La Bu 99

1 Yahweh Pakai hi leng ahi! Chitin namtin kithing thingjeng hen! Ama Cherubim teni kikah a laltouna a atouvin ahi. Vannoi leiset pumpi kithing hen.

2 Yahweh Pakai chu Jerusalem ah loupitah' in atouvin ahi. Chitin namtin ho jouse chung vum a dopsang' in aum e.

3 Amahon namin gimneitah chu thangvah uhen, naminhi athenge!

4 Lengloupi thudih ngailua, nangin thildih hi nadomsang' in, thudih in kal nasong' in Israel lah-a thudih nachelhah sah' in ahi.

5 Yahweh Pakai iPathen' u Elohim hi dopsangin umhen! A-ang sungah bohkhup un, ajeh chu Amahi atheng ahi.

6 Mose le Aaron jongchu thempu ahilhon e, Samuel injong Amin anakouve. Amahon Yahweh Pakai kom ah panpi ngaichan anakouvun ahi, chuleh Aman anahouvin ahi.

7 Aman meilom lah a kon in Israel ho lah-a thu anasei in, amahon Yahweh Pakai in apeh-u Dan le thupeh hochu anajui un ahi.

8 O Yahweh Pakai ka Pathen' u Elohim! nangin amaho nana donbut in ahi. Nangma hi amaho ding a mi ngaidam jing Elohim Pathen nahi, ahinla amaho achekhel teng uleh nagim boljin ahi.

9 Yahweh Pakai, iPathen' u Elohim hi domsang' un chuleh Jerusalem a moltheng achun chibai boh' un ajeh chu Yahweh Pakai, iPathen' u Elohim hi atheng ahi.