Sam 104

1 kasakkung: panuekhoeh Oe, ka hringnae BAWIPA teh pholen haw. Oe BAWIPA ka Cathut nang teh na lentoe tangngak. Taluenae hoi barinae hoi kamthoup e lah na o.

2 Khohna patetlah angnae na khohna teh, kalvannaw hah hni patetlah na yap.

3 Na onae im van adunaw hah tui dawk na pâhung teh, tâmai patet hah leng lah na coung sak teh kahlî rathei hoi na tho.

4 Na patounenaw hah kahlî patetlah thoseh, thaw katawknaw hah hmaito patetlah thoseh na coung sak.

5 Talai adu hah nâtuek hai a kampuen hoeh nahanlah ka caksak e lah na o

6 Talai hah hni hoi khu e patetlah tui hoi na khu teh, tui hah monsom vah a kangdue.

7 Na yue toteh, a yawng awh. Khoparit lawk a thai awh toteh karangpoung lah a yawng awh.

8 Mon lah a luen awh teh, ravonaw dawk hoi a kum awh teh ao nahane hmuen koe koung a pha awh.

9 Tuinaw bout a tho teh, talai a muem hoeh nahanlah, a tapuet thai hoeh hane khori hah a khuen pouh.

10 Ravo dawk lawng hanelah tui hah a tha teh, mon hoi a lawng cathuk awh.

11 Saring pueng ni nei hanelah a poe teh, kahrawng e lanaw ni hai tui kahran a dap sak awh.

12 Ateng vah kalvan e tavanaw tabu a tuk awh teh, thingkungnaw dawk a cai awh.

13 A im van hoi monnaw tui a awi teh, na tawk e ni talai heh ka boum lah a kawk.

14 Talai ni rawca a tâco sak nahanlah saringnaw hanlah pho a paw sak teh taminaw hanlah thingthairompo a paw sak.

15 Misur ni tami lungthin a nawm sak, satui ni mei a kâpi sak, rawca ni tha ao sak.

16 BAWIPA e thingkung lebanon mon vah a ung e sidar thingnaw hai a boum awh.

17 Hawvah, tavanaw ni a tabu a tuk awh teh, hmaica thing teh kahrawng cawmpainaw e im lah ao.

18 Lungha teh Athanaw o nahanelah ao teh, savehnaw teh talung koe a kâhro awh.

19 Ama ni thapa hah hnintha touk nahanlah a sak teh, kanî ni khup nahan tue a panue.

20 Hmonae na sak teh hothateh karum doeh. ratu thung e saring pueng a tâconae tue lah ao.

21 Sendektanca ni kei hane a tawng teh, Cathut koehoi e rawca a tawng.

22 Kanî a tâco toteh a onae a kâkhu dawk lengkaleng a tabo awh.

23 Tami teh thaw tawk hanelah a tâco teh, tangmin lah totouh a tawk.

24 Oe BAWIPA, na sak e hno teh apap poung. Lungangnae hoi na sak e seng doeh. Talai teh na tawntanae hoi akawi.

25 Hete ka kaw ni teh kalen e talîpui dawkvah, touklek thai hoeh e saring kathoung kalen a kâhlai awh.

26 Haw e hmuen koe long a cei teh, hawvah ka paitun hanelah na sak e tangapui Leviathan hai ao.

27 A tue a pha toteh, rawca na poe thai nahanlah abuemlahoi nang na ring awh.

28 Na poe e pueng a la awh teh, na kut na dâw teh hno kahawi hoi a kâkawk awh.

29 Na minhmai na hro pouh toteh, a lungpuen awh. A kâha na lat pouh pawiteh a due awh teh vaiphu lah a coung awh.

30 Na Muitha na tha toteh hotnaw teh sak e lah ao. Talai meilam hai bout na katha sak.

31 BAWIPA bawilennae teh yungyoe kangning seh. BAWIPA teh a sak e dawk konawm naseh.

32 Talai a khet nah a pâyaw, mon a tek nah hmaikhu a tâco.

33 Ka hringyung thung BAWIPA koe la ka sak vaiteh, ka hringyung thung Cathut pholen hoi la ka sak han.

34 Ka khopouknae hah ahni hanelah radip naseh. BAWIPA dawk ka konawm han.

35 Tamikayon teh talai hoi raphoe lah awm naseh. Tamikathout awm hanh lawiseh. Oe kahringnae BAWIPA teh pholen haw. Hallelujah.