Cingthuilawk 4

1 Ka canaw, na pa ni na cangkhainae hah thai awh nateh, thaipanueknae hah panue hanelah na hnâpakeng awh.

2 Bangkongtetpawiteh, cangkhainae kahawi hah na poe dawkvah, kaie kâlawk hah cettakhai hanh.

3 Apa e capa lah ka o navah, anu e capa a pahren e tawntoe e capa lah ka o.

4 Pâtu hai na pâtu teh, na lungthin hoi ka lawknaw hah pâkuem haw. Kaie kâpoelawknaw hah tarawi nateh hring haw.

5 Lungangnae hah tawn nateh, thaipanueknae hah tawn haw. Ka pahni dawk hoi ka tâcawt e lawknaw hah pahnim laipalah, kamlang takhai hanh.

6 Cettakhai hanh, na ring nakaima. Lungpataw haw na ngue han kaima.

7 Lungangnae teh a lawkpui poung doeh.

8 Talue sak haw, na tawmrasang han. Tapam haw, barinae koe na ceikhai han.

9 Na lû dawk lungmanae na kâmuk sak han, bawilennae bawilakhung hah na kâmuk sak han.

10 Ka capa, ka dei e hah thai nateh, dâw haw. Na hringyung a saw sak han.

11 Lungangnae lamthung na cangkhai teh, lamkalan dawk na hrawi.

12 Na cei navah, na khok hanelah kamthuinae awm mahoeh, na yawng navah na tâlaw mahoeh.

13 Na cangkhainae hah kacaklah kuen nateh, tha laipalah pou kuen haw. Bangkongtetpawiteh, na hringnae doeh.

14 Tamikathoutnaw e lamthung dawk kâen awh hanh. Tami kahawihoehnaw e lamthung dawn hanh.

15 Roun nateh, khoeroe dawn hanh, kamlang takhai nateh, cettakhaih.

16 Bangkongtetpawiteh, hno kathout sak hoeh pawiteh, ip thai awh hoeh niteh, tami buetbuet touh tâlaw sak hoehpawiteh, ihmu tho awh hoeh.

17 Bangkongtetpawiteh, thoenae vaiyei hah a ca awh teh, rektapnae yamu hah a nei awh.

18 Hatei, tamikalannaw e lamthung teh, kanî raeng, kanî tuengtalueng a thunnae kanî ang patetlah ao.

19 Tamikathoutnaw e lamthung teh khohmo patetlah ao teh, tâlawnae akungcing hai panuek awh hoeh.

20 Ka capa, ka lawk kahawicalah thai haw, ka dei e hah atangcalah pouk.

21 Na mit hoi kâhlat sak hanh, na lungthin dawk pâkuemh.

22 Bangkongtetpawiteh, kahmawtnaw hanelah hringnae lah ao teh, a takthai abuemlah hanelah damnae lah ao.

23 Hno pueng hlak hoi na lungthin hah kahawicalah ring haw. Bangkongtetpawiteh, hringnae akungtuen lah ao.

24 Dumyennae pahni hah pahnawt nateh, payonnae pahni hah ahlanae koe takhoe haw.

25 Na mit hoi hmalah kalan lah khen nateh, na hmalah kalan lah radoung haw.

26 Na lamthung hah hmaloe rip nateh, na lamthung pueng hah cak sak.

27 Aranglah nakunghai, avoilah nakunghai phen hanh. Thoenae lamthung hah roun haw.