo ngʼato ka ngʼato mowinjore gi timbene?
13 Wuoda, cham mor kich, nimar ober; mor kich moa e pedni mar kich nigi ndhandhu mamit.
14 Ngʼe bende ne rieko mit ni chunyi; ka iyude, nitie geno mar ndalo mabiro kuomi, to genoni ok nongʼad oko.
15 Kik ibut ka ngʼat marach mondo iketh od ngʼat makare, kik iyak dalane,
16 kata bedni ngʼat makare ogore piny nyadibiriyo, pod obiro chungo kendo; to joricho igoyo piny gi masira.
17 Kik ibed mamor gi masiche mag jasiki, ka ochwanyore, kik iyie chunyi bed mamor;
18 nimar Jehova Nyasaye biro neno kendo golo mirimbe oko kuome.
19 Kik ibed maluor nikech joricho kata kik nyiego maki kod joma timbegi richo,
20 nimar jaricho onge gi geno mar ndalo mabiro, kendo taya mar ngʼat marach ibiro nego.
21 Wuoda, luor Jehova Nyasaye kod ruoth morito piny, kendo kik iriwri gi joma kwede,
22 nimar ji ariyogo biro kelonegi chandruok apoya nono, to en ngʼa ma dingʼe ni en chandruok manade ma ginyalo kelo?
23 Magi bende gin weche mag jomariek: Luoro wangʼ kuom ngʼado bura ok ber:
24 Ngʼatno mowachone jaketho niya, “In kare ionge ketho” ji biro kwongʼe to piny kwede.
25 To nobed maber gi jogo makumo joma oketho, kendo gweth mogundho nobed kodgi.
26 Dwoko maratiro nyiso ni mano osiepni mar adier.
27 Tiek tijeni ma oko kendo ik puothegi; bangʼ mano, eka iger odi.
28 Kik ibed janeno e wach jabuti kaonge gima omiyo, kata tiyo gi dhogi mondo iriambi.
29 Kik iwach niya, “Abiro timone mana kaka osetimona; abiro chulo ngʼatno mana kaka notimona.”
30 Nakadho but puoth jasamuoyo, kakadho but puoth olemb mzabibu mar ngʼat maonge gi rieko;
31 kudho notwi kuonde duto, puodho duto noim gi buya, to ohinga mar kidi nomukore.
32 Naketo chunya nono gino mane aneno to napuonjora kuom gino mane aneno.
33 Nindo matin, ayula wangʼ matin, kwakruok matin kiyweyo,
34 to dhier biro monji ka janjore kendo chan ka jalweny momanore.
